မုၢ်တဟါ ဖဲယဖိဒိၣ်မုၣ်ကဘၣ်သုးအလီၢ် ဆူ ကီၢ်မဲးဆၣ်ခၠူးဆဲး လၢကဘၣ်လဲၤမၤလိ တီၤထီဖၠၣ်စိမိၤ လၢ၀့ၢ်ဘီးစတိၣ်ဒီးယလဲၤဆှၢလီၤဆၢဂ့ၤဆၢ၀ါအီၤ လၢတၢ်ကတိၤဖိ ‘လဲၤမုာ်မုာ်’န့ၣ် ယကိာ်ယူၢ်လီၤတကံးဘၣ်သးလီၤႉ လၢတၢ်မၤလိ တီၤထီကၠိအခါန့ၣ် အ၀ဲအိၣ်ယံၤတ့ၢ်ဒီးယၤ လွံၢ်နံၣ်ဘၣ်ဆၣ်‚ အ၀ဲတမ့ၢ်အဟးထီၣ် လၢပကီၢ်စဲၣ်အချၢဘၣ်‚ ပလဲၤလၢသိလ့ၣ် ခံနၣ်ရၠာစးံၣ်တခီဒီး ပလဲၤတုၤ အိၣ်သကိးအီၤ ညီကဒၣ်ဖိလီၤႉ ခဲအံၤ အ၀ဲကအိၣ်စီၤစုၤဒီးပှၤ အမံးလာ် ၈၀၀ ဘျဲၣ်လီၤႉ ပထံၣ်လိာ်‚ ကတိၤလိာ်သကိး ဒ်ညီနုၢ် အသိး တသ့လၢၤဘၣ်ႉယဘၣ်နာ်ဒၣ်ထဲယွၤ လၢကအံးကွၢ် ကဟုကယာ်အီၤလီၤႉ
တၢ်မၤအသးဒီးစီၤပီလူး တမံၤဃီ ဒ်န့ၣ်အသိး ဖဲအကတိၤဆၢဂ့ၤလိာ်အသး လၢတၢ်အိၣ်ဖှိၣ်သးပှၢ်တဖၣ် လၢအ့းဖ့းစူးတၢ်အိၣ်ဖှိၣ်အခါ န့ၣ်လီၤႉ အ၀ဲသူၣ်ထီၣ်တ့ၢ် တၢ်အိၣ်ဖှိၣ်အံၤဒီး သိၣ်လိသီလိတ့ၢ် အ၀ဲသ့ၣ်သၢနံၣ်ညါန့ၣ်လီၤႉ စီၤပီလူး မၤလိာ်တ့ၢ် တၢ်အိၣ်ဖှိၣ်သးပှၢ်တဖၣ် လၢကပာ်အသး ဒ်ဒူၣ်ဖိထၢဖိတဒူၣ်ဃီဒီးအီၤ န့ၣ်လီၤႉ ခဲအံၤ စီၤပီလူးကဘၣ်လဲၤဆူ ယ့ှူၤ့ှှလ့ၣ် ဒီးအ၀ဲထံၣ်လိာ်အသးဒီး တၢ်အိၣ်ဖှိၣ်သးပှၢ် တဖၣ်အံၤ တသ့လၢၤဘၣ်န့ၣ်လီၤ
ဘၣ်ဆၣ်ဒီး စီၤပီလူးအိၣ်ဒီးတၢ်ဟ့ၣ်ကူၣ် လၢပှၤအ့းဖ့းစူးဖိတဖၣ်အဂီၢ် ဖဲတၢ်အိၣ်လီၤဖးလိာ်သးအကတီၢ် န့ၣ်လီၤႉ အ၀ဲသ့ၣ် မ့ၢ်တအိၣ်ဒီး သရၠာစးၣ်စီၤပီလူး လၢ ကသိၣ်လိသီလိ အ၀ဲသ့ၣ်ဘၣ်ဆၣ် တလိၣ်လၢပှၤအ့းဖ့းစူးဖိတဖၣ် ကဘၣ်ဆိကမိၣ် လၢအဘၣ် တၢ်ညိကွံာ်အီၤန့ၣ်ဘၣ်ႉ ယွၤကသိၣ်လိအ၀ဲသ့ၣ်ဆူညါ ခီဖျိအဘျုးအဖှိၣ်‚ အကလုၢ်အကထါန့ၣ်လီၤ (မၤ ၂၀း၃၂) ‚ ဒီးယွၤကပၢဆှၢ တၢ်အိၣ်ဖှိၣ် န့ၣ်လီၤႉ ယွၤတခီ‚ တမ့ၢ်ဒ်စီၤပီလူးအသိးဘၣ်ႉ ကအိၣ်ဒၣ်တဘိယူၢ်ဃီ ဃုာ်ဒီးအ၀ဲသ့ၣ် န့ၣ်လီၤႉ
ဒ်ဖိသၣ်တဖၣ်အသိး ပဟးထီၣ်ကွံာ်လၢပသွံပူၤမ့ၢ်ဂ့ၤ‚ ဒူၣ်ဖိထၢဖိ ဒီးတံၤသကိး တဖၣ် လၢအသုးယံၤအသးမ့ၢ်ဂ့ၤအခါ‚ ပကတဲလဲၤမုာ်မုာ်န့ၣ် ကီဒိၣ်မးလီၤႉ မ့ၢ်အ၀ဲသ့ၣ် သုးယံၤအသး ဆူတၢ်အိၣ်မူအလီၢ်အသီပူၤမ့ၢ်ဂ့ၤ‚ ယံၤဒီးပတၢ်အံးကွၢ်ပၢဆှၢမ့ၢ်ဂ့ၤ အဃိန့ၣ်လီၤႉ ဖဲပဟံးစုကွၢ်မဲာ်၀ံၤဒီး ပျဲကွံာ်ပစုန့ၣ်‚ ပနာ်လၢ ကစၢ်ယွၤဟံးဃာ်ပၢၤဃာ် အ၀ဲသ့ၣ်န့ၣ်သ့၀ဲဒၣ်လီၤႉ ကစၢ်ယွၤဘှီထီၣ်မၤဂ့ၤ အ၀ဲသ့ၣ် အတၢ်အိၣ်မူ ဒီးမၤပှဲၤ အတၢ်လိၣ်သ့၀ဲလီၤႉ ယွၤမၤတၢ်သ့ဒိၣ်န့ၢ်ဒံး ပမၤသ့တက့ၢ်ႉ