ယ၀ၤမၤဘၣ်၀ဲ အနံၤအိၣ်ဖျဲၣ်ဆၢက့ၤအမုၢ်နံၤနှၣ်လီၤႉ ယဆိကမိၣ်ထီၣ် တၢ်အဂ့ၤ ကတၢၢ် လၢယကမၤတၢ် လၢအ၀ဲအနံၤအိၣ်ဖျဲၣ်ဆၢက့ၤအဂီၢ်လီၤႉ ယတဲသကိးတၢ်ဒီး ယဖိတဖၣ် ဒ်သိးပကမၤဘၣ်တၢ်အဂ့ၤကတၢၢ်လၢအပၢ်အဂီၢ်‚ ဒီးဒ်သိး အ၀ဲသ့ၣ်ကမၤစၢၤ၀ဲယၤအဂီၢ်နှၣ်လီၤႉ ယသးအိၣ်လၢတၢ်အံၤကပာ်ဖျါထီၣ် ယ၀ၤတဂၤအံၤ မ့ၢ်ပှၤလုၢ်ဒိၣ်ပရၤဒိၣ်တဂၤ လၢပဟံၣ်အဂီၢ်‚ ဒီးနံၣ် လၢကဟဲ ခါဆူညါ အတၢ်ကါဒိၣ်နှၣ်လီၤႉ ယအဲၣ်ဒိးလၢပတၢ်ဟ့ၣ်အံၤ ကမ့ၢ်၀ဲ တၢ်အကါဒိၣ် လၢအ၀ဲပၢၤဃာ်၀ဲ လၢအတၢ်အိၣ် မူအပူၤ နှၣ်လီၤႉ
စီၤပၤစီၤရၠာစးှလိၤမိၤ အဲၣ်ဒိးဟ့ၣ် ကစၢ်ယွၤ တၢ်ဟ့ၣ် တခါ လၢအဒိၣ်နှၢ်အါနှၢ်ဒံး ‘အနံၤအိၣ်ဖျဲၣ်ဆၢက့ၤဖးဒိၣ်’ တခါ နှၣ်လီၤႉ အ၀ဲမုၢ်လၢ်၀ဲ လၢတၢ်လုၢ်ဟံၣ် လၢကဘၣ် တၢ်သူၣ်ထီၣ်အံၤ က့ကၢး၀ဲဘၣ်၀ဲလၢကစၢ်ယွၤ ကဟဲအိၣ်အဂီၢ်နှၣ်လီၤႉ ဒ်သိးကမၤနှၢ်၀ဲတၢ်ပိးတၢ်လီ လၢအလိၣ်ဘၣ်၀ဲတဖၣ်အဂီၢ် အ၀ဲကွဲးလီၤလံာ်ဆူ စိၢ်အစီၤပၤဃူရၠာစးၣ်အအိၣ်လီၤႉ လၢလံာ်အံၤအပူၤအ၀ဲပာ်ဖျါထီၣ်၀ဲ ဟံၣ်လၢယသူၣ်နှၣ်မ့ၢ်အဒိၣ်လီၤႉ ‘‘အဂ့ၢ်ဒ်အံၤ ယွၤပကစၢ်ဒိၣ်၀ဲ လၢကစၢ်ခဲလၢာ် အဖီခိၣ် လီၤ’’ (၂ ကွဲး ၂း၅) ႉ အ၀ဲသ့ၣ်ညါအၢၣ်လီၤ၀ဲလၢ တၢ်အဒိၣ်အထီဒီးတၢ်ဂ့ၤတၢ်၀ါလၢအိၣ် ဒီးယွၤနှၣ်အါနှၢ်ဒိၣ်နှၢ်ဒံး တၢ်လၢပှၤတ့အီၤလၢပှၤကညီအစုနှၣ်လီၤႉ ဒ်လဲၣ်ဂ့ၤဒ်လဲၣ်ဂ့ၤ အ၀ဲဒုးကဲထီၣ်တၢ်ဖံးတၢ်မၤအံၤ လၢတၢ်အဲၣ်ဘၣ်ယွၤဒီး တၢ်ဘူၣ်ထီၣ်ဘါထီၣ်ယွၤ အပူၤလီၤႉ
ပကစၢ်ယွၤအံၤ ဒိၣ်နှၢ်အါနှၢ်ဒံး ကစၢ်အဂၤတဖၣ် သပှၢ်ကတၢၢ်လီၤႉ အ၀ဲမၤ၀ဲ တၢ်လီၤလးတဖၣ်လၢပတၢ်အိၣ်မူအပူၤလီၤႉ ထိးဘၣ်ပသးဒ်သိး ပကဟ့ၣ်အီၤတၢ်ဟ့ၣ် လၢအအိၣ်ဒီးအလုၢ်အပရၤ ဒီးပှဲၤ၀ဲဒီးတၢ်အဲၣ်နှၣ်လီၤႉ စီၤရၠာစးှလိၤမိၤသ့ၣ်ညါ၀ဲ လၢအတၢ်ဟ့ၣ်အံၤ ထိၣ်အသးတသ့ဘၣ်ဒီးကစၢ်ယွၤအလုၢ်အပရၤဘၣ်ႉ ဘၣ်ဆၣ် လၢတၢ်သးခု ပာ်လီၤ၀ဲဆူယွၤအမဲာ်ညါလီၤႉ ပ၀ဲစ့ၢ်ကီးပမၤဒ်သိးအံၤသ့စ့ၢ်ကီးလီၤႉ