အပူၤကွံာ် အါနံၣ်အါလါ ယတဲကဒါက့ၤတလီၢ်လီၢ် တၢ်မၤအသးဖိတခါ ဖဲပအိၣ် ဖဲကၣ်နၣ် (ဂါနာ) ထံကီၢ်အဆၢကတီၢ်‚ ဖဲန့ၣ်အခါ ယ၀ဲၢ်ဒီးယၤ ပမ့ၢ်ဒံးဒၣ်ဖိသၣ် လၢဟးတသ့ဒံး ဒီးဟးစွါဒၣ်တၢ်အဆၢကတီၢ်န့ၣ်လီၤႉ ယတၢ်သ့ၣ်နီၣ်မ့ၢ်၀ဲ‚ အ၀ဲပာ် ကတီၢ်ဃာ် ထးလ့ၣ်ယီၣ်ခီၣ်ဖိအလီၤလံၤတခိၣ် (အိၣ်ဒီးလ့ၣ်ပာ်သၢခီ) လၢဂုၢ်သီဖိ တဘိ အဖီခိၣ်န့ၣ်လီၤႉ လ့ၣ်ဖိအံၤ လၢဒိၣ်မး လၢဂုၢ်သ့ၣ် အဂီၢ်အဃိ‚ အ၀ဲအိၣ်ဘံတံၢ်အသး လၢလ့ၣ်ပာ်အမဲာ်ညါ အဖီလာ်န့ၣ်လီၤႉ
ဘၣ်ဆၣ်ဖဲလၢယမိၢ်ဒီးယမုၢ်ဂၢ် လဲၤသဒၣ်ကွံာ် ဟီၣ်ခိၣ်၀ံၤ အလီၢ်ခံ ပထံၣ်န့ၢ်က့ၤ မိၢ်အလံာ်ပရၠာစးၢတဘ့ၣ် လၢအလီၤမၢ်ယံာ်တ့ၢ်လံ‚ လၢအကွဲး၀ဲဘၣ်ဃးဒီး တၢ်ဂ့ၢ် အံၤလီၤႉ နီၢ်နီၢ်တခီ ပှၤလၢအအိၣ်ကတီၢ်လ့ၣ်ဖိ လၢဂုၢ် အဖီခိၣ်န့ၣ် မ့ၢ်ယၤဒီးပှၤလဲၤဃ့ၣ်ကိးယမိၢ်မ့ၢ် ယ၀ဲၢ်ခွါလီၤႉ တၢ်လၢအ၀ဲထံၣ်ဒီးကွဲး၀ဲအံၤန့ၢ် ဒုးဖျါက့ၤ တၢ်မ့ၢ်တၢ်တီန့ၣ်လီၤႉ
ပှၤကွဲးတၢ်စံၣ်စိၤတဲစိၤ စီၤလူၤကၣ်နၢ်ပၢၢ်၀ဲ တၢ်ကွဲးနီၣ်ကွဲးဃါလီၤတံၢ်လီၤဆဲး အကါဒိၣ်၀ဲအဂ့ၢ်န့ၣ်လီၤႉ အ၀ဲဒုးနၢ်ပၢၢ်ပှၤလၢ ကစၢ်ခရၠာစးံာ်အဂ့ၢ် လၢ ‘‘ဒ်ပှၤလၢအထံၣ် တၢ်လၢအမဲာ်ဒီးမၤအကလုၢ်ကထါအတၢ်မၤ လၢအခီၣ်ထံးလံၤလံၤ‚ ဟ့ၣ်လီၤပှၤ အသိးန့ၣ်လီၤ (လူၤ ၁း၂) ႉ အ၀ဲကွဲးဟ့ၣ်ယုာ်၀ဲ ဆူစီၤသီးဖံၤလူး ဒီးစံး၀ဲ ‘‘ဘၣ်ယသး လၢယကကွဲးန့ၢ်နၤ‚ တမံၤဘၣ်တမံၤ‚ ဒ်သိးနကသ့ၣ်ညါ လၢတၢ်လၢနမၤလိတ့ၢ် တဖၣ်န့ၣ် မ့ၢ်တၢ်အမ့ၢ်အတီလီၤ’’ (း၃-၄) ႉ တၢ်လၢအကွဲး၀ဲတဖၣ်အံၤ ကဲထီၣ် ‘‘လံာ်လူၤကၣ်’’ န့ၣ်လီၤႉ ဒီးလၢလံာ်မၤတၢ်အပူၤ စ့ၢ်ကီး အ၀ဲကွဲးတၢ်ကတိၤလၢညါ ဘၣ်ဃးဒီးခရၠာစးံာ်‚ ဒီးစံး၀ဲ‚ ‘‘ဒီးအ၀ဲဒၣ်ဒုးနဲၣ်အသးလၢအီၤ လၢအမူဒံးလၢအဒိးတၢ် အလီၢ်ခံ‚ လၢတၢ်အုၣ်အသးအါမံၤ လၢပသးဒ့ဒီတသ့ဘၣ်’’ (မၤတၢ် ၁း၃) န့ၣ်လီၤႉ
ပတၢ်စူၢ်တၢ်နာ်အံၤ တဒိးသန့ၤထီၣ်အသး လၢတၢ်ကစီၣ်လၢပှၤဟးတဲဆူန့ၢ် ဆူအံၤ အဖီခိၣ်ဘၣ်ႉ မ့မ့ၢ်တခီ သူၣ်လီၤအသးလၢတၢ်ကွဲးနီၣ်ကွဲးဃါ လီၤတံၢ်လီၤဆဲး လၢအဘၣ်ဃးဒီး ကစၢ်ခရၠာစးံာ်အသးသမူန့ၣ်လီၤႉ အ၀ဲဟဲဆူဟီၣ်ခိၣ်ဒ်သိး ကမၤဃူမၤဖိး က့ၤပှၤ ဒီးကစၢ်ယွၤန့ၣ်လီၤႉ ကစၢ်အဂ့ၢ်အကျိၤ တုၤခဲအံၤ မ့ၢ်၀ဲတီ၀ဲစ့ၢ်ကီးန့ၣ်လီၤႉ