လၢတၢ်ဖံးတၢ်မၤအဂီၢ်, တၢ်ထံၣ်သံကွၢ်အကတီၢ်, ပှၤသံကွၢ် ခဲရိၣ် (Carol) တဘျီဘၣ်တဘျီလၢ “ဘၣ်မနုၤအဃိ နဟးထီၣ်လၢ အပူၤကွံာ် နတၢ်ဖံးတၢ်မၤလဲၣ်” န့ၣ်လီၤ. ခဲရိၣ်ဒီးအပူၤကွံာ်အတၢ်မၤကစၢ်အဘၢၣ်စၢၤ, တၢ်ဂံာ်ဂူာ်လိာ်သးအိၣ်ဝဲဒၣ်န့ၣ် ပှၤထံၣ်လိာ်သံကွၢ်တၢ်တဂၤအံၤ သ့ၣ်ညါဝဲအဃိ, အဲၣ်ဒိးသ့ၣ်ညါအါထီၣ်တၢ်ဂ့ၢ်န့ၣ်လီၤ.

“တၢ်မၤအကျိၤအကျဲတဖၣ် လီၤဆီလိာ်အသး” န့ၣ် ခဲရိၣ် အၢၣ်လီၤတူၢ်လိာ်ဝဲ ဘၣ်ဆၣ်, တၢ်တကြၢးစံးကတိၤအၢသီ အတၢ်မၤကစၢ်အဂ့ၢ်န့ၣ် မ့ၢ်လၢအဝဲနာ်ဝဲဒၣ်အဃိ, အတၢ်ထံၣ် ဘၣ်ဃးဒီးအပူၤကွံာ်အတၢ်မၤကစၢ်တဂၤအဂ့ၢ်န့ၣ် ခဲရိၣ် တအဲၣ်ဒိး တဲဖျါထီၣ်ဝဲဘၣ်. ဖဲ ခဲရိၣ် ဒိးန့ၢ်ဝဲ တၢ်ဖံးတၢ်မၤဝံၤအလီၢ်ခံ, ပှၤကိးတၢ်မၤတဖၣ်ဘၣ်သူၣ်ဘၣ်သး ခဲရိၣ် အတၢ်စံးဆၢအဂ့ၢ်န့ၣ် အတၢ်မၤကစၢ်အသီ စံးဘၣ်အီၤလၢ “ပပာ်ဒိၣ်ပာ်လုၢ်ပာ်ပှ့ၤ နတၢ်အိၣ်မူသကဲာ်ပဝးန့ၣ်လီၤ. နတၢ်မၤကစၢ်အဂ့ၢ်, ဒီးလၢခံ ပဂ့ၢ်သ့ၣ်သ့ၣ်န့ၣ် ပတအဲၣ်ဒိးလၢ နကစံးကတိၤအၢသီအီၤဘၣ်” န့ၣ်လီၤ.

ဒ်အမ့ၢ်, ပှၤစူၢ်က့ၤနာ်က့ၤသီ ကစၢ်ယ့ၣ်ရှူး သီသီတဂၤအသိး, ကအိၣ်မူအိၣ်ဂဲၤဝဲဒၣ်နီၢ်နီၢ် “လၢတၢ်ယူးယီၣ်ပာ်ကဲယွၤ,” ဒီးလၢကျိၤကျဲ “အဂ့ၤအဘၣ်” အဂီၢ်, ခဲရိၣ် ဆိကမိၣ်ဝဲထီဘိန့ၣ်လီၤ. တၢ်စံးဆၢန့ၣ် ကမ့ၢ်တၢ်ယိယိဖိ, လၢအဒုးနဲၣ် တၢ်အိၣ်မူသကဲာ်ပဝး, ဒီးတၢ်အိၣ်မူလၢ အလီၤယူးယီၣ်ပးကဲ, ဒီးတၢ်အိၣ်တီအိၣ်လိၤ, ဒီး တၢ်သကဲာ်ပဝးအဂ့ၤအဝါအဂ့ၢ်န့ၣ် ခဲရိၣ် သ့ၣ်ညါဝဲဒၣ်န့ၣ်လီၤ.

လၢတၢ်ကိးမံၤဒဲးအပူၤ, တၢ်အိၣ်မူသကဲာ်ပဝး မ့ၢ်ဝဲဒၣ်တၢ်အကါဒိၣ်အဂ့ၢ်န့ၣ် လံာ် ၁ ပ့းတရူး ၂:၁၂ ဒုးနဲၣ်ပှၤလၢ “မ်သုအိၣ်ဒီးသုတကဲာ်ပဝးဂ့ၤလၢ ပှၤကလုာ် တဖၣ်အကျါ, ဒ်သိး… တုၤအကွၢ်သုမၤတၢ်ဂ့ၤဒီး, ကစံးထီၣ်ပတြၢၤယွၤ, ဖဲတၢ်အိၣ်သကိးအမုၢ်နံၤန့ၣ်တက့ၢ်” န့ၣ်လီၤ. တၢ်မၤအံၤ ပာ်ဃုာ်ဒီးတၢ်လၢပကဘၣ်မၤအီၤနီၢ်နီၢ်, “ပာ်သုသးလၢ ကယဲၢ်ပှၤကညီအတၢ်စံၣ်ညီၣ်အဖီလာ်” (:၁၃-၁၄), “တၢ်မၤတၢ်ဂ့ၤ” (:၁၅), ဒီး “တၢ်ပာ်ဖျါထီၣ် တၢ်ဆီၣ်လီၤသး, ဒ်ယွၤအခ့အပှၤအသိး,” (:၁၆), ဒီး “တၢ်ယူးယီၣ်,” ဒီး “တၢ်အဲၣ်ဒီပုၢ်ဝဲၢ်ခဲလၢာ်” (:၁၇) န့ၣ်လီၤ. ဒ် ကစၢ်ယွၤ မၤစၢၤပှၤ အသိး, မ်ပကမၤယွၤအတၢ်မၤ ခီဖျိကျိၤကျဲလၢ အဟဲစိာ်န့ၢ်တၢ်မၤလၤကပီၤ ယွၤအမံၤန့ၣ်တက့ၢ်.