လၢပျၢၤ, ပှၤဟးလ့ၣ်ဖိတဖၣ် ဒိၣ်စိဒိၣ်ကမီၤအကတီၢ်, ပှၤဂဲၤဒိလၢ စိၤမိၤခိၣ်တဖၣ် ဒုးနဲၣ်ဖျါထီၣ် က့ၢ်ဂီၤလၢဒုးနဲၣ်ဝဲတဖၣ် အသးအတၢ်ဟူးတၢ်ဂဲၤ, ခီဖျိတၢ်ထီထီၣ် တၢ်ကျၢၢ်ဘၢမဲာ်, မဲာ်သၣ်တဖၣ်လၢ အပာ်ဖျါထီၣ် တၢ်သူၣ်အုးသးအုး, (မ့) တၢ်သူၣ်ခုသးခုတဖၣ်န့ၣ်လီၤ. မဲာ်သၣ်တဖၣ်အံၤ မၤစၢၤဝဲဒၣ် ပှၤဂဲၤဒိတၢ်ဖိတဖၣ် ဒ်သိးကဂဲၤဒိဒုးနဲၣ် က့ၢ်ဂီၤအါကလုာ်အလီၢ်, လၢတၢ်ဒုးနဲၣ်တယူၢ်ဃီအပူၤန့ၣ်လီၤ. တၢ်ကျၢၢ်ဘၢမဲာ်တဖၣ်န့ၣ် တမ့ၢ်လၢတၢ်တ့ ဒုးအိၣ်ထီၣ်အီၤထီဘိအဂီၢ်န့ၣ်ဘၣ်, တမ့ၢ်စ့ၢ်ကီး, ပှၤကညီခၢၣ်စးနီၢ်နီၢ်အက့ၢ်ဂီၤန့ၣ်ဘၣ်. လၢတၢ်ဒုးနဲၣ်အဂီၢ်, ပှၤဂဲၤဒိတၢ်ဖိတဖၣ် သိးထီၣ်ဝဲ တၢ်ကျၢၢ်ဘၢမဲာ်တဖၣ်, ဒီးတုၤတၢ်ဒုးနဲၣ်ဝံၤန့ၣ်ဒီး, ဘၣ်တၢ်ဃ့ၣ်လီၤကွံာ်အီၤန့ၣ်လီၤ.
ပှၤစူၢ်က့ၤနာ်က့ၤ ကစၢ်ယ့ၣ်ရှူးတဖၣ်အဂီၢ်, ဖဲ ကလီးစဲ ၃:၁၀ အပူၤန့ၣ် စီၤပီလူး ကွဲးဟ့ၣ်ဂံၢ်ဟ့ၣ်ဘါဝဲဒၣ်လၢ “ဒီးသုကူထီၣ်သိးထီၣ်က့ၤလံ ပှၤသီလၢ တၢ်မၤက့ၤအီၤအသီဆူ တၢ်သ့ၣ်ညါ, ဒ်ပှၤတ့အီၤတဂၤအက့ၢ်အဂီၤအသိး” န့ၣ်လီၤ. လၢတၢ်ဒုးနဲၣ် ပှၤကွၢ်ကီတၢ်ဖိတဖၣ်အဂီၢ်, တၢ်စူးကါ တၢ်ကျၢၢ်ဘၢမဲာ်တစိၢ်တလီၢ်ဖိအလီၢ်န့ၣ် ထီဘိန့ၣ်ဂ့ၤဝဲလၢ ပအိၣ်မူဒုးနဲၣ်ဖျါထီၣ် ပတၢ်မ့ၢ်တၢ်နီၢ်နီၢ်, ဒ်သိးပှၤကထံၣ်န့ၢ်အီၤကိးမုၢ်နံၤဒဲးအဂီၢ်န့ၣ်လီၤ. စီၤပီလူး စံးဝဲဒၣ်လၢ “သုကဘ့ၣ်လီၤကွံာ်သုနီၢ်လီၢ်လံၤ” (အ့း ၄:၂၂) န့ၣ်လီၤ. တချုးပဒိးန့ၢ် တၢ်အုၣ်က့ၤခီဖျိက့ၤ, ခီဖျိလၢကစၢ်ယ့ၣ်ရှူးဒံးဘၣ်အကတီၢ်, ပကဘၣ်ပဲာ်စီကွံာ် တၢ်အိၣ်မူလၢအအိၣ်ပှဲၤဒီးတၢ်ဒဲးဘးန့ၣ်လီၤ.
တၢ်ဃ့ၣ်လီၤကွံာ် ပလုၢ်လၢ်လီၢ်လံၤ, ဒီးကူထီၣ်သိးထီၣ် နီၢ်သီန့ၣ် တညီနုာ် ဟဲကဲထီၣ်အသး, အကစၢ်ဒၣ်ဝဲဘၣ်. စီၤပီလူး စံးဝဲဒၣ်လၢ ပလိၣ်ဘၣ်တၢ်န့ၣ် “ဒ်သိးသုကကဲထီၣ် ပှၤအသီလၢ သးအတၢ်ဆိကမိၣ်” (:၂၃) န့ၣ်လီၤ. ဒီးပကဘၣ်စးထီၣ်အီၤလၢ ပသးအတၢ်ဆိကမိၣ်အပူၤ, ဒ်ပမ့ၢ်ပှၤစူၢ်က့ၤနာ်က့ၤတၢ်ဖိတဖၣ်အသိး, ပကသ့ၣ်ညါနီၣ် “ကူထီၣ်သိးထီၣ်သုနီၢ်သီတ့အသးလၢ တၢ်လီၤဂာ်ယွၤအသိး, လၢတၢ်တီတၢ်လိၤ, ဒီးတၢ်စီတၢ်ဆှံနီၢ်နီၢ်အပူၤ” (:၂၄) န့ၣ်လီၤ.
ဟ့းလ့ၣ်အပှၤဂဲၤဒိတဖၣ် ကသိးထီၣ် တၢ်ကျၢၢ်ဘၢမဲာ်တဖၣ်အဂီၢ်, ပှၤဒိးလဲ အဝဲသ့ၣ်န့ၣ်လီၤ. မုၢ်မဆါတနံၤအံၤ, ခီဖျိယွၤအဘျုးအဖှိၣ်အဃိ, ဒ်သိးပှၤဟီၣ်ခိၣ်ဖိတဖၣ် ကသ့ၣ်ညါ ကစၢ်ယ့ၣ်ရှူး အိၣ်မူလၢပသးကံၢ်ပူၤအဂီၢ်န့ၣ် မ်ပကူထီၣ်သိးထီၣ် ကစၢ်ယ့ၣ်ရှူးအက့ၢ်အဂီၤနီၢ်နီၢ်န့ၣ်တက့ၢ်.