တဘျီဘျီ‚ ဖဲယထွံၣ်ဖိ မဲးစ် မ့ၢ်သးအိၣ်လၢ ယကကနၣ်ဃုာ်အီၤန့ၣ် အ၀ဲဟံးန့ၢ် ယတၢ်ဖိတၢ်လံၤတမံၤမံၤ ဒီးရၠာစးဲၣ်လီၤ၀ဲလၢ ယမဲာ်ညါလီၤႉ ဘၣ်တဂီၤ‚ ယဃၣ်ယသးဒီး ကွဲးလံာ်လၢယစီၢ်နီၤခိၣ်အခါ မဲးစ် အ့ၣ်ထဲးကွံာ် ယစ့ထၢၣ်ဒီး ဃ့ၢ်ကွံာ်လီၤႉ ဖဲအသ့ၣ် ညါက့ၤ၀ဲလၢ ယတထံၣ်တၢ်လၢ အမၤ၀ဲဒီး အ၀ဲဟဲက့ၤစိာ်က့ၤထၢၣ်ဆူယအိၣ်ဒီး တနၢၣ်ယၤလၢ အနိး – ထၢၣ်အိၣ်လၢအကိာ်ပူၤ‚ အမဲာ်ချံ ကွၢ်တၢ်ဆူအံၤဆူနုၤ‚ မၤ၀းအမဲၢ်‚ ထိၣ်ဂဲၤယၤ ဒ်သိး ယကလိာ်ကွဲဒီးအီၤအဂီၢ်လီၤႉ
မဲးစ် အတၢ်မၤကလံးကလးတၢ်တဖၣ် မၤနံၤမၤအ့ ယၤလီၤႉ လၢကျဲအဂၤတဘိ‚ မ့ၢ်တၢ်လၢ အဒုးသ့ၣ်နီၣ်ထီၣ် စ့ၢ်ကီးယၤလၢ ယတၢ်ဘၣ်ထွဲဒီး ပှၤဂုၤပှၤဂၤန့ၣ်လီၤႉ တလီၢ် လီၢ်‚ ယပာ်လီၤယသးလၢ ယကစူးကါ တၢ်ဆၢကတီၢ် ဃုာ်ဒီးယဟံၣ်ဖိဃီဖိ မ့တမ့ၢ် ယတံၤသကိးတဖၣ်လီၤႉ ဘၣ်ဆၣ် တၢ်ဂ့ၢ်အဂုၤအဂၤ‚ ဟံးထီၣ်ကွံာ် ယတၢ်ဆၢကတီၢ် ဒီးဖဲယသ့ၣ်ညါက့ၤ၀ဲ အကတီၢ်‚ မုၢ်နံၤတနံၤန့ၣ် လၢာ်ကွံာ်ဒီး တၢ်အဲၣ်တၢ်ကွံစ့ၢ်ကီး မ့ၢ်တၢ်လၢအဘၣ်တၢ်ပာ်တ့ၢ်ကွံာ်ဘၣ်လၢ တၢ်တမၤလၢပှဲၤဘၣ်အီၤန့ၣ်လီၤႉ
တၢ်သ့ၣ်ညါဘၣ် ပပၢ်လၢမူခိၣ်တခီ‚ မ့ၢ်ပၢ်လၢအစိဒိၣ်ကမီၤထီဒီး ကနၣ်ဃုာ် ပ၀ဲတဂၤစုာ်စုာ်လၢ ကျဲလၢအဘူးဘူးတံၢ်တံၢ်ကတၢၢ်အံၤ မ့ၢ်တၢ်လၢအမၤမုာ်ထီၣ်ပှၤ ဆံးဒိၣ်လဲၣ်ဒီး တုၤဒၣ်လဲၣ်လၢ အပၢၤဃာ်ပတၢ်သါထီၣ်သါလီၤလၢ ပပသိၣ်အပူၤ‚ လၢပသးသမူဒီတစိၤန့ၣ်လီၤႉ အ၀ဲအၢၣ်လီၤအပှၤဂီၢ်မုၢ် လၢ ‘‘ဒီးယမ့ၢ်အ၀ဲဒၣ် တုၤလီၤ သုသးပှၢ်‚ ဒီးတုၤသုခိၣ်၀ါ‚ ယကစိာ်သုလီၤႉ ယဲဒၣ်ယမၤတ့ၢ်‚ ဒီးယကစိာ်တၢ်‚ မ့ၢ်မး ယက၀ံတၢ်ယိးတၢ်‚ ဒီးယကမၤပူၤဖျဲးတၢ်လီၤ’’ (ယ့ှှါ ၄၆း၄) ႉ
ထီဘိ‚ ကစၢ်ယွၤ ဟ့ၣ်ဆၢကတီၢ်လၢပဂီၢ်န့ၣ်လီၤႉ အ၀ဲနၢ်ပၢၢ် ပတၢ်အိၣ်သး လီၤတံၢ်လီၤဆဲးကိးမံၤ‚ ကသဘံၣ်ဘုၣ် မ့တမ့ၢ် ကကီခဲထဲလဲၣ်အတွးတအိၣ်၀ဲ‚ ဒီး ဖဲလၢ ပမ့ၢ်ကိးထီၣ်အီၤလၢ တၢ်ထုကဖၣ်‚ အ၀ဲဒိကနၣ်ပှၤလီၤႉ ပတဘၣ်ဆၢထၢၣ်ရၠာစးဲၣ်လီၤသး နီတစုလၢ ပတၢ်အုၣ်က့ၤခီၣ်က့ၤ ကစၢ်လၢအအဲၣ်ပှၤ‚ အတၢ်အဲၣ်လၢ အကတၢၢ်ကတာ်တအိၣ်ဘၣ်န့ၣ်ဘၣ်ႉ