အဲမလံၣ် ကဲ(န)ဝး (Emily Kenward) လဲၤဟးကျဲလၢ လၣ်ဘဲဒၣ်အကျဲ (Lavender), လၢဝ့ၢ် ဘရဲးတၣ်(န) (Brighton), ကီၢ်အ့ကလၣ်(န) (England) န့ၣ်လီၤ. အဝဲကဲထီၣ် ပှၤစူၢ်က့ၤနာ်က့ၤ ကစၢ်ယ့ၣ်ရှူး တယံာ်ဒံးဘၣ်, ဒီးခဲကနံၣ်အံၤ, ထံၣ်ဝဲဒၣ်ကျဲတဘိအံၤ လၢတၢ်ထံၣ်လီၤဆီအပူၤန့ၣ်လီၤ. အဝဲပာ်သူၣ်ပာ်သးဝဲဒၣ်လၢ ဟံၣ်အါဖျၢၣ်န့ၣ် ပာ်လီၤဃာ်အယၣ်ဘျးသဒၢတဖၣ်လၢမုၢ်ဆါအကတီၢ်, ဒီးတၢ်လီၢ်အံၤ, ပှၤသူၣ်က့သးပှၢ်အနီၢ်ဂံၢ်အိၣ်အါဘၣ်ဆၣ်, ထဲဒၣ်ပှၤသးပှၢ်စှၤဂၤဖိဧိၤ ဟးထီၣ်က့ၤလီၤဝဲဒၣ်န့ၣ်လီၤ. လၢအသးပူၤန့ၣ် တၢ်ဆိကမိၣ်တမံၤ ဟဲအိၣ်ထီၣ်ဝဲဒၣ်န့ၣ်လီၤ.

လၢဝ့ၢ် ဘရဲးတၣ်(န) အပူၤန့ၣ် အဲမလံၣ် ဃုထံၣ်သ့ၣ်ညါ ပှၤသူၣ်က့သးပှၢ်တဖၣ် အိၣ်ဆိးတၢ်အလီၢ်, ဒီးကွဲမုာ်ဝဲ တၢ်အီသကိး လာ်ဖးထံ ဖဲမုၢ်ဃ့ၣ်လီၤန့ၣ်လီၤ. ပှၤဟဲတဖၣ်တဲဖျါထီၣ် တၢ်ဂ့ၢ်တမံၤဃီ, လၢအမ့ၢ်, ခဲကနံၣ်အံၤ, အဝဲသ့ၣ် ဘၣ်အိၣ်ထဲတဂၤဧိၤ, ဒီးဘၣ်လဲၤခီဖျိ လါတဖၣ်, လၢတၢ်ရ့လိာ်သးတအိၣ်ဒီးပှၤနီတဂၤဘၣ်တလီၢ်လီၢ်န့ၣ်လီၤ. အဝဲသ့ၣ်စံးဝဲဒၣ် တၢ်လၢအဝဲသ့ၣ်ဆၢန့ၢ်ဘၣ်န့ၣ် ပှၤကဟဲဟးအိၣ်သကိးတၢ်န့ၣ်လီၤ.

တၢ်စူၢ်နာ် ကစၢ်ယ့ၣ်ရှူးန့ၣ် ဆီတလဲ ပတၢ်စံးဆၢမၤဆၢ ဟီၣ်ခိၣ်ချၢ, ဒီးအတၢ်လိၣ်တဖၣ်န့ၣ်လီၤ. ပှၤသ့းစၤလနံဖိတဖၣ် အတၢ်အိၣ်မူန့ၣ် တၢ်မၤအသးဒ်သိးအံၤန့ၣ်လီၤ. မ့ၢ်လၢအဝဲသ့ၣ်ဃၣ်ကဒါက့ၤအသးဆူ ယွၤအအိၣ်လံ (၁ သ့း ၁:၉) အဃိ, ခီဖျိတၢ်အိၣ်မူလၢအဆီတလဲသးန့ၣ် လၢပှၤဂၤအဂီၢ်, ကဲထီၣ် တၢ်ကွၢ်လိလၢ တၢ်စူၢ်တၢ်နာ်တကပၤန့ၣ်လီၤ.ပှၤတၢ်မၢဖိ စီၤပီလူး ကွဲးနီၣ်ပာ်ဖျါဝဲလၢ “သုတၢ်မၤဘၣ်ဃးဒီးတၢ်နာ်,” ဒီး “သုတၢ်ကျဲးစၢးဘၣ်ဃးဒီး တၢ်အဲၣ်တၢ်ကွံ” (:၃) န့ၣ်လီၤ. တၢ်နာ်နီၢ်နီၢ်န့ၣ် ထိၣ်ဟူးထိၣ်ဂဲၤ ဒ်သိးအဝဲသ့ၣ်ကမၤဝဲ တၢ်ခ့တၢ်ပှၤအတၢ်မၤ, လၢအကမၤလၤကပီၤ ကစၢ်ယ့ၣ်ရှူးန့ၣ်လီၤ.

တၢ်အီသကိး လာ်ဖးထံ ဖဲမုၢ်ဃ့ၢ်လီၤအကတီၢ်, တၢ်ကတိၤတဖၣ်န့ၣ် ထိးဘၣ် အဲမလံၣ် အသးဒိၣ်မးအဃိ, အဝဲစးထီၣ် ဒုးအိၣ်ထီၣ် တၢ်သးကညီၤမၤစၢၤတၢ်ကရၢတဖုလၢ အဘျးစဲန့ၢ် ပှၤသူၣ်က့သးပှၢ်တဖၣ် လၢဝ့ၢ် ဘရဲးတၣ်(န) အပူၤ, ဒီးပှၤမုာ်သးမၤကလီတၢ်လၢ ကဟဲဟးအိၣ်သကိးအဝဲသ့ၣ်တဖၣ်န့ၣ်လီၤ. အဲမလံၣ် သ့ၣ်နီၣ်ထီၣ်ဝဲဒၣ် ပိာ်မုၣ်သးပှၢ်တဂၤအသးကလၢၢ်ဘၣ်ဝဲလၢ ပှၤထံၣ်အီၤ, ဒီးပှၤနၢ်ဟူအီၤ အိၣ်ထီၣ်လံအဃိ, ဖိးဟုအီၤဃံးဃံး, ဟီၣ်သါတကုး, ဒီးစံးဘျုးအီၤန့ၣ်လီၤ. တၢ်မၤအံၤ ဒိၣ်ထီၣ်ထီထီၣ်, ဒီးထိၣ်ဟူးထိၣ်ဂဲၤပှၤဂၤတဖၣ်အသး, ဒ်သိးကမၤတၢ်တမံၤဃီအဂီၢ်န့ၣ်လီၤ. တၢ်ဂ့ၢ်အံၤ, ဒုးဆိကမိၣ်ထီၣ်ယၤလၢ မုၢ်တနံၤအံၤ, ဒ်သိးပကကျဲးစၢးမၤတၢ်လၢတၢ်အဲၣ်တၢ်ကွံအဂီၢ်, သးစီဆှံကထိၣ်ဟူးထိၣ်ဂဲၤနၤဒီးယၤ မနုၤတမံၤလဲၣ်န့ၣ်လီၤ.