မၣ်ရၠာစးံၣ်လ့ ဘၣ်ဆူးဘၣ်ဆါ၀ဲအါနွံအါသီ‚ ဒီးပှၤဟဲဟ့ၣ်ဂံၢ်ဟ့ၣ်ဘါအီၤအါဒံအါဂၤ ဖဲအဘၣ်ကွၢ်ဆၢၣ်မဲာ် တၢ်ဆၢကတီၢ်ကီခဲအံၤအခါနှၣ်လီၤႉ မ့ၢ်ယကဘၣ် ဟ့ၣ် ဆၢက့ၤပှၤတဖၣ်အံၤ အတၢ်အဲၣ်တၢ်သူၣ်အိၣ်သးအိၣ်ယၤဒ်လဲၣ်ႉ အ၀ဲဘၣ်ယိၣ်၀ဲ ဒၣ်လီၤႉ ဘၣ်တနံၤ အ၀ဲဖးဘၣ်၀ဲတၢ်ထုကဖၣ်လံာ်ဖိတကျိၤလၢအစံး၀ဲ‚ ‘‘ထုကဖၣ် လၢပှၤဂၤကမၤအါထီၣ် တၢ်ဆီၣ်လီၤသး‚ ပျဲအ၀ဲသ့ၣ် လၢကမၤစၢၤပှၤဂၤ‚ ဒီးတူၢ်လိာ်တၢ်မၤစၢၤလၢပှၤဂၤအိၣ် တက့ၢ်ႉ’’ ဖဲနှၣ်အ၀ဲနၢ်ပၢၢ်ထီၣ်၀ဲဒၣ် လၢတလိၣ်နီၣ်ထိၣ်လၢအ၀ဲကထိၣ်ဒွးထီၣ်တၢ်သ့ၣ်တဖၣ်အံၤဘၣ်ႉ လိၣ်ဒၣ် လၢ အ၀ဲကအိၣ်ဒီးသး လၢအစံးဘျုးဆၢက့ၤတၢ်‚ ဒီးပျဲပှၤဂၤဒိးနှၢ် တၢ်သးခုသးမုာ် ခီဖျိမၤစၢၤဘၣ်ပှၤဂၤနှၣ် လီၤႉ
ဖဲလံာ်ဖံလံးပံၤ ၄ နှၣ် စီၤပီလူးပာ်ဖျါထီၣ်၀ဲ အတၢ်စံးဘျုး ဆူ ပှၤတဖၣ်လၢအမၤစၢၤအီၤ‚ ‘‘လၢ (အ) တၢ်နးတၢ်ဖှီၣ်အပူၤ’’ နှၣ်လီၤ (း၁၄) ႉ အ၀ဲသနှၤအသး လၢပှၤလၢအမၤစၢၤဆီၣ်ထွဲအီၤတဖၣ် ဖဲအ၀ဲစံၣ်တဲၤတဲလီၤတၢ် ဒီးစိာ်တၢ်သးခုကစီၣ်အခါနှၣ်လီၤႉ အ၀ဲသ့ၣ်ညါ နၢ်ပၢၢ်၀ဲ ဒၣ်လၢတၢ်ဟ့ၣ်တဖၣ် လၢအဒိးနှၢ်ဘၣ်၀ဲ ဖဲအ၀ဲလိၣ်ဘၣ်တၢ်မၤစၢၤအခါအံၤ မ့ၢ်ဒၣ်ပှၤကညီတဖၣ် အတၢ်အဲၣ် လၢယွၤအဂီၢ် နှၣ်လီၤႉ ‘‘ (သုတၢ်ဟ့ၣ်တဖၣ်) မ့ၢ်တၢ်နၢမူ လၢအဘၣ်ယွၤအသးနှၣ်လီၤႉ’’ (း၁၈) ႉ
ညီနုၢ်နမ့မ့ၢ်ပှၤအဆိကတၢၢ်တဂၤ လၢအမၤစၢၤပှၤဂၤနှၣ်‚ နကတူၢ်လိာ် တၢ်မၤစၢၤ လၢပှၤဂၤအအိၣ်နှၣ်တမ့ၢ်တၢ်လၢအညီဘၣ်ႉ ဘၣ်ဆၣ်‚ လၢတၢ်ဆီၣ်လီၤသးအပူၤ‚ ဖဲပလိၣ်ဘၣ်တၢ်မၤစၢၤအခါ ပပျဲၤယွၤမၤစၢၤပှၤ ခီဖျိကျဲအဂၤတဖၣ် သ့၀ဲဒၣ် လီၤႉ
စီၤပီလူးကွဲး၀ဲ‚ ‘‘‚ကစၢ်ကဟ့ၣ်လီၤသု ကယဲၢ်တၢ်လၢသုနှၢ်ဘၣ်အီၤ အလီၢ်အိၣ် တဖၣ်နှၣ်လီၤ’’ (း၁၉) ႉ တၢ်အံၤ မ့ၢ်၀ဲဒၣ်တၢ်တခါ လၢစီၤပီလူးမၤလိ နှၢ်၀ဲ ဖဲအဘၣ်ကွၢ်ဆၢၣ်မဲာ်တၢ်နးတၢ်ဖှီၣ်အခါနှၣ်လီၤႉ ကစၢ်ယွၤနှၣ်တီ၀ဲလိၤ၀ဲ‚ ဒီးအတၢ်ဆိၣ်ဂ့ၤလၢပဂီၢ်နှၣ် အကတၢၢ်တအိၣ်ဘၣ်ႉ