ခၠီအဲ အသးဟးဂီၤဒိၣ်မး မ့ၢ်လၢအမါတဃုသ့ၣ်ညါဆိကျဲ လၢအလဲၤဆူ တၢ်အီၣ်ကျး လၢအကလဲၤအီၣ်သကိးတၢ်အဃိန့ၣ်လီၤႉ အ၀ဲသ့ၣ် အဟံၣ်ဖိဃီဖိတိာ်သူၣ်ပာ်သး ဒ်သိးအကမၤကတၢၢ်ကွံာ် အတၢ်ဟးကသုၣ်အသး ခီဖျိကအီၣ်သကိး တၢ်အီၤ ၀ံၣ်ဘဲ လၢတၢ်အီၣ်ကျး‚ တချူး လၢအဒိးထီၣ်ကဘီယူၤန့ၣ်လီၤႉ ခဲအံၤ အ၀ဲသ့ၣ် စဲၤခံလံ ဒီးတမ့ၢ် လၢကအီၣ်ဘၣ် တၢ်အီၣ်လၢၤဘၣ်‚ လၢတၢ်သးဟးဂီၤအပူၤ ခၠီအဲ ကဒူးကဒ့ၣ် ဒီးပာ်တၢ်ကမၣ် လၢအမါအလိၤ လၢအတသုးကျဲၤတၢ်ဂ့ၤဂ့ၤအဃိန့ၣ်လီၤႉ
လၢခံ ခၠီအဲ ပီၢ်ယၢ်လီၤက့ၤအသး လၢအတၢ် ကတိၤတဖၣ်အဃိန့ၣ်လီၤႉ အ၀ဲအတၢ်ကတိၤတဖၣ် ဆူၣ်ဒိၣ်မး‚ အါန့ၢ်အန့ၣ်‚ သ့ၣ်နီၣ်ထီၣ်က့ၤ၀ဲ လၢအနီၢ် ကစၢ်ဒၣ်၀ဲ ့ကၢးဃုသ့ၣ်ညါဆိပာ်စၢၤကျဲ ဆူတၢ်အီၣ် အကျး‚ ဒီးအနီၢ်ကစၢ်ဒၣ်၀ဲ လီၤတူာ်လီၤကာ် လၢတစံးဘျုးဘၣ်အမါ လၢအသုး ကျဲၤတ့ၢ် တၢ်အဂ့ၤကတၢၢ် လၢအပူၤကွံာ်နွံသီအတီၢ်ပူၤ အဃိန့ၣ်လီၤႉ
ပ၀ဲအါဂၤ ပကမ့ၢ်တၢ်တမံၤဃီ ဒ် ခၠီအဲ န့ၣ်လီၤႉ ပညီနုၢ်ပာ်ဖျါထီၣ် ပတၢ်သးဒိၣ်သးထီၣ်‚ ပတပၢၤပထးခိၣ် ဒီးစံးကတိၤတၢ် ဆူၣ်ဆူၣ်ကိၤကိၤန့ၣ်လီၤႉ အလီၢ်အိၣ်ဒိၣ်မး လၢပကထုကဖၣ်တၢ် ဒ်ပှၤကွဲးထါစံးထီၣ်ပ့တၢၤ လၢအစံး‚ ‘‘ယွၤဧၢ‚ ပာ်တၢ်ပၢၤလၢယထးခိၣ်တက့ၢ်‚ ပၢၤယပျူၤအBတဲၤတက့ၢ်’’ (စံး ၁၄၁း၃) ႉ
ဘၣ်ဆၣ်ဒီး ပကမၤတၢ်အံၤဒ်လဲၣ်ႉ တၢ်မၤစၢၤတမံၤမ့ၢ်ဒ်အံၤလီၤႉ ကွၢ်ဆိမိၣ်‚
တချူးလၢနစံးကတိၤတၢ်ႉ နတၢ်ကတိၤတဖၣ်‚ မ့ၢ်အဂ့ၤ‚ ကဲထီၣ် တၢ်မၤစၢၤ‚ ကဲဘျုးကဲဖှိၣ် ဒီးမ့ၢ်လၢတၢ်သးအိၣ်သးကညီၤပှၤဂၤကစီဒီဧါ (အ့း ၄း၂၉-၃၂) န့ၣ်လီၤႉ
တၢ်ပာ်တၢ်ပၢၤလၢပထးခိၣ်‚ လိၣ်ဘၣ်ဒ်သိးပကကးတံာ်ဃာ် ပထးခိၣ် ဖဲလၢပသးဘၣ်တံာ်တာ် ဒီးပသးထီၣ်အခါ‚ ဒီးဃ့တၢ်မၤစၢၤ လၢယွၤအအိၣ် ဒ်သိး ပကစံးကတိၤတၢ်အဘၣ်‚ လၢအသီၣ်မုာ်‚ ဘၣ်တဘၣ်မ့ၢ်သ့ ဒီးပကအိၣ် ဃိကလာ်အဂီၢ်န့ၣ်လီၤႉ ဖဲလၢပစံး ပကဘၣ်ပၢၤပတၢ်စံးတၢ်ကတိၤန့ၣ်‚ မ့ၢ်တၢ်လၢပကဘၣ်မၤအီၤ တစိၤသးန့ၣ်လီၤႉ ပစံးဘျုးယွၤ လၢအမၤတၢ်လၢပသးပူၤ‚ ဟ့ၣ်ပှၤတၢ်သးအိၣ်ဒီးဂံၢ်ဘါ ဒ်သိးပကမၤတၢ် လၢအဘၣ်အသးအဂီၢ်အဃိ န့ၣ်လီၤ (ဖံလံး ၂း၁၃) ႉ