ဖဲလၢတၢ်မၤစၢ်လီၤကွံာ် လီမ့ၣ်အူအတၢ်ကပီၤ ဒီးပအိၣ်ကတဲာ်ကတီၤပသး လၢပကကွၢ်တၢ်ဂီၤမူ အပိၣ်လိၣ်-၁၃ န့ၣ်‚ ယသကိးစံးဘၣ်ယၤကသွံဒံ‚ ‘‘မ့ၢ်တၢ် လီၤမဲာ်ဆှးလၢအ၀ဲသ့ၣ်သံကွံာ်ကိးဂၤ’’န့ၣ်လီၤႉ ယကွၢ်တၢ်ဂီၤမူ လၢအဘၣ်ထွဲဒီး ၁၉၇၀ နံၣ် တၢ်လဲၤဆူမူဖးဖီအဂ့ၢ်‚ အိၣ်ဒီးတၢ်သူၣ်ကိၢ်သးဂီၤ‚ လၢတၢ်အကတၢၢ်ကမ့ၢ် တၢ်သအုးသပှီၤ‚ ဘၣ်ဆၣ်ဖဲလၢတၢ်ဂီၤမူ ကကတၢၢ်ဘူးထီၣ်န့ၣ်‚ ယသ့ၣ်ညါလီၤက့ၤယသး လၢယဘၣ်တၢ်လီန့ၢ်ယၤလံန့ၣ်လီၤႉ ယတသ့ၣ်ညါ မ့တမ့ၢ် ယတသ့ၣ်နီၣ် တၢ်မၤအသးနီၢ်နီၢ်အံၤ အကတၢၢ်‚ ဖဲလၢပှၤလဲၤတၢ်တဖၣ် မ့ၢ်ဘၣ်ကွၢ်ဆၢၣ်မဲာ် တၢ်ကီတၢ်ခဲအကလုာ်ကလုာ်သနာ်က့‚ ဟဲက့ၤတုၤဘၣ်၀ဲ ဂ့ၤဂ့ၤ ဘၣ်ဘၣ် ကိးဂၤဒဲးန့ၣ်လီၤႉ
လၢခရၠာစးံာ်အပူၤ‚ ပသ့ၣ်ညါသ့၀ဲ လၢမုၢ်နံၤခံ ကတၢၢ်န့ၣ် ပကက့ၤတုၤဘၣ်ဆူ ဟံၣ်သပှၢ်တၢၢ်အဂ့ၢ် လီၤႉ ခီဖျိတၢ်ဂ့ၢ်အံၤ‚ ယသးအိၣ်စံးယဲနီၢ်နီၢ် လၢပကမူ လီၤစိၤ ဃုာ်ဒီးပပၢ်အိၣ်လၢမူခိၣ် ဒ်ပထံၣ်ဘၣ် လၢလံာ် တၢ်လီၣ်ဖျါအပူၤအသိးန့ၣ်လီၤႉ ကစၢ်ကတ့လီၤ မူခိၣ်အသီ ဒီးဟီၣ်ခိၣ်အသီ‚ ဒ်အ၀ဲဒုးကဲထီၣ်က့ၤတၢ်ကိးမံၤ လၢတၢ်အသီအသိးန့ၣ်လီၤ (၂၁း၁‚၅) ႉလၢ၀့ၢ်သီအပူၤ‚ ကစၢ်ယွၤကတူၢ်လိာ် အပှၤဂီၢ်မုၢ် ဒ်သိးအကအိၣ်ဆိး ဃုာ်ဒီးအီၤ‚ပူၤဖျဲးဒီးတၢ်ပျံၤတၢ်ဖုး ဒီးလၢမုၢ်နၤတၢ်ခံးတအိၣ်လၢၤဘၣ်န့ၣ်လီၤႉ ပအိၣ်ဒီးတၢ်မုၢ်လၢ် ခီဖျိပသ့ၣ်ညါဘၣ် တၢ်အကတၢၢ်ကမ့ၢ်တၢ်ဒ်လဲၣ်အဃိန့ၣ်လီၤႉ
တၢ်အံၤဒုးကဲထီၣ် တၢ်လီၤဆီမနုၤလဲၣ်‚ တၢ်အံၤပျိာ်လဲလိာ်ကွံာ် တၢ်ဆၢကတီၢ် လၢအကီခဲကတၢၢ်တဖၣ်‚ ဒ်အမ့ၢ်ပှၤလၢပှၤအဲၣ်ဘၣ်အီၤတဖၣ် အသးသမူလီၤမၢ် မ့တမ့ၢ် ပှၤနီၢ်ကစၢ်ဒၣ်၀ဲအသးသမူလီၤမၢ်န့ၣ်လီၤႉ ပအိၣ်ဒီးတၢ်သးသုၣ် ဖဲပဆိကမိၣ် ထီၣ် တၢ်သံအဂ့ၢ်သနာ်က့‚ ခဲအံၤပအိၣ်ဒီးတၢ်သူၣ်ခုသးခု ခီဖျိယွၤအတၢ်အၢၣ်လီၤပှၤ လၢကဟ့ၣ်ပှၤ တၢ်မူအထူအယိာ်အဃိသ့၀ဲန့ၣ်လီၤႉ ပဆၢတုၤအိၣ်ဘၣ်ဆူ၀့ၢ်အသီ‚ ဖဲတၢ်ဆိၣ်အၢတအိၣ်လၢၤ‚ ဒီးပကအိၣ်မူလၢယွၤအတၢ်ကပီၤပူၤထီဘိန့ၣ်လီၤ (၂၂း၅) ႉ