ဖဲယမၤန့ၢ်သီ တံၤသကိးအသီလၢ ထံဂုၤကီၢ်ဂၤတဂၤအခါ‚ ယပာ်သူၣ်ပာ်သးလၢ အ၀ဲကတိၤ အဲကလံးကျိာ် အသီၣ်လီၤဆီလၢ အပာ်ဖျါအတီၤလၢအထီ‚ ဒီးအ၀ဲ သိးဃာ်ပသံးတဘိလၢ အစုဆၣ်အလိၤန့ၣ်လီၤႉ လၢခံ ယသ့ၣ်ညါဘၣ်လၢ တၢ်အံၤတမ့ၢ် တၢ်ကယၢကယဲလုၢ်ဒိၣ်ပရၤဒိၣ်ဘၣ်‚ မ့ၢ်တၢ်လၢ အပာ်ဖျါ အဟံၣ်ဖိဃီဖိ အတၢ်စံၣ်စိၤတဲစိၤ ခီဖျိအဒူၣ်ဖိထၢဖိအတၢ်ပနီၣ် စိးပျၤဃာ်လၢအလိၤ န့ၣ်လီၤ
တၢ်အံၤ ကမိၣ်လီၤဂာ်ဒီး တၢ်စဲဃာ်ပနီၣ်‚ ဘၣ်သ့ၣ်သ့ၣ် ဒ်လၢလံာ်ဃးကဲအပူၤတဘိအသိးန့ၣ်လီၤႉ ဖဲလံာ်စီဆှံအလီၢ်လံၤတက့တူၢ် အလံာ်ဖုၣ်ဖိတဘ့ၣ် အံၤအပူၤ‚ ၀ံဃးကဲကိးထီၣ် ယွၤအပှၤဂီၢ်မုၢ်တဖၣ်လၢ ကသူၣ်ထီၣ်ဘှီထီၣ်က့ၤ တၢ်လုၢ်ဟံၣ်အဂီၢ်လီၤႉ အ၀ဲသ့ၣ် ဘၣ်တၢ်ဟီထီၣ်ကွံာ်‚ ဒီးအခဲအံၤ ဟဲက့ၤကဒါက့ၤဆူ အထံအကီၢ်ဒီး စးထီၣ်သူၣ်ထီၣ်ကဒီးလံႉ ဘၣ်ဆၣ် ဒုၣ်ဒါအတၢ်ထီဒါ ဆိကတီၢ်ဃာ် အ၀ဲသ့ၣ်အတၢ်တိာ်ကျဲၤန့ၣ်လီၤႉ ၀ံဃးကဲအတၢ်ကစီၣ် ပာ်ဃုာ်ဒီး ယွၤအတၢ်အၢၣ်လီၤဆူ ယူဒၤအခိၣ် စီၤစ့ှူၤဘၤဘ့လးလၢ အ၀ဲဘၣ်တၢ်ဃုထၢထီၣ်လံအီၤဒီး ပာ်အီၤလီၤဆီ ဒ်အပှၤဆှၢတၢ်အသိး‚ ဒ်တၢ်စဲဃာ်ပနီၣ်အသိး န့ၣ်လီၤႉ
ဆၢကတီၢ်လၢပျၢၤ‚ တၢ်စဲဃာ်ပနီၣ်န့ၣ် ဘၣ်တၢ်သူအီၤ ဒ်တၢ်အုၣ်သးတမံၤ အသိးလီၤႉ လၢတၢ်ဆဲးလီၤမံၤအလီၢ်န့ၣ်‚ ပှၤတဖၣ်ဆီၣ်တံၢ်အပသံးဆူ ကနဲဃိး ကိၢ်သွး မ့တမ့ၢ် ကပံာ်ပှဲာ်အလိၤပူၤ ဒ်သိးကမၤနီၣ် အတၢ်ပနီၣ်အဂီၢ်လီၤႉ ဒ်ယွၤအဖိ တဖၣ်အသိး‚ ပမၤပနီၣ်တၢ်လၢဟီၣ်ခိၣ်ချၢ‚ ဖဲပရၠာစးၤလီၤတၢ်သးခုကစီၣ်‚ ပနီၤဟ့ၣ် ယွၤအဘျုးအဖှိၣ် ခီဖျိတၢ်အဲၣ်ပှၤလၢပဃၢၤ‚ ဒီးပမၤကတၢၢ် တၢ်ဆီၣ်ဘံၣ်ဆီၣ်ဘၢ အခါန့ၣ်လီၤႉ
ပ၀ဲကိးဂၤဒဲး‚ ပအိၣ်ဒီး ပတၢ်ပနီၣ် လီၤဆီဒၣ်၀ဲ‚ လၢအပာ်ဖျါထီၣ်ယွၤအက့ၢ် အဂီၤ ဒ်အတ့ပာ်လၢပပူၤ ဒီး ပတၢ်ဟ့ၣ်‚ တၢ်သးစဲ‚ ဒီးတၢ်ကူၣ်သ့လၢအအိၣ်ဃါဃုာ် အသး လီၤလီၤဆီဆီန့ၣ်လီၤႉ တၢ်အံၤ မ့ၢ်အတၢ်ကိးပှၤဒီး တၢ်ခွဲးတၢ်ယာ်လီၤဆီ လၢ ပကမၤတၢ်ဒ်တၢ်စဲဃာ်ပနီၣ်လၢ ယွၤအဟီၣ်ခိၣ်ချၢအံၤန့ၣ်လီၤႉ ဗာပ Bသကခ့နမ ာ်ပန