လၢတၢ်ဂီၤမူ (The Empire Strikes Back) အပူၤန့ၣ် တၢ်လၢကဘၣ်ဘှီဂ့ၤထီၣ်က့ၤ တၢ်တမံၤဖိန့ၣ် တမၤဝဲအဃိ, ဖဲတၢ်ဟဲဒုး, ဟဲမၤဒၢၣ်အကဘီ, ဒီးကပူၤဖျဲးဝဲအဂီၢ်, ကျိၤကျဲတအိၣ်လၢၤဘၣ်အကတီၢ်, ဟၣ် စိၤလိၣ် (Han Solo) တဂၤ စံးဝဲဒၣ်လၢ “တၢ်အံၤ, တမ့ၢ်ယတၢ်ကမၣ်ဘၣ်” န့ၣ်လီၤ. ဖဲအစံးဝဲတၢ်ဒ်သိးအံၤန့ၣ်ဒီး, နကဆိကမိၣ်နဲ, လၢအတၢ်ဂ့ၢ်ကီအဂီၢ်, အစှၤကတၢၢ်န့ၣ် အမူဒါအိၣ်ဝဲဘၣ်ဆၣ်, မ့ၢ်အတအဲၣ်ဒိး အၢၣ်လီၤဝဲဒၣ်အဃိန့ၣ်ဧါ.

တၢ်မၤအသးဒ်သိးအံၤန့ၣ် ယလဲၤခီဖျိတ့ၢ်ယဲစ့ၢ်ကီးန့ၣ်လီၤ. ဘၣ်တဘျီဘျီန့ၣ် ဒ်သိးယကပာ်ဒ့ၣ်ပာ်ကမၣ်တၢ်အဂီၢ်, ယလူၤဃု ပှၤတဂၤဂၤ, (မ့) တၢ်တမံၤမံၤန့ၣ် ညီဒိၣ်န့ၢ်ဒံး ယကအၢၣ်လီၤတူၢ်လိာ်ယဲ, ဒ်ယမူယဒါအသိးဘၣ်န့ၣ်လီၤ. လံာ်စီဆှံ ဒုးနဲၣ်ပှၤလၢ တၢ်ပာ်သူၣ်ပာ်သးဒ်သိးအံၤန့ၣ် လီၤဂာ်ဒီးတၢ်ဒဲးဘးအက့ၢ်အဂီၤန့ၣ်လီၤ. စီၤအၤဒၣ်ဒီးနီၢ်အံၣ်အု ခံဂၤလိာ်န့ၣ် (၁ မိၤ ၃:၁၁-၁၃) မၤဝဲဒၣ်, ဒီးစီၤအၤဟရိၣ်စ့ၢ်ကီး, မၤဝဲဒၣ်န့ၣ်လီၤ. ဖဲစီၤမိၤရှ့ လဲၤထံၣ်လိာ်အသးဒီးကစၢ်ယွၤ, လၢကစၢၢ်စံၤနါအလိၤ, ဒီးဒိးန့ၢ်ဝဲဒၣ် တၢ်မၤလိာ်အထံၣ်တဆံအကတီၢ်, ယွၤစံးဘၣ် စီၤမိၤရှ့လၢ “ပှၤဂီၢ်မုၢ်တဖၣ်လၢ ယမၤထူၣ်ဖျဲးထီၣ်လၢကုၢ်အလီၢ်န့ၣ် ဃၣ်ကပၤအသး, ဒ်သိးကဘူၣ်ထီၣ်ဘါထီၣ် တၢ်ဂီၤတၢ်ဖီၣ်လံ” (၂ မိၤ ၃၂:၇-၈) န့ၣ်လီၤ. စီၤမိၤရှ့ ဟဲက့ၤ, ဒီးထံၣ်လိာ်အသး ဒီးစီၤအၤဟရိၣ် (ပှၤလၢ စီၤမိၤရှ့ ဟ့ၣ်လီၤအးလီၤမူဒါတဂၤ) န့ၣ်ဒီး, စီၤအၤဟရိၣ် စံးဆၢဝဲဒၣ်လၢ “နသ့ၣ်ညါပှၤဂီၢ်မုၢ်အံၤ လၢအလူၤတၢ်အၢတၢ်သီ” (:၂၂) န့ၣ်လီၤ. ဝံၤန့ၣ်ဒီး, ပာ်ဖျါထီၣ် တၢ်ဂီၤတၢ်ဖီၣ်လၢ အသိဝဲဘှီဝဲအဂ့ၢ်န့ၣ် စံးဝဲဒၣ် “ယစံးဘၣ်အီၤ, ပှၤလၢအအိၣ်ဒီး ထူတဂၤဂၤန့ၣ်, ကထုးတဲာ်ဒၣ်ဝဲတက့ၢ်. ဒီးဟ့ၣ်လီၤဝဲလၢယၤ, ဒီးယဖၢလီၤလၢ မ့ၣ်အူပူၤ, ဒီးဟဲထီၣ်လၢဂီၤဖံးဖိတဒုအံၤ” (:၂၄) န့ၣ်လီၤ.

ဒ်ပသးဆှၢပှၤအသိး, ပမၤတ့ၢ်လံဘၣ်ဆၣ်, ပမ့ၢ်တဲာ်လီၤကျဲၤလီၤပတၢ်ဒဲးဘးလၢ ကစၢ်ယွၤန့ၣ်ဒီး, အဝဲကပျၢ်ပတၢ်ကမၣ်န့ၣ်လီၤ. ကစၢ်ယွၤ မ့ၢ်ပှၤလၢ “အကလုၢ်တီ, ဒီးတီဝဲလိၤဝဲဒ်သိးအကပျၢ်ကွံာ် ပတၢ်ဒဲးဘး” တဂၤလီၤန့ၣ်အဝဲ ပာ်ဖျါမၤဂၢၢ်မၤကျၢၤဝဲဒၣ်လၢ (၁ ယိၤ ၁:၉) အပူၤန့ၣ်လီၤ. ကစၢ်ယွၤ ပျၢ်ပတၢ်ဒဲးဘး, ဒီးတူၢ်လိာ်က့ၤပှၤလံအဃိ, ပတၢ်နးတၢ်ဖှီၣ်တဖၣ်န့ၣ် ပပာ်ဖျါထီၣ်သ့ဝဲဒၣ်ဆူ ကစၢ်ယွၤအအိၣ်, မ့ၢ်လၢအယိးထီၣ် ပတၢ်ဒဲးဘးတဖၣ်, လၢထူၣ်စုညါအလိၤ, ဒီးကယဲၢ်တၢ်ခဲလၢာ်န့ၣ် မ့ၢ်ဒၣ်ထဲလၢ အတၢ်အဲၣ် အလၢအပှဲၤ, လၢအစူးကွံာ်ညိကွံာ်အသးအဃိန့ၣ်လီၤ.