တနံၤအံၤ‚ ဖျါလၢစဲးဖီကဟၣ်ပီညါ ဃ့ဆူၣ်ပတၢ်ဘၣ်သးဒီဆၢဒီကတီၢ်လီၤႉ ပဒိးန့ၢ်တၢ်ဟ့ၣ်ပှၤတၢ်သ့တၢ်ဘၣ်လၢ အလီၤကမၢကမၣ်သ့ၣ်တဖၣ် ခီဖျိကွဲၤဒီနၢ်လၢ အအိၣ် လၢပစုလီၤႉ ဘၣ်ဆၣ်‚ လၢပှၤအါဂၤအဂီၢ် တၢ်နီၤဟ့ၣ်တၢ်အံၤ ကဲထီၣ်တၢ်လၢာ်ဘူၣ်လၢာ်စ့ၤ သ့၀ဲန့ၣ်လီၤႉ
ပှၤကွဲးလံာ်လ့ဒၣ်စတိ ကွဲးဖျါ တၢ်ဂ့ၢ်အံၤ ဒ် ‘‘တၢ် ပာ်သးထံထံဆးဆးလၢ အဘၣ်တၢ်မၤအီၤ တဘျီ၀ံၤတဘျီ’’ မ့ၢ်လၢ စိၤခဲအံၤ အတၢ်အဲၣ်ဒိးသ့ၣ်ညါ တၢ်လၢ အဟဲကဲထီၣ်တဖၣ်‚ ဒီးတၢ်အဲၣ်ဒိးမၤလီၤတံၢ်တၢ်ဒီး တဒုးလဲၤပူၤကွံာ် တၢ်ဂ့ၢ်နီတမံၤဘၣ်န့ၣ်လီၤႉ တၢ်အံၤပာ်ဖျါထီၣ်လၢ တၢ်ဒုး အိၣ်ထီၣ် တၢ်သူၣ်ကိၢ်သးဂီၤ အတၢ်ပျံၤဖုးန့ၣ်လီၤႉ
တၢ်မၢဖိစီၤပီလူး အနီၣ်ကစၢ်ဒၣ်၀ဲ ဘၣ်အိၣ်ဒီး တၢ်သူၣ်ကိၢ်သးဂီၤ အကလုာ်ကလုာ်‚ ဘၣ်ဆၣ်အ၀ဲသ့ၣ်ညါ လၢ ပသူၣ်ပသးတဖၣ် ဃုထံၣ်န့ၢ်တၢ်ဃူတၢ်မုာ်လၢ အအိၣ်လၢ ယွၤအပူၤန့ၣ်လီၤႉ အဃိ‚ အ၀ဲကွဲးလံာ်ဆူ ပှၤစူၢ်နာ်သီတၢ်လၢ အဘၣ်တူၢ်တၢ်မၤအၢ မၤနးသ့ၣ်တဖၣ်အအိၣ်န့ၣ် (၁ သ့း ၂း၁၄) ‚ အ၀ဲသဆၣ်ထီၣ် ပှၤစူၢ်က့ၤနာ်က့ၤတၢ် တဖၣ်အခံ‚ ဒ်သိး က‘‘သူၣ်ဖှံသးညီ တဘိယူၢ်ဃီ‚ ဘါထုကဖၣ်တထံၣ်ဃီလၢ တၢ်ခဲလၢာ်အပူၤ စံးထီၣ်ပ့တၢၤတၢ် အဘျုးအဖှိၣ်’’ (၅း၁၆-၁၈) န့ၣ်လီၤႉ
တၢ်ကဘါထုကဖၣ်တၢ် ‘‘တထံၣ်ဃီ’’‚ ဖျါလၢအဒုးကဲထီၣ် တၢ်လၢ အမၤစှၤလီၤ ပတၢ်နာ်န့ၢ်လီၤသးန့ၣ်လီၤႉ ပကဆိကမိၣ်ထီၣ် မ့ၢ်ပသမံသမိးကွၢ် ပကွဲၤဒီနၢ်ဒ်လဲၣ်ႉပမ့ၢ်မၤတၢ်အံၤ တဘျီ၀ံၤတဘျီဒီး တ့ကၢးလၢပကကတိၤတၢ် ဒီးယွၤလၢ တၢ်ထုကဖၣ် ဒ်ပမၤဒ်အံၤအသိးဘၣ်ဧါႉ ဆူတၢ်ကစံးထီၣ်ဖျဲးတၢ်ဘျုး‚ ဆူတၢ်ကဃ့ထုကဖၣ်တမံၤ မ့တမ့ၢ် စံးထီၣ်ပ့တၢၤ ကစၢ်ယွၤတခီ‚ တၢ်မၤအီၤတသ့၀ဲဘၣ်ဧါႉ
တၢ်လၢအကါဒိၣ်န့ၢ်ဒံး တၢ်မၤလိဒီး တၢ်ဟ့ၣ်ခီလဲ ‘‘တၢ်သ့ၣ်ညါ’’ န့ၣ် မ့ၢ်၀ဲ တၢ်ထုကဖၣ်သပှၢ်ပှၢ်လၢ ယွၤအမဲာ်ညါန့ၣ်လီၤႉ ခီဖျိတၢ်သန့ၤထီၣ်သးလၢ ခရၠာစးံာ်အသးစီဆှံန့ၣ် ပကမၤလိန့ၢ် တၢ်ဟ့ၣ်ဆၢက့ၤ ပပၢ်လၢမူခိၣ်လၢ ပတၢ်သးစဲဘူးဒီးအီၤ အလၢအပှဲၤထီဘိ ဖဲပအိၣ်မူဟူးဂဲၤဖံးမၤကိးနံၤဒဲး န့ၣ်လီၤႉ