ပှၤလဲၤတၢ်လၢ လ့ၣ်မ့ၣ်အူအပူၤသ့ၣ်တဖၣ် ထံၣ်ဘၣ်၀ဲ ပှၤလၢအသးဒိၣ်ဒီး သူၣ်ဂဲၤသးဂဲၤ တဂၤ အတၢ်သူၣ်ဒိၣ်သးဒိၣ်သ့ၣ်တဖၣ် လီၤကဆှၣ်က့ၤ၀ဲလၢ လ့ၣ်မ့ၣ်အူအပူၤန့ၣ်လီၤႉ အ၀ဲသ့ၣ်ထံၣ် မိၢ်သးပှၢ် လၢအသးအိၣ် ၇၀ တဂၤ ယူာ်ဃီၤအစုဆူ ပှၤသးစၢ် လၢအသးဒိၣ်ဒီး သူၣ်ဟူးသးဂဲၤ‚ ကိးထီၣ်လၢ အကလုၢ်ဖးဒိၣ်‚ ဒီးမၤပျံၤ ပှၤလၢအလဲၤ တၢ်သ့ၣ်တဖၣ် တဂၤအအိၣ်လီၤႉ မိၢ်သးပှၢ်အံၤ လၢကလုၢ်ကပုာ်လုးဖိအပူၤ‚ မၤလီၤကဆှၣ်ကွံာ် ပှၤသးစၢ်အံၤ အတၢ်သးဒိၣ်လီၤႉ သးစၢ်အံၤ စံးဘၣ် သးပှၢ်မုၣ် ‘တၢ်ဘျုးလီၤ ဖံဧၢ’၀ံၤဒီး ဆၢထၢၣ်ဒီးဟးကွံာ်၀ဲဒၣ်လီၤႉ လၢခံန့ၣ် မိၢ်သးပှၢ်တဂၤအံၤ အၢၣ်လီၤ၀ဲလၢ သါပျံၤတၢ်ကစီဒီလီၤႉ ဘၣ်ဆၣ် အ၀ဲစံး၀ဲ ‘‘ဒ်ယမ့ၢ်မိၢ်တဂၤအသိး‚ လိၣ်ဘၣ်လၢ ယကယူာ်ဃီၤယစုဆူ ပှၤတဂၤဂၤအအိၣ်လီၤ’’ ဂ့ၤ၀ဲဘၣ်၀ဲ လၢမိၢ်သးပှၢ်အံၤ ကစံၣ်ညီၣ်တဲာ်၀ဲ လၢကအိၣ်ယံၤယံၤဒီးပှၤ အံၤလီၤႉ ဘၣ်ဆၣ် အ၀ဲဒၣ်ယူာ်ဃီၤအစု‚ တၢ်အဲၣ်အစု လၢတၢ်ဘၣ်ယိၣ်ဘၣ်ဘှီ ဒီးတၢ်ကီတၢ်ခဲအပူၤလီၤႉ
ကစၢ်ခရၠာစးံာ် သ့ၣ်ညါနၢ်ပၢၢ်၀ဲ တၢ်သးဆူၣ်ဒိၣ်မးလၢ တၢ်သးကညီၤ‚ ဒီးတၢ်သးအိၣ်မၤစၢၤ ပှၤလၢအတူၢ်ဘၣ်ခီၣ်ဘၣ်ဒ်သိးအံၤတဖၣ်လီၤႉ ကစၢ်ခရၠာစးံာ် တဃၣ် ကဒါကွံာ်အသး လၢတၢ်ပျံၤအပူၤ‚ ဖဲပှၤလၢအဘၣ်တၢ်ဆါအၢတဂၤ‚ ဃ့ကညးအီၤ လၢကမၤဘျါက့ၤန့ၢ်အီၤဘၣ်ႉ မ့မ့ၢ်တခီ ယူာ်ဃီၤအစုဒီး ထိးဘၣ်အီၤ ဒ်သိး ကဘျါက့ၤ၀ဲဒၣ်န့ၣ်လီၤႉ အ၀ဲတလီၤဂာ်ဒီး တၢ်ဘူၣ်တၢ်ဘါအခိၣ်သ့ၣ်တဖၣ်ဘၣ်ႉ တၢ်ဘူၣ်တၢ်ဘါအခိၣ် လၢအမ့ၢ်ပှၤလုၢ်တၢ်အဒိၣ်သ့ၣ်တဖၣ်စံၣ်ညီၣ်၀ဲ ပှၤလၢအဘၣ် တၢ်ဆါအၢသ့ၣ်တဖၣ်လီၤ ( ၃မိၤ ၁၃း၄၅-၄၆) ႉ မ့မ့ၢ်‚ ယ့ၣ်။းတခီ ယူာ်ဃီၤအစုဒီး ထိးဘၣ်အီၤ‚ ဒီးမၤဘျါက့ၤ ပှၤဘၣ်တၢ်ဆါအၢန့ၣ်လီၤႉ
တၢ်ဘျုးလီၤ ကစၢ်ဧၢ‚ လၢပှၤလၢအဘၣ်တၢ်ဆါအၢ‚ ဒီးပ၀ဲသ့ၣ်တဖၣ်အဂီၢ် ကစၢ်ခရၠာစးံာ်ဟဲ၀ဲဒီး‚ တဟ့ၣ်လီၤပှၤ တၢ်သိၣ်တၢ်သီနီတထံၣ်ဘၣ်ႉ အ၀ဲထိးဘၣ် ပနီၢ်ခိဒီးပနီၢ်သးလီၤႉ