တၢ်ဂ့ၢ်ခိၣ်တီလၢ လါမ့ၤ | ကဲထီၣ် တၢ်တမံၤဃီလၢခရံာ်အပူၤ
လၢနံၣ်ကယၤတဖၣ်အပူၤန့ၣ် ပှၤစူၢ်က့ၤနာ်က့ၤတၢ်တဖၣ် မုာ်လၤသးခုဘၣ်ဝဲ တၢ်ကဲထီၣ်တမံၤဃီဒီးယွၤလၢခရံာ်အပူၤ န့ၣ်လီၤ. တၢ်အံၤမ့ၢ်တၢ်အဒိၣ်အယိာ်တမံၤ လၢပှၤကမၢ ကမၣ်ဒီး နၢ်ပၢၢ်ဝဲတသ့ဘၣ်န့ၣ်လီၤ. ဖြၣ်စ့ၣ်သီခါ ဘါနၢးဒ် လၢကလဲပိၢ်လီၢ်ကဝီၤ (Bernard of Clairvaux) လၢ နံၣ်ကယၤ ၁၂, တဲနၢ်ပၢၢ် တၢ်မ့ၢ်တၢ်တီအဒိၣ်အယိာ် လၢအလီၤလိၢ်လီၤလးအံၤ ခီဖျိ မုၢ်ဆ့ၣ်မုၢ်ဂီၤ တၢ်မၤအသးတမံၤန့ၣ်လီၤ. အဝဲစံးလၢ တၢ်ကဲထီၣ် တၢ်တမံၤဃီ စံးတၢ်န့ၣ် မၤအသးဒ်ထံတလီၤစီၤ လီၤတဲာ်ဆူစပံးထံအပူၤ ဒီးဃါဃုာ်လိာ် အသးဒီး စပံးထံ အသိး, တၢ်ကပီၤဖိတဖီး ကပီၤထီၣ်လၢမူကပိာ်လိၤအသိးန့ၣ်လီၤ.
ကစၢ်ယ့ၣ်ရှူး အၢၣ်လီၤဝဲလၢ အဝဲကအိၣ်ကဆိးလၢ ပှၤလၢအပိာ်အခံတဖၣ် အပူၤန့ၣ်လီၤ. ဖဲအဟံးန့ၢ် ဟါတၢ်အီၣ်ဝံၤ အလီၢ်ခံ အဝဲကတိၤသကိးတၢ်ဒီး အတံၤသကိးတဖၣ်အခါ အဝဲဟ့ၣ်ဂံၢ်ဟ့ၣ်ဘါအဝဲသ့ၣ်လၢ “ယတပာ်လီၤတဲာ် ဖိၣ်ဃဲဘၣ်သုဘၣ်, ယကဟဲက့ၤဆူ သုအိၣ်”န့ၣ်လီၤ(ယိၤ ၁၄:၁၈). မ့ၢ်အမူဒီး အဝဲသ့ၣ်ကမူစ့ၢ်ကီးလီၤ. “လၢမုၢ်တနံၤန့ၣ် သုကသ့ၣ်ညါလၢ ယအိၣ်လၢ ပၢ်အပူၤ, ဒီးသုအိၣ်လၢယပူၤ, ဒီးယအိၣ်လၢသုပူၤလီၤ.“ (:၂၀). ဒ်သးစီဆှံအိၣ်လၢယွၤ အပူၤ ဃုာ်ဒီးကစၢ်ယ့ၣ်ရှူး အသိးန့ၣ် ပအိၣ်ဆိးလၢကစၢ်အပူၤဒီး ကစၢ်စ့ၢ်ကီး အိၣ်ဆိးလၢပပူၤ န့ၣ်လီၤ.
ပလိၣ်ဘၣ်တၢ်တဲနၢ်ပၢၢ်ပှၤ ခီဖျိတၢ်အဒိလၢမုၢ်ဆ့ၣ်မုၢ်ဂီၤတၢ်မၤအသးသ့ၣ်တဖၣ်န့ၣ် တမ့ၢ်တၢ်လီၤကမၢကမၣ်ဘၣ်. ကစၢ်ယွၤ အိၣ်ဆိးလၢပပူၤ ခီဖျိခရံာ်ဒီး သးမုၢ်စီဆှံအဂ့ၢ်န့ၣ် မ့ၢ်တၢ်ဒ်လဲၣ်, ဖဲပဆိကမိၣ်အီၤဒီး ပနၢ်ပၢၢ်အီၤကီဒိၣ်မးလီၤ. လၢကိးမုၢ်နံၤ ပတၢ်အိၣ်မူအပူၤန့ၣ် တၢ်အံၤ အခီပညီမ့ၢ်မနုၤလဲၣ်. မ့ၢ်လၢကစၢ်ယ့ၣ်ရှူးအိၣ်ဆိးလၢပသးပူၤအဃိ ဖဲပကွၢ်ဆၢၣ်မဲာ်ဘၣ်ဒီး တၢ်တလီၤတံၢ်ဒီးတၢ်လၢပသ့ၣ်ညါအီၤတသ့တဖၣ်အကတီၢ်န့ၣ် ပထံၣ်န့ၢ် တၢ်သးမံသးမုာ်သ့, ဖဲပအိၣ်ဒီး တၢ်ကိၢ်တၢ်ဂီၤအခါ ပထံၣ်န့ၢ် တၢ်ဃူတၢ်ဖိးသ့န့ၣ်လီၤ. ဖဲပဘၣ်တၢ်ကတိၤ တရီတပါအခါ ပအိၣ်ဒီး တၢ်ပၢၤသူၣ်ပၢၤသး, ဒ်သိးပသုတမၤဆၢက့ၤတၢ် တလၢအခၢးန့ၣ်လီၤ. ဒီးလၢပှၤဘၣ်တၢ်ဆီၣ်ဘံၣ်ဆီၣ်ဘၢဒီးဘၣ်တၢ် မၤနၢၤတဖၣ်အဂီၢ် ပကိးပသူထီၣ် ထီဒါတၢ်တတီတလိၤ သ့ဝဲန့ၣ်လီၤ.
လၢသူၣ်လၢသးတခီန့ၣ် ခရံာ်အိၣ်လၢပပူၤန့ၣ်လီၤ. မုၢ်တနံၤအံၤ မ်ပကဆိကမိၣ်သကိး တၢ်မ့ၢ်တၢ်တီအံၤဒီး ဃ့ထုကဖၣ်လၢ ယွၤကဒုးထံၣ်ပှၤ အဝဲအတၢ်ဘှီဘၣ်ဆီတလဲပှၤလၢ ပအိပူၤန့ၣ်တက့ၢ်.
Amy Boucher Pye | ကိၣ်လၢတနံၤဘၣ်တနံၤ ပှၤကွဲးလံာ်
တၢ်ပိာ်ယွၤအခံ, တၢ်သးအိၣ်လၢ တၢ်ကကဲထီၣ်တၢ် ဒ်တၢ်ဘၣ်ယွၤအသးထီဘိ မ့ၢ်တၢ်လၢအကီလီၤ. ဘၣ်ဆၣ် ဒ်သိး ပကမၤ တၢ်ဂ့ၤန့ၢ်အန့ၣ်အဂီၢ် ယွၤတပာ်တ့ၢ်ပှၤ ဒ်သိးပကဂုာ်ကျဲးစၢးပကစၢ်ဒၣ်ပဝဲန့ၣ်ဘၣ်. တလါညါအံၤပကမၤလိခရံာ်အတၢ်အိၣ်ဆိး လၢပပူၤ ခီဖျိသးမုၢ်စီဆှံဒီး, ပတၢ်ပာ်ဖှိၣ်သးဒီးခရံာ်အဂ့ၢ်န့ၣ်လီၤ. အအံၤမ့ၢ် တၢ်ကဲထီၣ် တၢ်တမံၤဃီ လၢခရံာ်အပူၤန့ၣ်လီၤ.