ဒီးကထၢၣ် ခၠါး ဒဘၠူး အဲလံယီးလၢ အမ့ၢ်တ့ၢ် ဟါဘၢး ဖၠၣ်စိမိၤအကၠိ အပှၤပၢၤလီၢ်ဆ့ၣ်နီၤ လၢအါနံၣ်အါလါအတီၢ်ပူၤ‚ နာ်၀ဲလၢ ပှၤပတီၢ်မုၢ်ဖိ လၢအဖး ဟီၣ်ခိၣ်အလံာ်ဧိၤလဲၢ်ဧိၤတဖၣ် တထံၣ်ဃီ တနံၤထဲစှၤမံးနံးဖိဒၣ်လဲာ်တဖၣ်န့ၣ်‚ မၤန့ၢ်တၢ်ကူၣ်သ့လၢ အလုၢ်ဒိၣ်ပရၤဒိၣ်တဖၣ်သ့၀ဲလီၤႉ ဖဲ ၁၉၁၀ နံၣ်န့ၣ်‚ အ၀ဲဃုထၢပာ်ဖှိၣ် တၢ်ကွဲးတဖၣ်လၢ လံာ်လဲၢ်ဘၣ်ဃးဒီး တၢ်စံၣ်စိၤတဲစိၤ‚ စဲအ့ၣ်‚ တၢ်ဆိကမိၣ်အဒိၣ်အယိာ်‚ ဒီးဒွဲလၤကူၣ်သ့ဃံလၤမုာ်မဲာ်တဖၣ်ဆူ လံာ်အက့တူၢ် ၅၀ က့တူၢ်‚ ဒီးကိး၀ဲလၢ ဟါဘၢး ကလးစ့း န့ၣ်လီၤႉ လံာ်တက့တူၢ်စုာ်စုာ်န့ၣ်ပာ်ဃုာ်ဒီး ဒီးကထၢၣ် အဲလံယီး အလံာ်နဲၣ်ကျဲလၢတၢ်ဖးလံာ်အဂီၢ်‚ အခိၣ်တီၤမ့ၢ်၀ဲ‚ ‘‘တနံၤတဆံယဲၢ်မံးနံး’’န့ၣ်လီၤႉ ဒီးလံာ်အပူၤန့ၣ် ဃုထၢဃာ်လံာ်ကဘျံး နီၢ်ဂံၢ် ၈ တုၤ ၁၀ အကဘျံး လၢအဘၣ်တၢ်ဟ့ၣ်ကူၣ်လၢ တၢ်ကဖးအီၤ ကိးနံၤဒဲးလၢ တနံၣ်အပူၤန့ၣ်လီၤႉ
ပမ့ၢ်ဖးယွၤအကလုၢ်ကထါတနံၤ တဆံယဲၢ်မံးနံးန့ၣ် တၢ်ကမၤအသး ဒ်လဲၣ်‚ ဃုာ်ဒီး ပှၤကွဲးထါစံးထီၣ်ပ့တၢၤန့ၣ်‚ ပစံးကသ့လၢ ‘‘ဒုးဃၣ်ကွံာ်ယမဲာ် လၢတၢ်ကလီကလီန့ၣ်တက့ၢ်ႉ ဒုးမူထီၣ်က့ၤယၤ လၢနကျဲနကပူၤန့ၣ်တက့ၢ်’’ (စံး ၁၁၉း၃၆-၃၇) ႉ
တနံၤ တဆံယဲၢ်မံးနံး မ့ၢ်ပာ်ဖှိၣ်အသးဒီး ကဲထီၣ် (၉၁) နၣ်ရၠာစးံၣ် လၢ တနံၣ်အပူၤန့ၣ်လီၤႉ ဘၣ်ဆၣ် လၢတၢ်ဖးယွၤအကလုၢ်အကထါ ကိးနံၤဒဲးအဂီၢ်‚ ပမ့ၢ် ပာ်လီၤ ဆၢကတီၢ်ဆံးအါဂ့ၤဆံးအါဂ့ၤ‚ တၢ်ခူသူၣ်တခီ မ့ၢ်၀ဲ တၢ်မၤသပှၢ်ပှၢ်‚ ဒီးတၢ်လၢ အကါဒိၣ်တမံၤန့ၣ် တမ့ၢ်တၢ်မၤအီၤ ဂ့ၤဂ့ၤကလဲာ်ဘၣ်‚ မ့မ့ၢ်တၢ်မၤအီၤလၢတၢ်စွံကတုၤတထံၣ်ဃီန့ၣ်လီၤႉ ပမ့ၢ်တဖးတသီ မ့တမ့ၢ် တနွံဘၣ်န့ၣ်‚ ပစးထီၣ် ဖးကဒီးသ့၀ဲန့ၣ်လီၤႉ ဒ်ယွၤအသးမုၢ်စီဆှံ သိၣ်လိပှၤအသိး‚ ယွၤအကလုၢ် အကထါ နုာ်လီၤလၢပသးအတၢ်ဆိကမိၣ်ဆူ ပသးကံၢ်ပူၤ‚ ဒီးဆူပစုပခီၣ်‚ ဒီးဒုးသ့ၣ်ညါနၢ်ပၢၢ်ပှၤ အမဲာ်ညါဆီတလဲကွံာ် ပတၢ်အိၣ်မူဒၣ်လဲာ်န့ၣ်လီၤႉ
‘‘ယွၤဧၢ‚ သိၣ်လိယၤလၢ နတၢ်မၤလိာ်အကျဲန့ၣ်တက့ၢ်ႉ ဒီးယကတိၢ်န့ၢ် ဖံးဃာ် တုၤအကတၢၢ်လီၤ’’ (း၃၃) ႉ