ယပာ်ထီၣ် ပနံာ်ရၠာစးိကျး လၢယသိလ့ၣ်အပူၤ ဒီးလၢတၢ်ပလီၢ်သူၣ်ပလီၢ်သး အပူၤ နီၣ်ဟးထီၣ်လၢ ယသိလ့ၣ်အိၣ်အလီၢ်န့ၣ်လီၤႉ သတူၢ်ကလာ် ပှၤပိာ်ခွါတဂၤ ဃ့ၢ်ခီကျဲ ဖဲဒၣ်ယမဲာ်ညါဖိဧိၤလီၤႉ အ၀ဲတထံၣ်ပာ်သူၣ်ပာ်သး ယတၢ်ဟဲန့ၣ်ဘၣ်ႉ ယယီၢ်တံၢ် နီၣ်ပတုာ်ချုးဒးဒးဖိန့ၣ်လီၤႉ အ၀ဲဖုးဘၣ်သး ဒီးကွၢ်ထီၣ်၀ဲ‚ ဒီးထံၣ် ယတၢ်ကွၢ်ထီဃာ်အီၤန့ၣ်လီၤႉ ဖဲန့ၣ်အကတီၢ်‚ ယသ့ၣ် ညါ လၢယအိၣ်ဒီးတၢ်ဃုထၢ လၢယကလံထီၣ် ယမဲာ်ချံ ဒီးပာ်ဖျါထီၣ် ယတၢ်သးတံာ်တာ်ဧါႉ မ့တမ့ၢ် ယကနံၤကမှံ ဒီးပျၢ်အီၤန့ၣ်ဧါလီၤႉ ယနံၤကမှံထီၣ်ယဲလီၤႉ
အတၢ်သူၣ်ကိၢ်သးဂီၤ ဖျါစၢ်လီၤ လၢအမဲာ်သၣ် လိၤ‚ ဒီးအနီၢ်ကစၢ်ဒၣ်၀ဲ နံၤကမှံထီၣ်၀ဲလၢတၢ်စံးဘျုး အပူၤန့ၣ်လီၤႉ
လံာ်တၢ်ကတိၤဒိ ၁၅း၁၃ စံး ‘‘တၢ်သးခုန့ၣ် မၤဂ့ၤထီၣ် ပှၤအမဲာ်လီၤႉ မ့မ့ၢ်တၢ်သူၣ်ကိၢ်သးဂီၤန့ၣ် မၤသူၣ်ကၢ်သးလီၤတၢ်လီၤ’’ႉ ပှၤကွဲးတၢ်မ့ၢ် အနဲၣ်ပှၤ လၢပကအိၣ်ဒီး တၢ်နံၤတၢ်အ့‚ မဲာ်ဆၢနါဆၢ ဖဲပဘၣ်သဂၢၢ် ဒီးတၢ်မၤတံာ်တာ်‚ တၢ်သးဟးဂီၤ ဒီးတၢ်တမုာ်တလၤကိးမံၤ လၢသးသမူ ဟဲစိာ်န့ၢ်ပှၤ အခါဧါႉ တမ့ၢ်လ့ၤတက့ၤဘၣ်ႉ ဆၢကတီၢ်အိၣ်၀ဲ လၢတၢ်ဟီၣ်တၢ်ယၢၤ‚ တၢ်သးအုး‚ ဒီးတၢ်သူၣ်ဒိၣ်သးဖျိးဒၣ်လဲာ် ဖဲတၢ်တတီတလိၤ အိၣ်၀ဲတဖၣ် အဂီၢ်လီၤႉ ဘၣ်ဆၣ် ကိးမုၢ်နံၤအကတီၢ်ဖိတဖၣ်အပူၤ‚ တၢ်နံၤကမှံဖိတဖီးန့ၣ် ဟ့ၣ်ထီၣ်၀ဲ တၢ်မၤကဆှၣ်လီၤႉ တၢ်မုၢ်လၢ်‚ ဒီးတၢ်ဘျုးတၢ်ဖှိၣ်လၢပလိၣ်ဘၣ် ဒ်သိးပလဲဲၤဆူညါကသ့အဂီၢ်န့ၣ်လီၤႉ
ဘၣ်သ့ၣ်သ့ၣ် တၢ်ကတိၤဒိအံၤ အခီပညီကမ့ၢ်၀ဲ တၢ်နံၤကမှံန့ၣ် ဟဲအိၣ်ထီၣ် အတၢ်ဒၣ်၀ဲလၢ တၢ်မၤအသးလၢပသးအကံၢ်အလဲအပူၤန့ၣ်လီၤႉ သးလၢအခုန့ၣ် အိၣ်ဒီးတၢ်မုာ်တၢ်ဖိး‚ တၢ်သးမံ‚ ဒီးဟ့ၣ်ထီၣ်ယွၤ အတၢ်အဂ့ၤကတၢၢ်န့ၣ်လီၤႉ ပမ့ၢ်အိၣ်ဒီးသးဒ်သိးအံၤ လၢအခုလၢအကံၢ်ပူၤ ဒီးဖျါတုၤအချၢန့ၣ်‚ ပခီၣ်ဆၢက့ၤ တၢ်အိၣ်အသး မၤအသးတဖၣ် လၢတၢ်နံၤကမှံနီၢ်နီၢ်ကသ့၀ဲ‚ ဒီးကွဲမုာ်ပှၤဂၤ လၢအကတူၢ်လိာ်တၢ်မုၢ်လၢ်ဒီးတၢ်ဃူတၢ်ဖိး လၢယွၤန့ၣ်လီၤႉ