လၢအပူၤကွံာ်နံၣ်အါမးအပူၤ တနံၤတခီၣ်န့ၣ်‚ ယၤဒီးယဖိခွါဖိတဖၣ် ပဒါလီၤပချၢလၢ ပကရၠာစးၢၢ်ပူၤ ဒီးကွၢ်ကီတၢ်အၢၣ်တဖၣ်ဒံ လၢမူကပိာ်လိၤန့ၣ်လီၤႉ ‘ပၢ်ဧၢ’‚ ယဖိခွါတဂၤ သံကွၢ်၀ဲလၢ ‘ဘၣ်မနုၤတၢ်အၢၣ်တဖၣ် ယူၤလၢကလံၤကျါန့ၢ်လဲၣ်ႉ’ ‘ဂ့ၤလံဖိခွါ’ ယစးထီၣ်စံးကတိၤတၢ်‚ ယအဲၣ်ဒိးဟ့ၣ်အီၤ တၢ်လၢယသ့ၣ်ညါတဖၣ်ဒိၣ်ဒိၣ်အါအါ‚ ဘၣ်ဆၣ် မ့ၢ်လၢယကစံးအဂီၢ်တၢ်ဂ့ၢ်တအိၣ်အဃိ ယအိၣ် ဘရၣ်လီၤႉ ယအၢၣ်လီၤယသးလၢ ‘ယတသ့ၣ်ညါဘၣ်‚ ဘၣ်ဆၣ် ယကဃုသ့ၣ်ညါလၢနဂီၢ်’ န့ၣ်လီၤႉ
တၢ်အစၢလၢ ယဃုထံၣ်န့ၢ်န့ၣ် မ့ၢ်၀ဲ‚ ထံအသ၀ံလၢ ပာ်ဖှိၣ်ကဲထီၣ် ထံဖှံဖိတဖၣ်န့ၣ် မ့ၢ်လၢ ဟီၣ်ခိၣ်အတၢ်ထုးဃၢ သဟီၣ်အဃိ ဟဲလီၤဆူဟီၣ်ခိၣ်‚ ဒီးဘၣ်လိာ်သး ဒီးတၢ်ကိၢ်သဟီၣ် အိၣ်ဟဲထီၣ်လၢခိခိၣ် လၢအလၢၤဒိၣ်န့ၢ်အီၤ န့ၣ်လီၤႉ ဖဲန့ၣ် ထံသ၀ံထံဖှံတဖၣ်အံၤ ကဲထီၣ်၀ဲ ထံအလုၢ်ဖိ ဒီးယူၤထီၣ်ကဒါက့ၤဆူ ကလံၤကျါလီၤႉ တၢ်အံၤမ့ၢ်နှဆၢၣ် အတၢ်စံးဆၢပှၤ ဘၣ်ဃးပတၢ်ဃုသ့ၣ်ညါ နှဆၢၣ်အတၢ်မၤသးတဖၣ်န့ၣ်လီၤႉ
ဘၣ်ဆၣ် တၢ်အစၢလၢန့ဆၢၣ် ဟ့ၣ်ထီၣ်အတၢ်မၤသးတဖၣ်အံၤ တမ့ၢ် တၢ်အလၢအပှဲၤဒံးဘၣ်ႉ တၢ်အၢၣ်တဖၣ်ဒံ၀ဲ လၢကလံၤကျါန့ၣ် မ့ၢ်လၢကစၢ်ယွၤဟ့ၣ်လီၤ အကလုၢ် လၢန့ဆၢၣ်အတၢ်မ့ၢ်တၢ်တီတဖၣ်အံၤ ကမၤအသး ခီဖျိလၢအနီၢ်ကစၢ် အတၢ်ကူၣ်သ့အဃိ တၢ်တဖၣ်အံၤလီၣ်ဖျါထီၣ် ‘‘ပှၤလၢအတၢ်သ့ၣ်ညါလၢပှဲၤတဂၤ အတၢ်မၤလီၤလး’’ (ယိၤဘး ၃၇း၁၆) အဃိန့ၣ်လီၤႉ မ့မ့ၢ်ဒ်န့ၣ်န့ၣ်‚ တၢ်အၢၣ်တဖၣ်အံၤ ဘၣ်တၢ်ဆိကမိၣ်သ့ၣ်ညါအီၤ ဒ်အမ့ၢ်တၢ်ပနီၣ်တမံၤ‚ ကစၢ်ယွၤအတၢ်ဂ့ၤတၢ်၀ါဒီး တၢ်လၤကပီၤလၢအတၢ်ဘၣ်တ့အပူၤ‚ လၢအမ့ၢ်တၢ်အဒိပနီၣ်လၢအအိၣ်ဖျါထီၣ်လၢ တၢ်ချၢ/
အဃိ‚ မုၢ်တနံၤနံၤ ဖဲနကဟံးန့ၢ် တၢ်ဆၢကတီၢ်လၢ ကဃုထံၣ်တၢ်တမံၤမံၤ လၢတၢ်အၢၣ်အပူၤန့ၣ် သ့ၣ်နီၣ်ထီၣ်တၢ်အံၤတက့ၢ်ႉ ပှၤတဂၤလၢအမၤတၢ်ခဲလၢာ် အိၣ်ဒီးအဃံအလၤအံၤန့ၣ် မၤစ့ၢ်ကီးတၢ်အၢၣ်တဖၣ် ဒံလၢမူကပိာ်လိၤန့ၣ်လီၤႉ အ၀ဲဘၣ် မၤ၀ဲဒ်န့ၣ်န့ၣ်‚ မ့ၢ်ဒ်သိးပကဆိကမိၣ်ကွၢ်ထံတၢ် ဒီးသးအိၣ်အဲၣ်ဒိးသ့ၣ်ညါ ဒီးကပာ်ကဲ တၢ်ဒိၣ်ဒိၣ်အဂီၢ်လီၤႉ မူကပိာ်လိၤ‚ ထဲတၢ်အၢၣ်ကမှံဖိ‚ တၢ်အၢၣ်အယဲၤဖိ ဒီးတၢ်အၢၣ် ကိၢ်လိၢ်တဖၣ်ဒၣ်လဲာ် လီၣ်ဖျါထီၣ်ယွၤအလၤကပီၤန့ၣ်လီၤႉ