ယမိၢ်စူးကွံာ်သး ပူၤကွံာ်ခံလါအလီၢ်ခံ‚ တချုးခရၠာစးံာ်အိၣ်ဖျဲၣ်ဆၢက့ၤ အလီၢ်တနွံန့ၣ်‚ ယသးပူၤအိၣ်ဒီးတၢ်ရၠာစးဲၣ်တၢ်ကျဲၤ လၢယကဟးကသုၣ်ကသီ လဲၤပရၤတၢ်လၢတၢ်မၤဃံ မၤလၤဟံၣ်အပိးအလီတဖၣ်လီၤႉ ယဂ့ၢ်လိာ် ယ၀ၤအတၢ်ကျဲးစၢးမၤမုာ်ယသး ဖဲတၢ်သးအုးလီၤဘၣ်ပှၤ လၢပဒူၣ်ဖိထၢဖိအပူၤ မိၢ်လၢအပှဲၤဒီးတၢ်စူၢ်တၢ်နာ်တဂၤ လီၤမၢ်အဃိန့ၣ်လီၤႉ ယသးအုးထီၣ်ဖဲယဖိခွါစၤဘံယၢၢ် ထုးထီၣ်စၢၢ်လီၤ ခရၠာစးံာ်အိၣ်ဖျဲၣ်မ့ၣ်အူသၣ်ဖိတဖၣ်အပျံၤ လၢပဟံၣ်ပူၤ တၢ်ဒူၣ်လိၤအခါန့ၣ်လီၤႉ အ၀ဲတတဲတၢ်နီတမံၤဘၣ်ႉ တချုးလၢအဒီဖိပၢ်ခံဂၤလဲၤတၢ်မၤန့ၣ် ဆဲးကပီၤတ့ၢ်၀ဲ မ့ၣ်အူသၣ်ဖိတဖၣ်န့ၣ်လီၤႉ
ဖဲမ့ၣ်အူသၣ်ဖိတဖၣ် ကပီၤထီၣ် ပံာ်လ့ပံာ်လ့အခါ‚ ကစၢ်ယွၤမိၤထီၣ်ယၤ ကပုာ်လုးဖိ လၢယတၢ်ခံးတၢ်နၤ အပူၤန့ၣ်လီၤႉ တၢ်အိၣ်အသးမၤအသး ဘၣ်ဒိဘၣ်ထံးယၤ
ထဲလဲၣ်ဂ့ၤထဲလဲၣ်ဂ့ၤ ယတၢ်မုၢ်လၢ်အိၣ်ကျၢၤဒံး၀ဲ လၢကစၢ်ယွၤ အတၢ်မ့ၢ်တၢ်တီတၢ်ကပီၤအပူၤ ဒီးလီၣ်ဖျါထီၣ်အသး တဘိယူၢ်ဃီ လၢကစၢ်ယွၤန့ၣ် တၢ်ဆီတလဲတအိၣ်ဘၣ်ဒီးအီၤအဂ့ၢ်န့ၣ်လီၤႉ
ထါစံးထီၣ်ပ့တၢၤ ၁၄၆ မၤဂၢၢ်မၤကျၢၤ ကစၢ်ယွၤ အတၢ်မၤသ့ၣ်နီၣ်ထီၣ်ယၤ လၢမုၢ်ဂီၤအံၤန့ၣ်လီၤႉ ယတၢ်မုၢ်လၢ်လၢအကတၢၢ်တအိၣ်ဘၣ်န့ၣ် ယပာ်လၢ ကစၢ်ယွၤ အပူၤ‚ အ၀ဲမ့ၢ်ပှၤမၤစၢၤယၤ‚ သ့တၢ်လၢာ်‚ သူၣ်ကညီၤသးကညီၤတၢ်ယကစၢ်ယွၤန့ၣ် လီၤ (း၅) ႉ ဒ်အမ့ၢ်၀ဲတၢ်ဘၣ်တ့ခဲလၢာ် အကစၢ်အသိး‚ တီ၀ဲလိၤ၀ဲတဘိယူၢ်ဃီလီၤ (း၆) ႉ ဒီဒၣ်အိၣ်ပှိၤ ပှၤဘၣ်တၢ်မၤအၢမၤနးအီၤအကွီၢ်‚ ကဟုကယာ်ဒီးကတဲာ်ကတီၤတၢ် လၢပဂီၢ်လီၤ (း၇) ႉ ယွၤဒုးဆၢထၢၣ်ပှၤဘၣ်တၢ်ဆီၣ်လီၤအီၤ (း၈) လီၤႉ ကစၢ်ယွၤအံးက့ၤ ကွၢ်က့ၤပှၤ‚ မၤစၢၤပှၤ ဒီးအ၀ဲကဲစီၤပၤအစိၤစိၤအဃၣ်ဃၣ်လီၤ (း၉-၁၀) ႉ
တဘျီဘျီန့ၣ် ခရၠာစးံာ်အိၣ်ဖျဲၣ်ဆၢက့ၤအကတီၢ်န့ၣ်‚ ပမုၢ်နံၤတဖၣ် ပှဲၤဒီးတၢ်သးခု ‚ တဘျီဘျီပကအိၣ်ဒီး တၢ်လီၤမၢ်‚ လဲၤခီဖျိတၢ်ဘၣ်ဒိဘၣ်ထံးဒီး တၢ်အိၣ်ဘၣ် ထဲတဂၤဧိၤလီၤႉ ဘၣ်ဆၣ်ဒီး ကိးအကတီၢ်ဒဲးအပူၤ ကစၢ်ယွၤအၢၣ်လီၤအီလီၤ၀ဲလၢ ကမ့ၢ်ပတၢ်ကပီၤ‚ လၢတၢ်ခံးတၢ်နၤအပူၤ‚ ဟ့ၣ်ပှၤတၢ်မၤစၢၤ လၢပထံၣ်ဘၣ်ပလၢၢ်ဘၣ်သ့ဃုာ်ဒီး တၢ်မုၢ်လၢ်အထူအယိာ်လီၤႉ