ဟီၣ်ခိၣ်ဒီဘ့ၣ်တၢ်ဒုးခံဘျီတဘျီအဂ့ၢ် လံၥ်တဘ့ၣ်အပူၤန့ၣ်, ယဖးဘၣ် တၢ်လူၢ်ခိၣ် ၆၀၉ အတၢ်ဒုးတၢ်ယၤအဂ့ၢ်, လၢအၤဖရံၤကၤ-ကလံၤစိးတကပၤ, ဖဲယပၢ်ဘၣ်ဒိဘၣ်ထံး နးနးကလဲၥ်န့ၣ်လီၤ. တၢ်ဒုးတၢ်ယၤအဂ့ၢ်အကျိၤတဖၣ်န့ၣ် ယသ့ၣ်ညါတ့ၢ်ဝဲဘၣ်ဆၣ်, တၢ်ကွဲးပာ်ဖျါထီၣ်က့ၤအီၤ လီၤတံၢ်လီၤဆဲးအဃိ, ဖဲယဖးဘၣ်အီၤန့ၣ်ဒီး, ယဒိးန့ၢ်တၢ်ထံၣ်အသီ ဘၣ်ဃးဒီးတၢ်ဒုးတၢ်ယၤအမုၢ်နံၤလၢ ယပၢ်ဘၣ်လဲၤခီဖျိဝဲဒၣ်န့ၣ်လီၤ.

ဖဲပဖးဘၣ် ၦၤကညီတဖၣ်အဂ့ၢ် လၢလံၥ်စီဆှံအပူၤန့ၣ်ဒီး, မ့ၢ်တၢ်ကမၤအသး ဒ်သိးအံၤစ့ၢ်ကီးဧါ. အဒိန့ၣ်, ပကနၢ်ဟူဘၣ် ၦၤတဂၤဂၤ စံးဝဲဒၣ်လၢ နီၢ်မၤရံမၤကဒါလ့ၣ် မ့ၢ်တၢ်အဒိအတဲာ် လၢပှၤအသးတီဒီးကစၢ်ယ့ၣ်ရှူးန့ၣ်လီၤ. ဘၣ်ဆၣ်, ဖဲပဖးဘၣ် နီၢ်မၤရံမၤကဒါလ့ၣ် ဟ့ၣ်လီၤအသးလၢ ကစၢ်ယ့ၣ်ရှူးအဂီၢ်, ဖဲခရံၥ်ဂဲၤဆၢထၢၣ်သမူထီၣ်က့ၤ အမုၢ်တနံၤဂီၤဂီၢ်, “လၢမုၢ်နွံနံၤအကျါ, မုၢ်ခီၣ်ထံးတနံၤဂီၤဂီၤ, တၢ်ခံးဒံးန့ၣ်, ၦၤမၤကဒါလ့ၣ်ဖိနီၢ်မၤရံ လဲၤဆူတၢ်သွၣ်ခိၣ်” (ယိၤ ၂၀:၁) အဂ့ၢ်န့ၣ်ဒီး, ပနၢ်ပၢၢ်အါထီၣ် ၦၤမၤကဒါလ့ၣ်ဖိ နီၢ်မၤရံ အတၢ်စူၢ်တၢ်နၥ်န့ၣ်လီၤ. တၢ်ဂ့ၢ်လၢခံတမံၤန့ၣ် ၦၤမၤကဒါလ့ၣ်ဖိနီၢ်မၤရံ ထံၣ်ဝဲဒၣ် “လၢၢ်အိၣ်လၢတၢ်သွၣ်ခိၣ်အပူၤန့ၣ် တလ့ၣ်ကွံၥ်အသး” အဃိ, အသးတူၢ်ဘၣ်ခီၣ်ဘၣ်ဝဲ တၢ်သးသဘံၣ်ဘုၣ်, တၢ်နးတၢ်ဖှီၣ်, ဒီးတၢ်သူၣ်အုးသးအုးန့ၣ် ပသးကလၢၢ်ဘၣ်စ့ၢ်ကီးန့ၣ်လီၤ. လၢခံအကတၢၢ်တမံၤန့ၣ် ဖဲ “ယ့ၣ်ရှူးစံးဘၣ်အီၤ, နီၢ်မၤရံဧၢ” (:၁၆) အကတီၢ်, လၢအသးပူၤ ကတူၢ်ဘၣ်ဝဲ တၢ်ကမၢကမၣ်နီၢ်နီၢ်န့ၣ် ပသးကလၢၢ်ဘၣ်ဝဲဒၣ်န့ၣ်လီၤ.

တၢ်ဖးမၤလိ လံၥ်စီဆှံအတၢ်ကွဲးနီၣ်အမ့ၢ်အတီတဖၣ်န့ၣ် ဒုးသ့ၣ်ညါနၢ်ပၢၢ်ပှၤလၢကစၢ်ယွၤအတၢ်တီတၢ်လိၤနီၢ်နီၢ်န့ၣ်လီၤ. ပမ့ၢ်ဖးဒိကနၣ် လံာ်စီဆှံအတၢ်တဲပူတဖၣ်လီၤတံၢ်လီၤဆဲးန့ၣ်ဒီး, ပသးကကလၢၢ်ဘၣ် နီၢ်ဒဘိရၤ အတၢ်သူၣ်ဒူသးဒူ (စံၣ်ညီၣ် ၄-၅), စီၤကံးဒဧိၣ် လၢအကွၢ်ဆၢၣ်မဲာ်တၢ်ဂ့ၢ်ကီဒူဒူ (:၆), ဒီးစီၤပီလူးလၢ အတပျံၤတၢ်ဖုးတၢ် (မၤတၢ် ၂၂) တဖၣ်အဂ့ၢ်န့ၣ်လီၤ.

လၢပဂီၢ်, ကစၢ်ယွၤ ကတဲာ်ကတီၤဟ့ၣ်လီၤဝဲ လံၥ်စီဆှံ အပှၤဒူပှၤဃိၤအပူတဖၣ် ကမ့ၢ်ဝဲ ဒ်တၢ်မုၢ်လၢ်အတၢ်ကပီၤအသိး, ကမၤစၢၤၦၤလၢ ပကကဲထီၣ် ၦၤဂီၢ်မုၢ်လၢ ကစၢ်ယွၤကိးပှၤ, ဒီးကတဲာ်ကတီၤပှၤ ဒ်သိးပကဆၢထၢၣ်လၢအဂီၢ်န့ၣ်လီၤ