တၢ်ဂ့ၢ်ခိၣ်တီလၢ လါအ့ဖြ့ၣ်အဂီၢ် | တၢ်အဲၣ်ပှၤအဂုၤအဂၤ
ဖဲယသံကွၢ် ဖိသၣ်သးစၢ်တနီၤလၢ တၢ်အဲၣ်စံးတၢ် မ့ၢ်မနုၤလဲၣ်န့ၣ်, အဝဲသ့ၣ် အတၢ်စံးဆၢတဖၣ် လီၤနံၤတနီၤ, ဒီးလီၤဆိကမိၣ် တနီၤန့ၣ်လီၤ. ပှၤအသးအိၣ်လွံၢ်နံၣ်ဖိ အဲၣ်ဒၢၣ်မ် စံးဆၢလၢ “တၢ်အဲၣ်တၢ်ကွံမ့ၢ် တၢ်အခီပညီတမံၤလၢ အပာ်ဖျါဝဲလၢ ပှၤကိးဂၤန့ၣ် အိၣ်ဒီးအဟံၣ်ဖိဃီဖိန့ၣ်လီၤ.”
ဖိသၣ်မုၣ်ဖိတဂၤစံးလၢ “ယဖံန့ၣ် အိၣ်ဒီးဃံကွဲထူၣ်ပျၢ်တၢ်ဆါအဃိ ကတကူးလီၤအသးဒီး ကမၤဂ့ၤ အခီၣ်မ့ၣ်န့ၣ် မၤဝဲတသ့ ဘၣ်. တၢ်န့ၣ်အဃိ ယဖုဘၣ်မၤဂ့ၤန့ၢ်အီၤန့ၣ်လီၤ. ယဖုစ့ၢ်ကီး အစုအထူၣ်အပျၢ်ဆါနာ်က့ မၤန့ၢ်အီၤ တုၤခဲကနံၣ်အံၤလီၤ.”
ဖုတဂၤအတၢ်ဟ့ၣ်လီၤအသးအံၤ ဖျါဃံလၤလီၤအဲၣ်ဒီး ဒုးသ့ၣ်နီၣ်ပှၤလၢ လံာ်စီဆှံအပူ လီၤလးတယုၢ်န့ၣ်လီၤ. ကစၢ်ယ့ၣ်ရှူး သ့ၣ်ညါဝဲလၢ တၢ်အကတီၢ်ဘူးထီၣ်လံလၢ အဂီၢ် လၢကဘၣ်တၢ်ဖီၣ်န့ၢ်အီၤဒီး ကဘၣ်တၢ်ပျၤထီအီၤလၢ ထူၣ်စုညါ အလိၤ, ကအိၣ်ဒီးအပျဲၢ်အဘီၣ်တဖၣ် တသ့လၢၤဘၣ်အဃိ “…ဂၢ်လီၤထံလၢသရာ်ပူၤ ဒီးသ့ကွံာ် အပျဲၢ်အဘီၣ် အခီၣ် ဒီးတြူာ်ကွံာ်ဝဲလၢ တၢ်ဝါ လၢအကံၢ်တူာ်အယီၢ်ဒ့န့ၣ်လီၤ”(ယိၤ ၁၃). စီၤပ့းတရူး ဆိကမိၣ်ထီၣ်လၢ အသးပူၤ အဝဲမ့ၢ်ကစၢ်ဒီးယွၤ, ကဟဲသ့ယခီၣ်လၢ ဘၣ်အၢဘၣ်သီန့ၣ် တကြၢးဘၣ်န့ၣ်လီၤ. ကစၢ်ယ့ၣ်ရှူးစံးဝဲ “သုသရၣ် ဒီးသုကစၢ်ယၤအံၤ ယမ့ၢ် သ့ကွံာ်သုခီၣ်ဒီး သုဂ့ၤသ့ကွံာ် သုခီၣ် သကိးသကိးလီၤ”(:၁၂-၁၄). မၤသးဒ်န့ၣ်ဒီး တၢ်မၤတၢ်ခ့တၢ်ပှၤအတၢ် မ့ၢ်တၢ်ဒ်လဲၣ်န့ၣ် အကစၢ် သိၣ်လိအဝဲသ့ၣ်န့ၣ်လီၤ.
ကစၢ်ယ့ၣ်ရှူးသိၣ်သီ အပျဲၢ်အဘီၣ် သၢနံၣ်ဝံၤအလီၢ်ခံန့ၣ် အဝဲတူၢ်သံအသးလၢ ပတၢ်ဒဲးဘးအဃိန့ၣ်လီၤ. တၢ်ဆီၣ်လီၤသးဒီး တၢ်စူးကွံာ်ညိကွံာ်အသးအံၤ မ့ၢ် တၢ်အဲၣ်အန့ဆၢၣ်လၢအတီန့ၣ်လီၤ.
မၤသးဒ်န့ၣ်ဒီး မ့ၢ်ပကမၤလိဒီး ဟ့ၣ်ခီ တၢ်အဲၣ်လၢအစူးကွံာ်ညိကွံာ်အသး ကသ့ဒ်လဲၣ်. အဆိကတၢၢ် ပကဘၣ်ဃ့ တၢ်နဲၣ်ကျဲလၢ ယွၤအအိၣ်န့ၣ်လီၤ. ယွၤမ့ၢ်ပှၤလၢအတ့လီၤပှၤ ဒီးဟ့ၣ်ပှၤတၤလၣ်, တၢ်သ့တၢ်ဘၣ် လၢပကစူးကါအီၤ ဖဲပမၤပှၤဂၤအတၢ်န့ၣ်လီၤ.
မ်ပကအိၣ်ဒီး တၢ်ပလီၢ်ပဒီသး လၢပကမၤပှၤဂၤအတၢ် ဆူပှၤအိၣ်လၢပခိၣ်ပဃၢၤ တဖၣ်အဂီၢ်တက့ၢ်. မၤစၢၤပှၤ တဂၤဂၤ လၢအတၢ်မၤအပူၤ မ့တမ့ၢ် လၢအတၢ်လိၣ်အဂီၢ်တက့ၢ်. လုၢ်အီၣ်လုၢ်အီ ပှၤလၢနဃၢၤ မ့တမ့ၢ် ပှၤစီစၣ် လၢတၢ်အီၣ်တက့ၢ်. ဃ့ထုကဖၣ်န့ၢ်ပှၤတဂၤဂၤ လၢနတပာ်သူၣ်ပာ်သး မ့တမ့ၢ် လၢနတကနၣ်ဃုာ်တဂၤအဂီၢ်တက့ၢ်.
မုၢ်တနံၤအံၤ မ့ၢ်နကသ့ပှၤတဂၤဂၤအခီၣ်ဒ်လဲၣ်.
Anne Cetas| ကိၣ်လၢတနံၤဘၣ်တနံၤ ပှၤကွဲးလံာ်
ပှၤကိးဂၤဒဲး အဲၣ်ဒိးဝဲလၢ ကဘၣ်တၢ်အဲၣ်အီၤ တီတီ, ကဘၣ်တၢ်တူၢ်လိာ်အီၤန့ၣ်လီၤ. တလါညါအံၤ ပကမၤလိသကိး ယွၤအတၢ်အဲၣ်လၢ အစူးကွံာ်ညိကွံာ်အသးအန့ဆၢၣ်အမ့ၢ်အတီ, ပလုၢ်ပပှ့ၤဒီးပတၢ်မ့ၢ်တၢ်အတီဒ်ပမ့ၢ်ယွၤအဖိ အဂ့ၢ် န့ၣ်လီၤ. မ်နကဘၣ်တၢ်ထိၣ်ဂဲၤနၤ လၢနကသိၣ်လိ ယွၤအတၢ်အဲၣ်လၢအဟ့ၣ်လီၤအသးဒီးတူၢ်ဆါအသးန့ၣ်တက့ၢ်.လီၤ.