ဖဲယဖျီယသး၀ံၤ ဒီးယဆိကမိၣ်လၢယဖိကအိၣ်တဘျီဃီလီၤႉ ဘၣ်ဆၣ် တကဲထီၣ် အသးဒ်န့ၣ်ဘၣ်ႉ တၢ်သးဘၣ်ဒိဖးဒိၣ်လၢယတမၤန့ၢ်ယဖိဘၣ်အံၤန့ၣ် ဒုးကဲထီၣ်ယၤ တၢ်တီၤလီၤကဒွံကျိာ် ဒီးဃ့ဘါထုကဖၣ်န့ၣ်လီၤႉ အါဘျီ ယဟီၣ်ဒီး ယဘါထုကဖၣ်တၢ်ဆူယွၤ ဒီးယစံး‚ ‘‘မ့ၢ်ဆံးယံာ်လဲၣ်’’န့ၣ်လီၤႉ ယသ့ၣ်ညါ လၢကစၢ်ယွၤ ဆီတလဲကွံာ် ယတၢ်အိၣ်သးအခဲအံၤ သ့၀ဲဒၣ်န့ၣ်လီၤႉ ဘၣ်ဆၣ် ဘၣ်မနုၤ ယွၤတမၤ၀ဲဒ်န့ၣ်လဲၣ်ႉ
မ့ၢ်နအိၣ်ခိး ကစၢ်ယွၤဧါႉ မ့ၢ်နသံကွၢ်စ့ၢ်ကီး ကစၢ်ယွၤ လၢ ‘‘တၢ်တီတၢ်လိၤ ကအိၣ်ထီၣ် လၢဟီၣ်ခိၣ်ဆံးယံာ်လဲၣ်ႉ’’ ‘‘တၢ်မၤဘျါက့ၤ ခဲစၢၣ်တၢ်ဆါ ဆံးယံာ် လဲၣ်’’ ‘‘ယတအိၣ်ဒီး ဒ့ၣ်ကမၣ် ဆံးယံာ်လဲၣ်’’ ဧါႉ
၀ံးဃဘးကူာ်အသးဘၣ်ထီ ဒီးတၢ်မ့ၢ်သ့ၣ်တဖၣ်အံၤန့ၣ်လီၤႉ ဖဲတချုးခရၠာစးံၣ်နံၣ် ၇၀၀ အတီၢ်ပူၤန့ၣ်‚ ၀ံဃဘးကူာ်ကိးထီၣ် ကစၢ်ယွၤဒီးစံး‚ ‘‘ယွၤဧၢ‚ ယဘၣ်ကိးထီၣ်တၢ်ဒီးနတနၢ်ဟူဘၣ်ဆံးယံာ်လဲၣ်ႉ ယဘၣ်ကိးပသူထီၣ် လၢတၢ်မၤအၢဆူၣ်အဃိ‚ ဒီး နတအုၣ်က့ၤခီၣ်က့ၤဘၣ်န့ၣ် မ့ၢ်ဆံးယံာ်လဲၣ်ႉ နဒုးထံၣ်ဘၣ်ယၤ လၢတၢ်အၢတၢ်သီ‚ ဒီးနဒုးကွၢ်ယၤ လၢတၢ်နးတၢ်ဖှီၣ် မ့ၢ်အဘၣ်မနုၤလဲၣ်’’ (ဃဘး ၁း၂-၃) ႉ အ၀ဲ ထုက ဖၣ်၀ဲ လၢတၢ်ဆၢကတီၢ်အါမး ဒီးဂဲၤလိာ်၀ဲ လၢကမၤဘၣ်လိာ်က့ၤတၢ် လၢအဘၣ်ဃး ဒီးယွၤ အတီဒီးအစိကမီၤဒိၣ်တဂၤအံၤ ကဟ့ၣ်အခွဲးအယာ် လၢပှၤအအၢအသီတဖၣ် ဒီးတၢ်တတီတလိၤဘၣ်အလိၤဒ်လဲၣ်ႉ ဒီးကစံၣ်ညီၣ် ပှၤအၢတုၤလၢယူၤဒၤ ဒ်လဲၣ်အဂ့ၢ်န့ၣ်လီၤႉ အဃိသတးဒီး ၀ံဃဘးကူာ် မၤဘၣ်ဃးတၢ် ဒီးယွၤအိၣ်တ့ၢ်လံ လၢတၢ်ခံမံၤအဘၢၣ်စၢၤ အဖီခိၣ်လီၤႉ ဘၣ်မနုၤယွၤ တမၤတၢ်နီတမံၤဘၣ်လဲၣ်ႉ
မုၢ်နံၤတဖၣ် လၢအမၤအသး ဒ်ယွၤတမၤတၢ်နီတမံၤဘၣ်န့ၣ် အိၣ်၀ဲဒၣ်လီၤႉ ဒ်၀ံဃဘးကူာ်အသိး ပ၀ဲစ့ၢ်ကီး ပသံကွၢ်ယွၤ လၢ‘‘မ့ၢ်ဆံးယံာ်လဲၣ် ယွၤဧၢ’’ လီၤႉ
ဘၣ်ဆၣ်ဒီး ပတအိၣ်လီၤတဲာ်ဘၣ်ထဲတဂၤဧိၤဘၣ်ႉ ဒ်ဃဘးကူာ်အသိးန့ၣ် ယွၤနၢ်ဟူ ပတၢ်၀ံတၢ်ယိးန့ၣ်လီၤႉ လိၣ်၀ဲဒၣ်ထဲလၢပကပာ်ထီၣ် ပတၢ်၀ံတၢ်ယိး လၢအ၀ဲအလိၤ မ့ၢ်လၢအ၀ဲဒၣ် ကဟုကယာ်ပှၤအဃိလီၤႉ ယွၤနၢ်ဟူပှၤဒီး လၢအ၀ဲ အမံၤအဃိ အ၀ဲကဟ့ၣ်ပှၤ တၢ်စံးဆၢလီၤႉ