ဖဲယကဲသီပှၤစူၢ်က့ၤနာ်က့ၤ ယ့ၣ်။းခရၠာစးံာ်အခါ‚ ပှၤဟ့ၣ်ကူၣ်တၢ်လၢသူၣ်ဂ့ၢ်သးကျိၤ တဂၤ ဟ့ၣ်ဂံၢ်ဟ့ၣ်ဘါယၤ လၢယကပာ်တနံၤဘၣ်တနံၤ အတၢ်ကွဲးစံးဘျုးနၤ န့ၣ်လီၤႉ ယစိာ်လံာ်ဆံးဖိတဘ့ၣ်ဒီးယၤ ဖဲယလဲၤတပူၤလၢ်လၢ်န့ၣ်လီၤႉ တဘျီဘျီ‚ ယကွဲးနီၣ် တၢ်စံးဘျုးတဘျီဃီလီၤႉ ဆၢကတီၢ်အဂၤ‚ ယကွဲး ဖဲနွံအကတၢၢ် ဖဲယဆိကမိၣ်သမံသမိးက့ၤအကတီၢ်န့ၣ်လီၤႉ
တၢ်ကွဲးလီၤ တၢ်စံးဘျုးတဖၣ်န့ၣ် မ့ၢ်လုၢ်လၢ် လၢအဂ့ၤတမံၤ‚ ဒီးယဆိကမိၣ် လၢယကဒုးအိၣ်ထီၣ်က့ၤ ကဒီးအီၤ လၢယတၢ်အိၣ်မူအပူၤန့ၣ်လီၤႉ တၢ်အံၤ ကမၤစၢၤယၤ ဒ်သိးယကသ့ၣ်နီၣ်ပာ်သး ယွၤအတၢ်အိၣ် ဒီးယၤ‚ ဒီးစံးဘျုးက့ၤအီၤ လၢအတၢ်လုၢ်အီၣ်လုၢ်အီ ဒီးအတၢ်အံးကွၢ် အဂီၢ်လီၤႉ
ထါစံးထီၣ်ပ့တၢၤတဖၣ်အကျါ ထါအဖုၣ်ကတၢၢ် လၢအမ့ၢ်ထါစံးထီၣ်ပ့တၢၤ ၁၁၇ အပူၤ‚ ပှၤကွဲးထါ သဆၣ်ထီၣ်ပှၤကိးဂၤဒဲး လၢ ကစံးထီၣ်ပ့တၢၤကစၢ်ယွၤ‚ မ့ၢ်လၢ ‘‘အဘျုးအဖှိၣ်အိၣ်လၢပဖီခိၣ်ဒိၣ်မး’’ (း၂) အဃိန့ၣ်လီၤႉ
ဆိကမိၣ်တၢ်အံၤတက့ၢ်ႉ ကစၢ်ယွၤပာ်ဖျါတ့ၢ်အတၢ်အဲၣ်လၢနၤ တနံၣ်အံၤ‚ တနွံအံၤ‚ တလါအံၤ‚ ဒီးတနံၤအံၤ ဒ်လဲၣ်ႉ ဃုကွၢ်ထဲတၢ်လီၤလး တဖၣ်တဂ့ၤႉအတၢ်အဲၣ်န့ၣ်‚ ပထံၣ်န့ၢ်အီၤသ့ လၢသးသမူအတၢ်မၤအသး မုၢ်ဆ့ၣ်မုၢ်ဂီၤ ကိးနံၤဒဲး အပူၤန့ၣ်လီၤႉ အန့ၣ်၀ံၤ ဒီးကွၢ်ဆိကမိၣ် အ၀ဲပာ်ဖျါတ့ၢ် အတၢ်အဲၣ်လၢနဟံၣ်ဖိဃီဖိ‚ နတၢ်အိၣ်ဖှိၣ်ဒီး ပှၤဂုၤပှၤဂၤတဖၣ်ဒ်လဲၣ်ႉ ပျဲနသး ဟံးန့ၢ်လၢာ်လၢာ်ဆ့ဆ့ ယွၤအတၢ်အဲၣ်အဒိၣ်အယိာ် လၢပ၀ဲခဲလၢာ်အဂီၢ်တက့ၢ်ႉ
ပှၤကွဲးထါအံၤ စံးကဒီးဆူညါ ‘‘ယွၤအတၢ်မ့ၢ်တၢ်တီ အိၣ်၀ဲဆိး၀ဲ လီၤထူ လီၤယိာ်လီၤ’’ (း၂) ႉ ပမ့ၢ်စံးလၢတၢ်ကတိၤအဂၤ‚ အ၀ဲကအဲၣ်ဒံးပှၤ ဆူညါလီၤႉ အဃိ ဆူညါပကမၤန့ၢ်ဒံးတၢ်အါမံၤ လၢပကစံးထီၣ်ပ့တၢၤဘၣ်ယွၤ လၢအဃိတဖၣ်‚ လၢနံၤလၢကဟဲတဖၣ်အပူၤန့ၣ်လီၤႉ ဒ်ဖိလၢအဘၣ် တၢ်အဲၣ်ဒိၣ်မးတဖၣ်အသိး‚ မ်တၢ်စံးထီၣ်ပ့တၢၤ ဒီးတၢ်စံးဘျုးက့ၤယွၤ ကအိၣ်ဖျါလီၤဆီ လၢပတၢ်အိၣ်မူ အပူၤတက့ၢ်ႉ