ဒ်ယသးပှၢ်ထီၣ်အသိး ယပာ်သူၣ်ပာ်သး လၢယစုဆၢခီၣ်ဆၢတဖၣ်ဆါထီၣ်‚ လီၤဆီဒၣ် တၢ်ဖဲတၢ်ခုၣ်ဘၣ်အဆၢကတီၢ်န့ၣ်လီၤႉ မုၢ်နံၤတနီၤနီၤ ယသးပူၤလီၤဂာ်ဒ်ယဘၣ် တၢ်မၤနၢၤယၤ အါန့ၢ်ဒံး ယကဲပှၤမၤနၢၤတၢ်တက့ၢ် မ့ၢ်တၢ်လၢအတၤပှၤ ဖဲယကဲထီၣ် ပှၤသးပှၢ်တဂၤအဃိန့ၣ်လီၤႉ
တၢ်မၤသးဒ်န့ၣ်ဒီး‚ ပှၤလၢအသးပှၢ်န့ၢ်ယၤ စီၤကၤလ့း တဂၤ ကဲထီၣ် ယပှၤဒူပှၤဃိၤန့ၣ်လီၤႉ အ၀ဲမ့ၢ် ပှၤလဲၤကွၢ်ဟုၣ်ကွၢ်စုးတၢ် လၢစီၤမိၤဒီးဆှၢလီၤအီၤဆူ ကီၢ်ကနၤဧၣ်‚ ကီၢ်တၢ်စံးပာ်အပူၤန့ၣ်လီၤ (၄ မိၤ ၁၃-၁၄) ႉ ဖဲပှၤလဲၤကွၢ်ဟုၣ် ကွၢ်စုးတၢ်အဂၤ ဟဲက့ၤတဲတၢ်ကစီၣ် အတမုာ်၀ံၤန့ၣ်‚ ထဲစီၤကၤလ့းဒီးစီၤယိၤ။ခံဂၤဧိၤ လၢပှၤလဲၤတၢ် ၁၂ ဂၤအကျါန့ၣ် န့ၢ်ဘၣ် ယွၤအဘျုး အဖှိၣ် လၢအကလဲၤနုာ်ဆူ ကီၢ်ကနၤဧၣ်အပူၤန့ၣ်လီၤႉ ခဲအံၤလၢလံာ် ၄ မိၤ ၁၄ အပူၤန့ၣ်‚ အဆၢကတီၢ် တုၤဃီၤလၢစီၤကၤလ့းကဟံးအတၢ်န့ၢ်သါ လၢကီၢ်တဘ့ၣ်အံၤအပူၤလီၤႉ ဘၣ်ဆၣ်ဒီးဒုၣ်ဒါ အိၣ်ဒံး၀ဲလၢ ကဘၣ်နီၣ်ထုးထီၣ်ကွံာ်၀ဲ အဂီၢ်လီၤႉ စီၤကၤလ့းတခီ ကအိၣ်ဘှံးဒၣ်၀ဲမုာ်မုာ် ဒီးပာ်တ့ၢ်တၢ်ဒုးတၢ်ယၤ လၢစၢၤမူသီတဖၣ် အစုပူၤန့ၣ် အိၣ်တကဲဘၣ်အဃိ‚ ကိးသBတီထီၣ်၀ဲ လၢစီၤယိၤ။ ဒီးစံး‚ နနီၢ်ကစၢ်ဒၣ်၀ဲ နဲနနၢ်ဟူလၢပှၤဧနးဖိ အိၣ်ဖဲန့ၣ် ဒီး၀့ၢ်တဖၣ်န့ၣ် ဒိၣ်၀ဲဒီးအိၣ်ဒီး အခိၣ်ဒူန့ၣ်လီၤႉ ယွၤမ့ၢ်အိၣ်ဒီးယၤဒီး‚ ယကဟီထီၣ်ကွံာ်အီၤ‚ ဒ်ယွၤစံး၀ဲအသိးန့ၣ်လီၤ (ယိၤ။ ၁၄း၁၂) ႉ
တၢ်ကတိၤ‚ ‘ယွၤမ့ၢ်အိၣ်ဒီးယၤ’ ပာ်ဖျါထီၣ် စီၤကၤလ့းအတၢ်ပာ်လီၤအသးလၢ ကဒုးတၢ်သပှၢ်တၢၢ်လီၤႉ အ၀ဲအိၣ်ဒီးတၢ်ထံၣ်တီလၢ ကစၢ်ယွၤအစိကမီၤဖီခိၣ်‚ တမ့ၢ် အနီၢ်ကစၢ်ဒၣ်၀ဲဘၣ်ႉ တမ့ၢ်စ့ၢ်ကီးလၢအသးအနံၣ်အလါအါထီၣ် အဃိဘၣ်ႉ ကစၢ်ယွၤ ကမၤစၢၤအီၤ လၢကယဲၢ်တၢ်လၢအကဘၣ်မၤ၀ဲ တုၤအကဲထီၣ်လိၣ်ထီၣ်တစုန့ၣ်လီၤႉ
ဖဲပသးပှၢ်ထီၣ် ပ၀ဲအါဂၤ ပတဆိကမိၣ်ပကဟံးထီၣ်ဖီၣ်ထီၣ် တၢ်မၤဒိၣ်ဒိၣ်မုၢ်မုၢ် တဖၣ်ဘၣ်ႉ ဘၣ်ဆၣ်ဒီး ပသးမ့ၢ်ပှၢ်ထဲလဲၣ်ထဲလဲၣ် ပမၤတၢ်ဒိၣ်ဒိၣ်မုၢ်မုၢ်လၢ ကစၢ်ယွၤ အဂီၢ်သ့၀ဲလီၤႉ ဖဲတၢ်မၤဒိၣ်ထဲသိး စီၤကၤလ့းတုၤအိၣ်လီၤဘၣ်ပှၤန့ၣ်‚ ပမဲာ်ဆှး‚ ပပျံၤ တၢ်အလီၢ်တအိၣ်ဘၣ်ႉ ကစၢ်ယွၤ မၤစၢၤပှၤဒီး ပမၤန့ၢ်မၤနၢၤတၢ်သ့၀ဲလီၤႉ