‘‘ယမ့ၢ်မတၤလဲၣ်မးနတသ့ၣ်ညါ ဒီးနသးအိၣ်သးကညီၤယၤကသ့ဒ်လဲၣ်’’ လၢတၢ် ဆိကမိၣ်နီၤဖးပဲာ်ဖးတၢ်ကမၣ်အဃိ‚ လ့ၤဒၣ် ဘၣ်တၢ်စၢဃာ် လၢဃိာ်ပူၤ‚ ဖဲထံကီၢ်အဂၤတဘ့ၣ်အပူၤန့ၣ်လီၤႉ အ၀ဲဘၣ်အိၣ်လၢဃိာ်ပူၤ ၆ နံၣ်၀ံၤ ဖဲလၢအဟးထီၣ်ဘၣ် လၢဃိာ်ပူၤ ဒီးကဘၣ်လဲၤဆူတၢ်လီၢ်မတၤလဲၣ်န့ၣ် တသ့ၣ်ညါ၀ဲလၢၤဘၣ်န့ၣ်လီၤႉ အ၀ဲ ဆိကမိၣ် လၢအတၢ်အိၣ်မူအံၤကတၢၢ်လံန့ၣ်လီၤႉ ဖဲအဟံၣ်ဖိဃီဖိဒူၣ်ဖိထၢဖိတဖၣ် ပာ်ဖှိၣ်ကျိၣ်စ့ ဒ်သိးကဟ့ၣ်ကဘီယူၤလဲအဂီၢ်အခါ‚ ပှၤဒီမိ၀ၤခံဂၤ လၢအသးအိၣ်ဘၣ် အ၀ဲသ့ၣ်ဟ့ၣ်ဒုးအီၣ်တၢ်အီၣ် ဒီးဟ့ၣ်တၢ်လီၢ်လၢကအိၣ် ကဒုအဂီၢ်န့ၣ်လီၤႉ အ၀ဲသ့ၣ် အတၢ်သးအိၣ်သးကညီၤအံၤ ထိးဘၣ် လ့ၤဒၣ်အသးအဃိ‚ အ၀ဲဒိကနၣ် ပှၤဒီမိ၀ၤခံဂၤ အတၢ်စံးဘၣ်တဲဘၣ်အီၤ ဘၣ်ဃးဒီးတၢ်သးခုကစီၣ် လၢယွၤအဲၣ်အီၤ ဒီးသးအိၣ်လၢကဟ့ၣ်အီၤ တၢ်အခွဲးအယာ် ခံဘျီတဘျီ အဂ့ၢ်န့ၣ်လီၤႉ
လ့ၤဒၣ်အဂ့ၢ်အံၤ ဒုးသ့ၣ်နီၣ်ထီၣ်ယၤ နီၢ်နၤဧမံ လၢအမ့ၢ်မုၣ်ကမဲတဂၤ လၢလံာ်စီဆှံပူၤ‚ လၢအ၀ၤဒီးအဖိခံဂၤသံ လၢတခီဘီမုၢ် ဒီးဆိကမိၣ် လၢအတၢ်အိၣ်မူအံၤ ကတၢၢ်လံအဂ့ၢ်န့ၣ်လီၤ (့ှူၤသး ၁) ႉ ဒ်လဲၣ်ဂ့ၤန့ၣ်‚ ကစၢ်ယွၤတသးပ့ၤနီၣ် နီၢ်နၤဧမံ ဒီးခီဖျိလၢအဒဲၣ်မုၣ်အတၢ်အဲၣ် ဒီးစီၤဘိၤဧး လၢအမ့ၢ် ယွၤအပှၤကညီတဂၤ အတၢ်သးကညီၤအပူၤ‚ နီၢ်နၤဧမံထံၣ် ကစၢ်ယွၤအတၢ်အဲၣ် ဒီးန့ၢ်ဘၣ် တၢ်အခွဲးအယာ်ခံစုတစုန့ၣ်လီၤ (့ှူၤသး ၄း၁၃-၁၇) ႉ
ယွၤတဂၤဃီကဟုကယာ်ပှၤ လၢမုၢ်မဆါတနံၤအံၤန့ၣ်လီၤႉ ခီဖျိလၢပှၤအဂၤ အတၢ်အဲၣ်န့ၣ်‚ ပဘၣ်တၢ်ဒုးသ့ၣ်နီၣ်ပှၤ လၢကစၢ်ယွၤအိၣ်ဒီးပှၤန့ၣ်လီၤႉ ပထံၣ်ဘၣ် ယွၤအဘျူးအဖှိၣ် ခီဖျိပှၤဂုၤဂၤ လၢပတသ့ၣ်ညါအီၤဂ့ၤဂ့ၤတဖၣ်အတၢ်မၤစၢၤပှၤ သ့၀ဲန့ၣ်လီၤႉ ဘၣ်ဆၣ်လၢတၢ်ခဲလၢာ်အဖီခိၣ်န့ၣ်‚ ကစၢ်ယွၤသးအိၣ် လၢပကစးထီၣ် ကဒီး အသီတဘျီန့ၣ်လီၤႉ ဒ်လ့ၤဒၣ် ဒီးနီၢ်နၤဧမံတဖၣ်အသိး‚ ပလိၣ်ဘၣ် ထဲဒၣ် ပကထံၣ်ဘၣ် ယွၤအတၢ်မၤစၢၤပှၤ လၢပတၢ်အိၣ်မူတနံၤဘၣ်တနံၤ ဒီးသ့ၣ်ညါ လၢအ၀ဲတဆိကတီၢ် လၢကပာ်ဖျါအတၢ်သးအိၣ်ပှၤဘၣ်န့ၣ်လီၤႉ