ဖဲ ၁၉၉၇ နံၣ်န့ၣ်, အဲၣ်အိၣ်ဝၣ် (Iowa) ကီၢ်စဲၣ်ဖၠၣ်ဖိမိၤ ယုၢ်န့ၢ် အတၢ်လိာ်ကွဲဖျၢၣ်ထူပျီ တၢ်သူၣ်ထီၣ်အမံၤလၢ ကၠဲး ထရဲး(စ) (Jack Trice), ပှၤသူဖံးကၠိဖိလၢ အလိာ်ကွဲ ဖျၢၣ်ထူအဆိကတၢၢ်တဂၤအမံၤန့ၣ်လီၤ. တၢ်လၢအလီၤသးအုးတမံၤန့ၣ် ထရဲး(စ) တလိာ်ကွဲဘၣ်ဝဲနီတဘျီလၢ ဝ့ၢ်ဒိၣ် အဲ(မ)(စ) (Ames), လၢကီၢ်စဲၣ် အဲၣ်အိၣ်ဝၣ် န့ၣ်ဘၣ်. အဝဲသံဝဲဒၣ်, ခီဖျိလၢအနီၢ်ခိအလဲပူၤ အတၢ်ဘၣ်ဒိဘၣ်ထံး, ဖဲအလိာ်ကွဲ ခီလ့ၣ်ကၠိ အတၢ်လိာ်ကွဲပြၢခံဘျီတဘျီ ဖဲဝ့ၢ် မ့နံၣ်အၤပိၣ်လ့း(စ) (Minneapolis), လၢကီၢ်စဲၣ် မ့နံၣ်စိတၤ (Minnesota), ဖဲလါအီးကထိဘၢၣ် (၆) သီ, ၁၉၂၃ နံၣ်န့ၣ်လီၤ.
တချုးတၢ်လိာ်ကွဲဖျၢၣ်ထူအနၤန့ၣ်, ထရဲး(စ) ကွဲးဝဲဒၣ် လံာ်ဖုၣ်ဖိတဘ့ၣ်ဆူ အနီၢ်ကစၢ်ဒၣ်ဝဲအဂီၢ်, အုၣ်အသးလၢ အတၢ်ပာ်လီၤသးကျၢၤမုဆှုအဂ့ၢ် – “ယပှၤကလုာ်, ယဟံၣ်ဖိဃီဖိ, ဒီးယနီၢ်ကစၢ် အတၢ်လၤကပီၤန့ၣ် သန့ၤထီၣ်အသးလၢ ယတၢ်တိာ်တၢ်မၤတမံၤအံၤန့ၣ်လီၤ. ပှၤကိးဂၤဒဲး မုၢ်လၢ်ဝဲဒၣ်လၢ ယကမၤတၢ်အဒိၣ် တဖၣ်န့ၣ်လီၤ. ယတိာ်ပာ်လၢယကမၤယဲလီၤ. ခဲဂီၤန့ၣ် ယကလိာ်ကွဲယဲလၢနီၢ်ခိနီၢ်သး, လၢာ်သူၣ်လၢာ်သး လၢတၢ်လိာ်ကွဲအပျီပူၤန့ၣ်လီၤ. ဖဲလၢယဖီၣ်န့ၢ် ဖျၢၣ်ထူတဘျီလၢ်လၢ်န့ၣ်, ယကဂုာ်ကျဲးစၢး လိာ်ကွဲဒိၣ်ဒိၣ်အါအါ, ဒီးမၤလၢပှဲၤယမူဒါန့ၣ်လီၤ.” တၢ်လၢအမၤဝဲန့ၣ် အိၣ်ဟဲကဲထီၣ်အသးလၢ အတၢ်မ့ၢ်တၢ် အလၤကပီၤ, ဒီးအသူးသ့ၣ်ကံၢ်စီ, ဒီးသဆၣ်ထီၣ် တၢ်သူၣ်ဒူသးဒူလၢအဂီၢ်န့ၣ် ထရဲး(စ) သ့ၣ်ညါနၢ်ပၢၢ်ဝဲဒၣ်ဒိၣ်ဒိၣ်ယိာ်ယိာ်န့ၣ်လီၤ.
ပှၤအ့ဖ့းစူးဖိတဖၣ်အဂီၢ်, ပှၤတၢ်မၢဖိ စီၤပီလူး အလံာ်ပရၢအပူၤ, အတၢ်ပာ်ဖျါန့ၣ် လီၤဂာ်ဒီး ထရဲး(စ) အတၢ်ကတိၤန့ၣ်လီၤ. စီၤပီလူး တၤဝဲဒၣ် ပှၤစူၢ်က့ၤနာ်က့ၤတၢ်ဖိတဖၣ် ဒ်သိးကပျဲအတၢ်မ့ၢ်တၢ်လၢ ကစၢ်ခရံာ်အပူၤန့ၣ် ကလုာ်ဘၢဒိၣ်စိ ကယဲၢ်တၢ်လၢအဝဲသ့ၣ်ဆၢတဲာ်ဝဲတမံၤလၢ်လၢ်အပူၤ- “ပှၤလၢအဘၣ်ဃိာ်လၢကစၢ်အဃိ, ယဲဒၣ်အံၤ, ယဃ့ကညးသု ဒ်သိးသုကလဲၤဒ်အကြၢးဒီးတၢ်ကိးလၢ တၢ်ကိးက့ၤသုအသိး” (အ့ဖ့း ၄:၁) န့ၣ်လီၤ. စီၤပီလူး တၤပှၤ ဒ်သိးပကဟံးဃာ် တၢ်အိၣ်မူအကျိၤကျဲလၢ အဘၣ်တၢ်ဘှီအီၤ သိအီၤ ခီဖျိလၢကစၢ်ယ့ၣ်ရှူး အတၢ်မၤလၢပဂီၢ်, လၢပပူၤ, ဒီးခီဖျိလၢပှၤ- တၢ်အိၣ်မူလၢအဒုးအိၣ်ထီၣ် တၢ်ဆီၣ်လီၤသး, တၢ်သူၣ်စူၤသးစူၤ, တၢ်ဝံသးစူၤ, တၢ်သးတဖျၢၣ်ဃီ, တၢ်အဲၣ်တၢ်ကွံ, ဒီးတၢ်ဃူတၢ်ဖိး (:၂-၃), ဒ်ပဒိးသူ တၢ်ဟ့ၣ်တဖၣ် လၢကစၢ်ယွၤဟ့ၣ်ပှၤ ဖဲပမၤဂ့ၤမၤစၢၤလိာ်သးကဒဲကဒဲအကတီၢ် (:၁၅-၁၆) န့ၣ်လီၤ.
