ဟံၣ်ဖိဃီဖိအဒူၣ် ၂၃၀ ဒီး ပှၤတဂၤဘၣ်တဂၤ အိၣ်၀ဲဒၣ်ဖဲ မဲး ဖၣ်စဲၣ် အတၤသၣ်လီၢ်‚ ဖဲ ယအိၣ် ဖဲ ဘလီး ၃၂ အကပၤန့ၣ်လီၤႉ ပှၤတဂၤစုာ်စုာ်န့ၣ် အိၣ်ဒီး အသးသမူ တၢ်လဲၤခီဖျိဒၣ်၀ဲလီၤႉ ဖဲအကထၢတဆံန့ၣ် သးပှၢ်မုၣ်လၢ အဖိတဖၣ် အနီၢ်ဒိၣ်လံဒီး ထီၣ်ပှၢ်လီၤဖး ဟးအိၣ်လၢ တၢ်လီၢ်ယံၤလံအဃိ အိၣ်ဆိးထဲတဂၤန့ၣ် အိၣ်၀ဲလီၤႉ ခဲအံၤ အ၀ဲအိၣ်ဒၣ်တဂၤလီၤႉ ဒီးလၢ အဘးခီစှၤဒၢးန့ၣ် သးစၢ်နီၢ်ဒီမိ၀ၤ အိၣ်ခံဂၤ အိၣ်ဒီးအဖိဆံးဖိခံဂၤ‚ ပိာ်ခွါဖိတဂၤ ပိာ်မုၣ်ဖိတဂၤန့ၣ်လီၤႉ ဒီးလၢတၢ်ဖီလာ်စှၤကထၢန့ၣ် ပှၤသးစၢ် လၢအမၤသုးဖိတၢ်မၤ အိၣ်၀ဲတဂၤလီၤႉ လၢအပူၤ ကွံာ်န့ၣ်‚ ပှၤသးစၢ်အံၤလဲၤဆူတၢ်ဘါသရၠာစးိာ်‚ ဒီးခရၠာစးံာ်အိၣ်ဖျဲၣ် ခဲကိာ်န့ၣ် ကလဲၤဒံး၀ဲဒံးလီၤႉ ဖဲအပူၤကွံာ် ခရၠာစးံာ်အိၣ်ဖျဲၣ်အခါ ဖဲပတၢ်အိၣ်ဖှိၣ်ဖိတဖၣ် လဲၤဟးဆၢဂ့ၤဆၢ၀ါ ခရၠာစးံာ်အိၣ်ဖျဲၣ် အတၢ်ဆၢဂ့ၤအခါ ယထံၣ်လိာ်ယသးဒီးပှၤတဖၣ်အံၤလီၤႉ
ခရၠာစးံာ်အိၣ်ဖျဲၣ်မူးကိးဘျီဒဲးန့ၣ် ဒ်သိးဒၣ်လၢ ခရၠာစးံာ်ဟဲအိၣ်ဖျဲၣ်ထီၣ်အခါအသိးလီၤႉ ပှၤအိၣ်၀ဲအါဂၤလၢ အတသ့ၣ်ညါ၀ဲလၢ ကစၢ်ယွၤ ဟဲဆူပဟီၣ်ခိၣ်ချၢအံၤ ဒ်ဖိသၣ်ဆံးဖိယ့ၣ်။းလီၤအဂ့ၢ်န့ၣ်ဘၣ်လီၤ (လူၤ ၁း၆၈‚ ၂း၂၀) ႉ မ့တမ့ၢ်‚ အ၀ဲသ့ၣ်တသ့ၣ်ညါဘၣ်ဃး ခရၠာစးံာ်အိၣ်ဖျဲၣ်ထီၣ်အဂ့ၢ်လၢ အမ့ၢ်တၢ်အကါဒိၣ်‚ မ့ၢ်တၢ်သးခုကစီၣ်ဖးဒိၣ်လၢ ပှၤဟီၣ်ခိၣ်ဖိအဂီၢ်န့ၣ်ဘၣ်လီၤ’’ (၂း၁၀) ႉ မ့ၢ်လီၤ‚ ပှၤခဲလၢာ်အဂီၢ်လီၤႉႉႉ ပှၤကလုာ်မနုၤဂ့ၤမနုၤဂ့ၤ‚ မုၣ်ဂ့ၤခွါဂ့ၤ‚ ထူးတီၤဂ့ၤဖှီၣ်ယာ်ဂ့ၤ‚ ယ့ၣ်။းဟဲ၀ဲလၢ ကတူၢ်သံသး လၢပဂီၢ်‚ ဟ့ၣ်ပှၤတၢ်ပျၢ်တၢ်ပကမၣ်အလၢအပှဲၤ အဃိ ပအိၣ်ဃူအိၣ်ဖိးဘၣ်က့ၤဒီး ယွၤအနီၢ်ကစၢ် ဒီးဒိးန့ၢ်က့ၤယွၤအတၢ်အဲၣ်‚ အတၢ်သးခု‚ တၢ်ဃူတၢ်ဖိး ဒီး တၢ်မုၢ်လၢ်န့ၣ်လီၤႉ ပှၤခဲလၢာ်‚ သးပှၢ်မုၣ်လၢဘးခီးဒၢး တုၤလၢပတံၤသကိးတဖၣ် လၢပအီၣ်သကိးတၢ်ဒ်သိးသိးတဖၣ် လိၣ်ဘၣ်လၢ ကနၢ်ဟူဘၣ် တၢ်ကစီၣ်လီၤလးအံၤ န့ၣ်လီၤႉ
ဖဲခရၠာစးံာ်အိၣ်ဖျဲၣ်အခီၣ်ထံးကတၢၢ်တဘျီအခါ ကလူးတဖၣ်န့ၣ် မ့ၢ်ပှၤလၢ အဟဲစိာ် တၢ်သးခုဖးဒိၣ်အကစီၣ်အံၤလီၤႉ တနံၤအံၤ‚ ကစၢ်ယွၤအဲၣ်ဒိးမၤတၢ် ခီဖျိပ၀ဲလၢပကဆှၢတၢ်ကစီၣ်အံၤဆူ ပှၤဂၤအအိၣ်လီၤႉ