ယပၢ်တ့ထီၣ်၀ဲထၢၣ်၀ံ လၢပှၤက၀ံပျၢ်အဂီၢ်နှၣ်လီၤႉ အ၀ဲကူးနှၢ်၀ဲ တၢ်မံၤလၢ်အဂီၤ လၢအဘၣ်တၢ်မၤအီၤ လၢတၢ်ဖိတၢ်လံၤအဖံးတဖၣ် တချုးအဆး၀ဲဒ်သိးသိးနှၣ်လီၤႉ တဘျီဖဲယလဲၤဟးဆူအအိၣ်အခါ‚ ယကွၢ်ကီအ၀ဲတ့တၢ်အံၤလီၤႉ ဒ်သိးကမၤနှၢ်၀ဲ တၢ်ကံးညာ်အကလုာ်ကလုာ်အဂီၢ်‚ အစုဖိတဖၣ်ပှဲၤ၀ဲ ဒီးတၢ်ပလီၢ်သး ဖဲဆီၣ်လီၤ ဃဲၢ်ဖိ လၢအ့ၣ်၀ဲမးတဘ့ၣ် လၢတၢ်ဖံးညာ်အဖီခိၣ် နှၣ်လီၤႉ ၀ံၤဒၢး စုၣ်လီၤ၀ဲတၢ်ကံးညာ်ဖိတက့လၢ တၢ်အလွဲၢ်ဂီၤ ဆှုၣ်ကလာ်အပူၤ‚ ဖှူဘၢ၀ဲတၢ်ကံးညာ်အံၤ လၢထိၣ်ဒံးဖိ‚ ဒီးမၤဂ့ၤထီၣ်၀ါထီၣ်၀ဲ အတၢ်ဘၣ်တ့ဖိနှၣ်လီၤႉ
ဖဲယဆိကမိၣ်ဒိၣ် ယပၢ်အစုသ့ တၢ်ဖံးတၢ်မၤ တမံၤ အံၤ အဆၢကတီၢ်‚ ယသ့ၣ်ညါလီၤယသး လၢအါစုအါဘျီ ယလီၤတိၢ် လၢယကပာ်လုၢ်ပာ်ပရၤ စံးဘျုးစံးထီၣ်ပ့တၢၤ ယပၢ်အိၣ်လၢမူခိၣ်တဂၤ အတၢ်ဘၣ်တ့တဖၣ် လၢအအိၣ် ဖျါထီၣ် လၢပှၤဂၤ‚ ဒီးလၢယၤဒၣ်လဲာ်နှၣ်လီၤႉ ဖဲယဆိကမိၣ်ထီၣ် ကစၢ်ယွၤအတၢ် ဘၣ်တ့ လီၤလးတဖၣ်အခါ‚ ယသ့ၣ်နီၣ်ထီၣ်စီၤပၤဒၤ၀ံး အၢၣ်လီၤအီလီၤ၀ဲ လၢယွၤတ့လီၤ ပ‘‘ကလ့ၢ်တဖၣ်’’ ဒီးပဘၣ်တၢ်တ့ပှၤ ‘‘လီၤပျံၤလီၤဖုး‚ လီၤကမၢကမၣ်’’ နှၣ်လီၤ (စံး ၁၃၉း ၁၃-၁၄) ႉ
ပစံးထီၣ်ပ့တၢၤယွၤပကစၢ် လၢအတ့လီၤပှၤတဂၤသ့၀ဲလီၤတံၢ် မ့ၢ်လၢပသ့ၣ်ညါဘၣ် လၢ ‘‘အတၢ်ဖံးတၢ်မၤတဖၣ်နှၣ်လီၤကမၢကမၣ်’’ အဃိနှၣ်လီၤ (း၁၄) ႉ ဒီးပဒိးနှၢ်သးအဂံၢ်အဘါ လၢပကပာ်လုၢ်ပာ်ပရၤလီၤပသး ဒီးပှၤဂၤတဖၣ်‚ အါနှၢ်ဒံးအလီၢ်‚ လီၤဆီဒၣ်တၢ်ဖဲပသ့ၣ်နီၣ်ထီၣ် တၢ်ဘၣ်တ့ခဲလၢာ်အကစၢ်တဂၤအံၤ သ့ၣ်ညါ တၢ်အိၣ်လၢပသး ဒီးပနီၢ်ခိခဲလၢာ်‚ ဒီးကတဲာ်ကတီၤပာ် ‘‘ပမုၢ်နံၤတဖၣ် လၢအကကဲ ထီၣ် ဒီးတအိၣ်ဒံးဘၣ်နီတနံၤ’’ (း၁၅-၁၆) အခါနှၣ်လီၤႉ
ဒ်တၢ်ဖံးအတၢ်ကံးညာ်ဖိ လၢအဘၣ်တၢ်တ့အီၤ လၢယပၢ်အစုသ့တၢ်အသိး‚ ပ၀ဲတဖၣ်အံၤ ပဃံ၀ဲလၤ၀ဲဒီးလုၢ်ဒိၣ်ပရၤဒိၣ်၀ဲ မ့ၢ်လၢပမ့ၢ်ထဲတမံၤ ယွၤတၢ်ဘၣ်တ့တဖၣ် အဃိသတးနှၣ်လီၤႉ ကစၢ်ယွၤတ့ပ၀ဲကိးဂၤ တဂၤဒီးတဂၤ လီၤလီၤဆီဆီ‚ ဒီးအိၣ် ဒီးတၢ်ပညိၣ် လၢပကကဲထီၣ်အတၢ်ဘၣ်တ့ လၢအဲၣ်၀ဲတဖၣ် လၢအလီၣ်ဖျါထီၣ်သကိး ယွၤအတၢ်ကဟုကညီၢ်နှၣ်လီၤႉ