အိၣ်ဝဲ(န) (Owen) လဲၤဟးကသုၣ်ကသီလၢ ထံဂၤကီၢ်ဂၤအကတီၢ်, အတံၤသကိးတဂၤ ဆှၢလီၤန့ၢ်အီၤ တၢ်ကစီၣ်တမံၤလၢ အမၤတံာ်တာ်အသး, စံးဘၣ်အီၤလၢ “ပတၢ်ဖံးတၢ်မၤအကစၢ်န့ၣ် ကမၢဝဲဒၣ် ပှၤဂၤမၤတၢ်လၢနလီၢ်” န့ၣ်လီၤ. ဘၣ်ဖဲမုၢ်တနံၤ, မုၢ်ဟဲထီၣ်သီတဂီၤန့ၣ် လၢတၢ်သးဟးဂီၤဒိၣ်ဒိၣ်ယိာ်ယိာ်အပူၤ, အဝဲဃ့ဘါထုကဖၣ်, ဒီးသံကွၢ် ကစၢ်ယွၤ “နအိၣ်ဖဲလဲၣ်” န့ၣ်လီၤ. ဝံၤန့ၣ်ဒီး, ဒ်သိးကအိးထီၣ် ယၣ်ဘျးသဒၢအဂီၢ်, လဲၤဝဲဆူ ပဲတြီဖိလၢတၢ်ဒူၣ်အလိၤအကတီၢ်, ထံၣ်ဝဲ တၢၢ်ကွဲၤဖးဒိၣ်လၢအဖျါဃံဖျါလၤတဘိ, လၢနိၣ်ထံကမါ အမဲာ်ဖံးခိၣ်န့ၣ်လီၤ. အသးကလၢၢ်ဘၣ်ဝဲတၢ်မၤမုာ်ထီၣ်က့ၤအသးတကီၢ်ခါန့ၣ်လီၤ. လၢခံ, အိၣ်ဝဲ(န) ပာ်ဖျါထီၣ်က့ၤဝဲဒၣ် တၢ်မၤအသးအံၤ, ဒ်ကစၢ်ယွၤ စံးဘၣ်ယၤယိယိဖိလၢ “တၢ်ဂ့ၢ်ကီတအိၣ်ဘၣ်, ယအိၣ်ဒီးနၤဖဲအံၤ” န့ၣ်လီၤ.

လံာ် ၁ မိၤရှ့ ၉ ပာ်ဖျါဝဲဒၣ်, ကစၢ်ယွၤ တမၤဟးဂီၤဟီၣ်ခိၣ်လၢထံ နီတဘျီလၢၤဘၣ်န့ၣ် အၢၣ်လီၤဝဲဒၣ်န့ၣ်လီၤ. ကစၢ်ယွၤ အၢၣ်လီၤအီလီၤဝဲလၢ “ဒီးတၢ်လၢချံၣ်န့ၣ် ကအိၣ်လၢ တၢ်အၢၣ်အလိၤ, ဒီးယကကွၢ်အီၤ ဒ်သိးယကသ့ၣ်နီၣ်က့ၤ တၢ်အၢၣ်လီၤအီလီၤ အထူအယိာ်လၢ ယွၤအၢၣ်လီၤအီလီၤဒီး ကယဲၢ်တၢ်သး လၢကယဲၢ်တၢ်ညၣ်အကျါလၢ အအိၣ်လၢ ဟီၣ်ခိၣ်ချၢ” (:၁၆) န့ၣ်လီၤ. တၢ်အၢၣ်လီၤအီလီၤအံၤ မ့ၢ်တၢ်လီၤထူလီၤယိာ်, ဒီး တသန့ၤထီၣ်အသးလၢ တၢ်အိၣ်အသးမၤအသးအဖီခိၣ်ဘၣ်. တၢ်အၢၣ်လီၤအီလီၤအံၤ တမ့ၢ်လၢပှၤဟီၣ်ခိၣ်ဖိ အတၢ်ဂ့ၤတၢ်ဝါအဃိဘၣ်. မ့မ့ၢ်သန့ၤထီၣ်အသးလၢာ်လၢာ်ဆ့ဆ့, ထဲဒၣ်လၢ ကစၢ်ယွၤ အတၢ်ကဟုကယာ်, ဒီးကတဲာ်ကတီၤဟ့ၣ်မၤစၢၤတၢ်အပူၤန့ၣ်လီၤ. ဒီးကစၢ်ယွၤ မၤဝဲ တၢ်အၢၣ်လီၤအီလီၤဒီးအပှၤဂီၢ်မုၢ်အါမးတဖၣ်အကျါ မ့ၢ်တၢ်အဆိကတၢၢ်န့ၣ်လီၤ. ကစၢ်ယ့ၣ်ရှူး စံးတ့ၢ်ဝဲစ့ၢ်ကီးလၢ “ဒီးကွၢ်ကွၢ်, ယအိၣ်ဒီးသု ကိးမုၢ်နံၤမုၢ်နၤဒဲး, တုၤတၢ်အစိၤကတၢၢ်” (မး ၂၈:၂ဝ) န့ၣ်လီၤ.

ကစၢ်ယွၤ တစံးတ့ၢ်ပှၤလၢ ပတတူၢ်ဘၣ်တၢ်နးတၢ်ဖှီၣ်ဘၣ်. ဘၣ်ဆၣ်, အတၢ်မၤမုာ်ထီၣ်က့ၤပှၤန့ၣ် ကအိၣ်ဒီးပှၤထီဘိ, ဒီးအနီၢ်ကစၢ်ဒၣ်ဝဲ ကအိၣ်ဒီးပှၤထီဘိန့ၣ် အၢၣ်လီၤတ့ၢ်ပှၤန့ၣ်လီၤ. တမ့ၢ်လၢ ပကဒိးန့ၢ် “တၢၢ်ကွဲၤအတၢ်စံးဆၢတဖၣ်” ဘၣ်ဆၣ်, လၢပတၢ်အိၣ်မူအပူၤ, တၢ်ကမၤအသးတမံၤဂ့ၤတမံၤဂ့ၤန့ၣ် ပအိၣ်ဒီးကစၢ်ယွၤ အတၢ်အုၣ်ကီၤလၢ ထီဘိန့ၣ် ကဟဲဆူပအိၣ်, ဒီးပနာ်သန့ၤ ယွၤအဂံၢ်အဘါ, အတၢ်မၤမုာ်ထီၣ်က့ၤပှၤ, ဒီးအတၢ်အိၣ်ဒီးပှၤ သ့ဝဲဒၣ်န့ၣ်လီၤ.