မး(က) (Mark) တဂၤ, ဖဲအီသံးမူၤအကတီၢ်, နီၣ်ဝဲဒၣ် သိလ့ၣ်အဃိ, ပှၤဘၣ်မူဘၣ်ဒါတဂၤ မၢအဆိကတီၢ်အသိလ့ၣ် လၢကျဲကပၤန့ၣ်ဒီး, ဘၣ်ယိၣ်ဝဲဒၣ်လၢ အတၢ်မၤ, ဒ်အမ့ၢ်, ခီလ့ၣ်ကၠိဖိ ပှၤလိာ်ကွဲဖျၢၣ်ထူတဂၤအသိးန့ၣ် ကတၢၢ်လံန့ၣ်လီၤ. ကဘၣ်လီၤဃိာ်စ့ၢ်ကီး, လီၤတံၢ်လံန့ၣ်လီၤ. ဘၣ်ဆၣ်, လၢတၢ်သ့ၣ်တဖၣ်အလီၢ်န့ၣ်, ပၢၤကီၢ်တဂၤအံၤလဲၤနီၣ်ဆှၢအီၤဆူ အခီလ့ၣ်ကၠိန့ၣ်လီၤ. ဖဲန့ၣ် မး(က) သံကွၢ်အီၤ ဘၣ်မနုၤအဃိလဲၣ်န့ၣ်, အဝဲစံးဆၢဝဲဒၣ်, “ယမၤဂ့ၤမၤဘျုးနၤ” န့ၣ်လီၤ.
ဘၣ်ဆၣ်, သရၣ်လၢ အကွၢ်ထွဲတၢ်လိာ်ကွဲတဂၤ ကသ့ၣ်ညါအတၢ်ဂ့ၢ်, ဒီးကဘၣ် ပျဲပျၢ် အတၢ်မၤလိစ့ဆီၣ်ထွဲ (scholarship) န့ၣ် ပှၤသးစၢ်တဂၤအံၤ သ့ၣ်ညါဝဲလီၤတံၢ်လံ န့ၣ်လီၤ. လၢတၢ်န့ၣ်အဃိ, လၢခံတနံၤ, ဖဲတၢ်ဂဲၤလိဝံၤအကတီၢ်, ဖဲ သရၣ်လၢ အကွၢ်ထွဲတၢ်လိာ်ကွဲတဂၤ ကထံၣ်လိာ်သးအဂီၢ်, ကိးဝဲဒၣ် မး(က) န့ၣ်ဒီး, တၢ်ဘၣ်ကိၢ်ဘၣ်ဂီၤလီၤဘၣ်အီၤဒိၣ်မးန့ၣ်လီၤ. လၢတၢ်လီၤကမၢကမၣ်အပူၤန့ၣ် အသရၣ်စံးဘၣ်အီၤလၢ“မဟါကၢာ်တနၤ အတၢ်ဂ့ၢ်န့ၣ် ယသ့ၣ်ညါဘၣ်ဆၣ်, ယကမၤဂ့ၤမၤဘျုးနၤ” န့ၣ်လီၤ. န့ၣ်ဝံၤဒီး, သရၣ်ဟ့ၣ်ကူၣ်အီၤလၢ ကလဲၤထီၣ် ဘါယွၤ ဖဲအိၣ်ဘှံးနံၤလၢ အကဟဲန့ၣ်လီၤ.
မး(က) လဲၤဘါယွၤ, ဒီးတၢ်အိၣ်ဖှိၣ်သရၣ် ကစံးကတိၤ တၢ်ဂ့ၢ်မနုၤလဲၣ်န့ၣ် တယာ်ဆိကမိၣ်ကွၢ်နဲတက့ၢ်. တၢ်ကစီၣ် မ့ၢ်ဝဲဒၣ် ကစၢ်ယ့ၣ်ရှူး အတၢ်ဘျုးတၢ်ဖှိၣ်လၢ အဟ့ၣ်ပှၤတၢ်အုၣ်က့ၤခီၣ်က့ၤ, လၢပတကြၢးဒိးန့ၢ်အီၤအဂ့ၢ်န့ၣ်လီၤ. မး(က) သ့ၣ်ညါနၢ်ပၢၢ်တၢ်ကစီၣ်အဂ့ၢ်, ဒီးဖဲမုၢ်တနံၤအံၤန့ၣ်, စူၢ်က့ၤနာ်က့ၤ ကစၢ်ယ့ၣ်ရှူး, ဒ်တၢ်အုၣ်က့ၤခီၣ်က့ၤကစၢ်အသိး, ဒီးအတၢ်အိၣ်မူဒီစိၤ လၢအအိၣ်လီၤတဲာ်တ့ၢ်န့ၣ် မၤယွၤအတၢ်လီၤ. ပိာ်ခွါဖိတဖၣ်လၢအသးအိၣ်ဒိးန့ၢ် ခွဲးယာ်ခံဘျီတဘျီ, လၢအလိၣ်ဘၣ် တၢ်ဘျုးတၢ်ဖှိၣ်တဖၣ်အဂီၢ်, တၢ်ဘုၣ်ဆၣ်ဖိကီၢ်ဖိ ကရၢၢ်ဖးလဲၢ် (ranch) ဒၣ်လဲာ်, အဝဲ ဒုးအိၣ်ထီၣ်ဝဲဒၣ်န့ၣ်လီၤ.
ပှၤစူၢ်က့ၤနာ်က့ၤ ကစၢ်ယ့ၣ်ရှူးတဖၣ် တုၤလၢ “တၢ်အုၣ်က့ၤခီၣ်က့ၤ” (အ့း ၂:၈) န့ၣ် မ့ၢ်လၢယွၤအဘျုးအဖှိၣ်အဃိန့ၣ်လီၤ. တၢ်လၢတၢ်မၤဂ့ၤတၢ်တဖၣ် မၤဝဲတန့ၢ်တသ့န့ၣ် ယွၤ အတၢ်ဘျုးတၢ်ဖှိၣ် ကမၤဝဲဒၣ် (:၉, ရိမ့ၤ ၁၁:၆) န့ၣ်လီၤ. တၢ်အံၤ မ့ၢ်တၢ်ဟ့ၣ်ခီဖျိလၢကစၢ်ယ့ၣ်ရှူး အတၢ်ဟ့ၣ်လီၤအသးသမူ လၢထူၣ်စုညါအလိၤန့ၣ်လီၤ.
ပတၢ်ဒဲးဘး အတၢ်ဝံဃၢန့ၣ် မၤဃၢဒိၣ်ဘၢပှၤ တန့ၢ်ဘၣ်. ဒ် မး(က) ဃုထံၣ်န့ၢ်ဝဲ အသိး, ယွၤအဘျုးအဖှိၣ်န့ၣ် မၤပူၤဖျဲးပှၤ, ဒီးဟ့ၣ်ပှၤတၢ်မူ “အါအါကလဲာ်” (ယိၤ ၁၀:၁၀) သ့ဝဲဒၣ်န့ၣ်လီၤ. ဖဲပနာ်သန့ၤ ကစၢ်ယ့ၣ်ရှူး ဒ်တၢ်အုၣ်က့ၤခီၣ်က့ၤကစၢ်အသိးန့ၣ်ဒီး, တၢ်ဘျုးတၢ်ဖှိၣ်အစိအကမီၤန့ၣ် ကမၤပူၤဖျဲးပှၤ (အ့း ၂:၄-၅) န့ၣ်လီၤ.