ဆၢကတီၢ်ခဲအံၤ မ့ၢ်ဒၣ် ဖိသၣ်ဖိ စဲလံၣ်အိၣ် လၢအသးအိၣ် အနံၣ် ၁၀ ဖိတဂၤ ဘၣ်တခွဲညၣ် အဆိကတၢၢ်တဘျီန့ၣ်လီၤႉ ဒီးအ၀ဲကွၢ်၀ဲထးဒၢအပူၤ လၢပှၤထၢနုာ်တဃာ် ထိးကလဲာ်တဖၣ်‚ ဒီးကနီးဘၣ်အသးလီၤႉ လၢခံကတၢၢ်ဒီး အ၀ဲကိးထီၣ်၀ဲယ၀ၤ ‘‘မၤစၢၤယၤတဘီ ႉႉႉၢ်-ှ-ၣ်-တ! ’’ႉ ယ၀ါက့ၤသံကွၢ်အီၤ ‘‘ၢ်-ှ-ၣ်-တ’’ န့ၣ်တၢ်မနုၤလဲၣ်ႉ ဒီး စဲလံၣ်အိၣ် က့ၤတဲဆၢက့ၤ၀ဲ ‘‘ဖိခွါပျံၤ ထိးကလဲာ်’’ႉ အတၢ်ပျံၤတၢ်ဖုးအံၤ မၤကတီၢ်ကွံာ် ခါဆူညါအတၢ်လဲၤ‚ အတၢ်မၤတဖၣ် န့ၣ်လီၤႉ
တၢ်ပျံၤတၢ်ဖုးန့ၣ် ဒုးသံတခီပၤတၢ် လၢပှၤဒိၣ် တုာ်ခိၣ်ပှဲၤ‚ ပှၤသးပှၢ်‚ ပှၤလၢအဒိၣ်ထီၣ်၀ံၤအကျါစ့ၢ်ကီးလီၤႉ စီၤကံးဒဧိၣ် ဘၣ်တၢ်ပျံၤတၢ်ဖုး ဖဲကစၢ်ယွၤအကလူး ဟဲဆူအအိၣ်အကတီၢ်‚ ဒီးအကတီၢ်ဖဲန့ၣ် အ၀ဲ တီၢ်ခူသူၣ်ဘူကၠူၣ် လၢနီၣ်စံၢ်စပံးသၣ်အပူၤ ဒ်သိးအကပာ်ခူသူၣ်အီၤ လၢအဒုၣ်ဒါ ပှၤမံးဒယၣ်ဖိတဖၣ်န့ၣ်လီၤ (စံၣ်ညီၣ် ၆း၁၁) ႉကလူး စံးဘၣ်အီၤ အ၀ဲမ့ၢ် ယွၤအပှၤဃုထၢတဂၤ လၢကဘၣ်ဆၢထၢၣ် လၢအပှၤဂီၢ်မုၢ် အမဲာ်ညါ လၢတၢ်ဒုးတၢ်ယၤအပူၤန့ၣ်လီၤ (း၁၂-၁၄) ႉ
စီၤကံးဒဧိၣ် စံးဆၢက့ၤ‚‘‘ယကစၢ်ဧၢ‚ ယကအုၣ်က့ၤခီၣ်က့ၤ အံၣ်စရၠာစး့လး လၢမနုၤတမံၤလဲၣ်ႉ ကွၢ်ကွၢ်‚ ယမ့ၢ်ပှၤအဆံးကတၢၢ်လၢယပၢ်အပှၤဟံၣ်ဖိအကျါ လီၤ’’ႉ တုၤဒၣ်လဲာ် သ့ၣ်ညါ၀ဲလၢ ကစၢ်ယွၤအိၣ်နီၢ်နီၢ် သနာ်က့ အ၀ဲပျံၤတၢ်ဖုးတၢ်ဒီး ဃ့ကညးကဒီး ကစၢ်ယွၤအတၢ်လီၤလးအပနီၣ် လၢအ၀ဲမ့ၢ် ယွၤအပှၤ ဃုထၢတဂၤ လၢကဘၣ်အုၣ်ခီၣ် အံၣ်စရၠာစး့လးအပှၤဂီၢ်မုၢ်တဖၣ်န့ၣ်လီၤ (း၃၆-၄၀) ႉ ကစၢ်ယွၤ မၤ၀ဲ ဒ်စီၤကံးဒဧိၣ် အတၢ်ဃ့ကညးအီၤအသိးန့ၣ်လီၤႉ လၢတၢ်ဒုးတၢ်ယၤအပူၤ ပှၤအံၣ်စရၠာစး့လးဖိတဖၣ် မၤန့ၢ်တၢ်မၤနၢၤ၀ံၤဒီးလၢဆူမဲာ်ညါ အနံၣ် ၄၀ အတီၢ်ပူၤ အိၣ်ဘၣ်၀ဲ မုာ်မုာ်ခုၣ်ခုၣ်န့ၣ်လီၤႉ
ပ၀ဲကိးဂၤဒဲး ပအိၣ်ပှဲၤဒီးတၢ်ပျံၤတၢ်ဖုးအကလုာ်ကလုာ်‚ ဒ်အမ့ၢ် ထိးကလဲာ် တုၤလၢတၢ်ဒုးတၢ်ယၤတဖၣ်န့ၣ်လီၤႉ စီၤကံးဒဧိၣ်အတၢ်တဲပူ သိၣ်လိနဲၣ်လိပှၤ ဒ်သိး ပကအိၣ်သးအတၢ်နာ်နီၢ်နီၢ် လၢတၢ်ဂ့ၢ်တမံၤလၢအမ့ၢ် ‘‘ကစၢ်ယွၤမ့ၢ်မၢ ပမၤတၢ် တမံၤမံၤန့ၣ် အ၀ဲဒၣ် ကဟ့ၣ်ပှၤ သးအတၢ်ဂံၢ်တၢ်ဘါ ဒီးသးအတၢ်စိတၢ်ကမီၤ လၢ ပကမၤလၢတၢ်ဂ့ၢ်တမံၤအံၤအဂီၢ်န့ၣ်လီၤ’’ႉ