ဖဲယဖိခွါဆံး ဘၣ်ကွဲးအမဲာ်ချံလၢတၢ်ဆါဟံၣ်အခါ‚ ယၤဒီးယ၀ၤသးဘိး ပဆ့ၣ်နီၤ အိၣ်ခိး ပှဲၤဒီးတၢ်သးကနိး တၢ်ဘၣ်ယိာ်/ ယဃ့ကညး ဒီးဘါထုကဖၣ်ယွၤ ဒ်သိးကဟ့ၣ်ယၤ တၢ်သူၣ်ဂၢၢ်သးကျၢၤ/ ဖဲယအိးထီၣ်ဖးလံာ်စီဆှံအခါ တၢ်ထိးဘၣ်ယသး လၢယကဖး၀ဲ ၀ံယရၠာစးှါယၤ ၄၀‚ လံာ်စီဆှံအဆၢအံၤ မ့ၢ်ကထိးဘၣ် ယသးလၢတၢ်တမံၤမံၤအဂီၢ်/
ဖဲယဖးနှၣ်ဒီး ယထံၣ်ဘၣ်ယွၤအတၢ်ကတိၤ လၢအမ့ၢ်၀ဲ‚ ‘‘ကအံးကကွၢ်အသိတဖု ဒ်ပှၤကွၢ်သိတဂၤ အသိး‚ ဒီးကထၢဖှိၣ်သိဖိတဖၣ်လၢအစု‚ ဒီးကစိာ်အီၤ လၢအသးနါပှၢ်အပူၤ’’ (း၁၁) ‚ လၢကစၢ်ယွၤ ဒုးသ့ၣ်နီၣ်ထီၣ် န့ၢ်ယၤ လၢအပူၤကွံာ်နံၣ်သ့ၣ်တဖၣ်အပူၤလီၤႉ ဒီးတဘျီဃီ တၢ်ကိၢ်တၢ်ဂီၤတဖၣ် လဲၤသဒၣ်ကွံာ်ယၤ မ့ၢ်လၢယသ့ၣ်ညါ ယွၤစိာ်ထီၣ်ယၤ လၢအသးနါပှၢ်‚ ယွၤဆှၢယၤ‚ ယွၤကဟု ကယာ်ယၤ အဃိ/ ယသါထီၣ် ကစုဒုဖိ ‘‘ယလိၣ်ဘၣ် တၢ်သူၣ်ဂၢၢ် သးကျၢၤဒ်အံၤလီၤယွၤဧၢ’’ ဒီးယပလၢၢ်ဘၣ်၀ဲ တၢ်မုာ်တၢ်ခုၣ်တုၤ တၢ်ကွဲး၀ံၤတစု/ တၢ်ကွဲးမဲာ်ချံ စ့ၢ်ကီး ၀ံၤ၀ဲဂ့ၤဂ့ၤဘၣ်ဘၣ် လၢယွၤအဘျုးအဃိ/
ခီဖျိ၀ံယရၠာစးှါယၤ‚ ယွၤအၢၣ်လီၤစံးပာ်တ့ၢ်၀ဲ အပှၤဂီၢ်မုၢ်သ့ၣ်တဖၣ် လၢအ၀ဲဒၣ် ကမ့ၢ်၀ဲ ပှၤကွၢ်သိတဂၤ‚ ကနဲၣ်လိ အ၀ဲသ့ၣ်အတၢ်အိၣ်မူလၢ ကိးမုၢ်နံၤဒဲး‚ ဒီးကဆှၢ အပှၤ ဂီၢ်မူၢ် ဆူတၢ်မုာ်တၢ်ခုၣ်အလီၢ်/ ပ၀ဲဒၣ်စ့ၢ်ကီး ပစံးပတၢ်သူၣ်ကိၢ်သးဂီၤသ့ၣ် တဖၣ် ဆူယွၤအအိၣ် ဒ်သိးပကဃုထံၣ်ယွၤအတၢ်အဲၣ် ဒီးယွၤအတၢ်မၤမုာ်ပှၤအခါန့ၣ် ပကဒိးန့ၢ် ယွၤအတၢ်ကဟုဘံၣ်ကယၣ်ဘၢ/ ပသ့ၣ်ညါ လၢကစၢ်ယွၤမ့ၢ် ပှၤကွၢ်သိ လၢအဂ့ၤ‚ စိာ်ထီၣ်ပှၤ လၢအသးနါပှၢ်‚ ဆှၢပှၤလၢအစု တစိၤဒၣ်ပှၤလီၤႉ