အဲၣ်လဲၣ်(န) (Alan) မ့ၢ် ပှၤယဲၢ်စိၤတစိၤ လၢအသူၣ်အီၣ်ဖျးအီၣ် တၤသူတၤသၣ်အမုၢ်တဖၣ်, ဒီးပၢဆှၢရဲၣ်ကျဲၤဒူၣ်ဖိထၢဖိ အသလ့ၤသၣ်, ဘီနီၢ်ဆၢသၣ်, ဒီးဖီသၣ်အတၤသၣ်လီၢ်တဖၣ်န့ၣ်လီၤ. လၢနံၣ်တဖၣ်အါနံၣ်အါလါအပူၤ, တသ့ဖဲအသ့န့ၣ် အပှၤဟံၣ်ဖိဃီဖိတဖၣ် ဂုာ်ကျဲးစၢးသူၣ်ဝဲဒၣ် တၤသၣ်အမုၢ်တဖၣ်လၢ ကဟ့ၣ်ထီၣ် တၤသၣ်အအါကတၢၢ်န့ၣ်လီၤ. ခါဆူညါအဂီၢ်, အဝဲသ့ၣ်သူၣ်လီၤဝဲ သ့ၣ်ပျိာ်ဖိတဖၣ်, ဒီးဒ်သိးဆၣ်ဖိကီၢ်ဖိတဖၣ် အသုတနုာ်လီၤအီၣ်, မၤဟးဂီၤတၢ်အဂီၢ်, ဒူၣ်ဝဲကရၢၢ်, ဒီးဖဲမူခိၣ်ဖီတဖၣ် ဟဲလီၤ, ဒီးတၢ်ဘၣ်ယိၣ်အလီၢ် မ့ၢ်အိၣ်လၢ တၢ်မုၢ်တၢ်ဘိတဖၣ်အဂီၢ်န့ၣ်ဒီး, ဘျုးလီၤစ့လၢ ကဟၣ်ဝံၢ်ကသုၣ်တဖၣ်, ဒ်သိးကမၤလၢၤကလံၤန့ၣ်လီၤ. အဝဲသ့ၣ်မၤဝဲအဂ့ၤကတၢၢ်ဒၣ်လဲာ်,ကထၢဖှိၣ်န့ၢ်က့ၤ တၤသူတၤသၣ်အဂ့ၤကတၢၢ်အဂီၢ်န့ၣ် တလီၤတံၢ်နီတဘျီဘၣ်န့ၣ်လီၤ. တၢ်ဂ့ၢ်ဒ်အမ့ၢ် မူခိၣ်ကလံၤသီၣ်ဂီၤ, တၢ်စိာ်ခီဖီကမူၣ်တဖၣ်, ဒီးတၢ်ဆူးတၢ်ဆါတဖၣ်န့ၣ် တအိၣ်ဝဲဒၣ်လၢ အဝဲသ့ၣ်အတၢ်ပၢၤအဖီလာ်အဃိန့ၣ်လီၤ.

ဘၣ်ဆၣ်, ကယဲၢ်န့ဆၢၣ် အတၢ်အိၣ်အသးခဲလၢာ်န့ၣ် အိၣ်ဝဲလၢ ယွၤအတၢ်ပၢဆှၢရဲၣ်ကျဲၤတၢ်အဖီလာ်န့ၣ်လီၤ. လၢပတၢ်အိၣ်ဆူၣ်အိၣ်ချ့အဂီၢ်. ကစၢ်ယွၤ သ့ၣ်ညါဝဲဒၣ် ပလိၣ်ဘၣ်နီၢ်ခိ အတၢ်လုၢ်အီၣ်လုၢ်အီလၢအဂ့ၤဘၣ်ဆၣ်, ဒ်သိးပကကွၢ်ထီၣ်ဆူ တၢ်လီၢ်အထီ, အဂ့ၤကတၢၢ်, လၢအမ့ၢ်အနီၢ်ကစၢ်ဒၣ်ဝဲအဂီၢ်န့ၣ် ဟ့ၣ်ဂံၢ်ဟ့ၣ်ဘါပှၤန့ၣ်လီၤ. လံာ် ၃ မိၤရှ့ အပူၤန့ၣ် ပကထံၣ်ဘၣ် ကစၢ်ယွၤ ဟ့ၣ်လီၤ ပှၤအံၣ်စရ့လးဖိတဖၣ်လၢ ကယဲၢ်အတၢ်မၤလိာ်တဖၣ်, စးထီၣ်လၢ တၢ်လုၢ်တၢ်ပာ်, ဒီးတၢ်ဘူၣ်တၢ်ဘါအဂီၢ်, တုၤလီၤဆူ တၢ်ရ့လိာ်ဘၣ်ထွဲလိာ်သးတဖၣ်, ဒီးတၢ်စံၣ်ညီၣ်တီလၢ တၢ်လုၣ်သ့ၣ်ခါပတာ် တၢ်ဘျၢသဲစးတဖၣ်အဂ့ၢ်န့ၣ်လီၤ. တၢ်ဒိကနၣ် ယွၤအတၢ်မၤလိာ်န့ၣ် ကနဲၣ်ဆှၢပှၤဆူ တၢ်ဆိၣ်ဂ့ၤ,ဃုာ်ဒီး, တၢ်ကတဲာ်ကတီၤန့ၢ် ဟီၣ်ခိၣ်အတၢ်ဟ့ၣ်ထီၣ် အါအါကလဲာ် (၂၆:၃-၄), ဘၣ်ဆၣ်, တၢ်မ့ၢ်တဒိကနၣ် ကစၢ်ယွၤ ဘၣ်န့ၣ်ဒီး, တၢ်အစၢ ကမ့ၢ်ဝဲဒၣ် တၢ်ဆိၣ်အၢ, ဒီးအဒုၣ်အဒါတဖၣ် ကအီၣ်ကွံာ်အဝဲသ့ၣ် အစုတၢ်မၤအတၤသၣ် (:၁၆) န့ၣ်လီၤ. အါန့ၢ်ဘုဧိၤဟုဧိၤအါအါကလဲာ် (:၁၀), ယွၤအတၢ်ဆိၣ်ဂ့ၤန့ၣ် ပာ်ဃုာ်ဒီး, ယွၤအတၢ်အၢၣ်လီၤလၢ ကအိၣ်ဆိးဒီးအပှၤဂီၢ်မုၢ်တဖၣ် (:၁၁), ဒီး “ကကွၢ်မဲာ်” (:၉) အဝဲသ့ၣ်န့ၣ်လီၤ.

ပှၤအံၣ်စရ့လးဖိတဖၣ်, ဒီးပဝဲစ့ၢ်ကီး, မၤတၢ်ဒဲးဘးတဘျီဘၣ်တဘျီန့ၣ်လီၤ. ဘၣ်ဆၣ်, ဒ်သိးပကမုာ်လၤသးခုဘၣ် ယွၤအတၢ်ဟ့ၣ်လၢ အအိၣ်ဒီးပှၤ (:၄၀-၄၂), ဘၣ်တၢ်ပာ်ဖျါထီၣ်အီၤ ခီဖျိလၢကစၢ်ယ့ၣ်ရှူး, ဒီးခဲကနံၣ်အံၤ, ခီဖျိသးစီဆှံအဂီၢ်န့ၣ် ပပီၢ်ယၢ်လီၤက့ၤပသး, ဟ့ၣ်လီၤအးလီၤပသး, ဒီးဃၣ်လိၤက့ၤပသးသ့ဝဲဒၣ်န့ၣ်လီၤ.