ယသးတမုာ်ယဲဒိၣ်မးန့ၣ်လီၤ. ယကဘၣ်မၤယဲဒ်လဲၣ်န့ၣ် ယတသ့ၣ်ညါလၢၤဘၣ်. လၢတၢ်တပာ်သူၣ်ပာ်သးအပူၤ, ယတံၤသကိးလၢ အမၤစၢၤရဲၣ်ကျဲၤန့ၢ် ယခီၣ်ဖၠူထၢၣ်အသီန့ၣ် တြူာ်သံဘၣ်ဝဲ ယတၢ်ဂီၤတဖၣ်, ဒီးတၢ်ဂီၢ်မူအဖုၣ်ဖိတဖၣ် လၢယဆှၢခီတ့ၢ်ဝဲတဖၣ်ခဲလၢာ်န့ၣ်လီၤ. အါနံၣ်အါလါအတီၢ်ပူၤ, တၢ်သ့ၣ်နီၣ်လုၢ်ဒိၣ်ပှ့ၤဒိၣ်တဖၣ် ဘၣ်ဃးဒီးဟံၣ်ဖိဃီဖိ, ဒီးတံၤသကိးတဖၣ် ဟါမၢ်ကွံာ်ဝဲခဲလၢာ် လၢတၢ်ဆၢကတီၢ်တစိၢ်ဖိန့ၣ်လီၤ. ယသးဘၣ်ဒိဘၣ်ထံးဒိၣ်မးန့ၣ်လီၤ. တၢ်လၢအပူၤကွံာ် နံၤသဘျ့တၢ်လဲၤတၢ်က့ၤတဖၣ်, ဒီးတၢ်ဂ့ၢ်လီၤဆီတဖၣ်, တၢ်အကတီၢ်အဃံအလၤတဖၣ်န့ၣ် ယဒုးအိၣ်ထီၣ်က့ၤတန့ၢ်လၢၤဘၣ်. တချုးလၢတၢ်သူၣ်အုးသးအုး ဒုးအိၣ်ထီၣ် တၢ်သူၣ်ကၢ်သးလီၤဘှါနးနးကျံးကျံးအကတီၢ်န့ၣ်, ယတံၤသကိး စံးဘၣ်ယၤ တၢ်ကမၤန့ၢ်က့ၤ တၢ်လၢအလီၤမၢ်တဖၣ်အဂီၢ်, တၢ်မုၢ်လၢ်အိၣ်ဒံးဝဲန့ၣ်လီၤ. စှၤနၣ်ရံၣ်လၢအအိၣ်ပှဲၤဒီးတၢ်သူၣ်အူသးကဲၤအကတီၢ်ဝံၤ, ယထံၣ်ဘၣ် တၢ်လၢအလီၤမၢ်တဖၣ် ဟဲက့ၤဖျါထီၣ်အဃိ, ယသူၣ်ခုသးခုဒိၣ်ဒိၣ်ကလဲာ်, ဒီးယစံးဘျုးဘၣ်ကစၢ်ယွၤန့ၣ်လီၤ.
ယဘၣ်ခိးတ့ၢ်ယဲ လၢတၢ်သူၣ်ကိၢ်သးဂီၤ ထဲဒၣ်စှၤနၣ်ရံၣ်အတီၢ်ပူၤဘၣ်ဆၣ်, ယပျံၤဘၣ်ယိၣ်တၢ်နီၢ်နီၢ်န့ၣ်လီၤ. တၢ်လီၤမၢ်န့ၣ် ကမ့ၢ်ဝဲတၢ်လီၤပျံၤလီၤဖုး, ဒီးတၢ်ကဘၣ်ဒိဆါပှၤဒိၣ်မးန့ၣ်လီၤ. လံာ်ဝံယိၤအ့လး ၂ အပူၤန့ၣ်, တၢ်ဟးဂူာ်ဟးဂီၤ, ခီဖျိလၢဒွဲၣ်အါကလုာ်န့ၣ် မၤဟးဂီၤ စံၣ်ပျီ, စပံးလီၢ်, တၤသၣ်လီၢ်, ဒီးသ့ၣ်မုၢ်ဝၣ်ဘိတဖၣ်ဝံၤ, ဝံ စံးဘၣ် ကယဲၢ်ယူဒၤအပှၤဂီၢ်မုၢ်တဖၣ် ကပီၢ်ယၢ်လီၤက့ၤအသးန့ၣ်လီၤ. ဝံ ဟ့ၣ်ပလီၢ် ပှၤကီၢ်ဖိတဖၣ် ကတူၢ်ဘၣ် တၢ်ပူထီၣ်ကစၢ်ယွၤ, တၢ်အစၢလၢပိာ်ထွဲထီၣ်အခံတဖၣ်န့ၣ်လီၤ. ဘၣ်ဆၣ်, ကစၢ်ယွၤန့ၣ်တလဲၤကပာ် ပှၤဂီၢ်မုၢ်ဘၣ်. အဝဲသ့ၣ် မ့ၢ်နာ်သန့ၤ ကစၢ်ယွၤန့ၣ်ဒီး, ကမၤစၢၤဝဲ, ဒီးကဘှီဘၣ် မၤဂ့ၤထီၣ်က့ၤဝဲအဂ့ၢ်န့ၣ် ယိၤအ့ ၂:၂၅ ပာ်ဖျါဝဲလၢ “ဒီးယကဟ့ၣ်ပှဲၤထီၣ်သုလၢနံၣ်တဖၣ်အဂီၢ် လၢဒွဲၣ်တဖၣ်, ယတၢ်သုးမုၢ်ဂီၢ်မုၢ်လၢ ယမၢလီၤဆူသုကျါန့ၣ်အီၣ်တၢ်န့ၣ်လီၤ.”
ဖဲ ပှၤယူဒၤဖိတဖၣ် ဃၣ်က့ၤအသးဆူ ယွၤအအိၣ် ကစၢ်ယွၤ ဘှီဘၣ်မၤဂ့ၤထီၣ်က့ၤဝဲဒၣ်န့ၣ်လီၤ. ကစၢ်ယွၤ အဲၣ်ဒိးဘှီဘၣ်မၤဂ့ၤထီၣ်က့ၤနၤစ့ၢ်ကီးန့ၣ်လီၤ.
နတၢ်အိၣ်အသးန့ၣ် ကမ့ၢ်တၢ်တမံၤဂ့ၤတမံၤဂ့ၤန့ၣ် နဃၣ်က့ၤနသးဆူ ကစၢ်ယွၤအအိၣ်, ဒီးနာ်န့ၢ်အီၤသ့ဝဲဒၣ်, သ့ၣ်ညါနဲလၢ အဝဲမ့ၢ် “ယွၤနကစၢ်, ဒီးတမ့ၢ်တၢ်ဂၤဘၣ်” (:၂၇) န့ၣ်တက့ၢ်. တၢ်လၢအလီၤမၢ်အပူၤန့ၣ် ဒ်သိးနကဂ့ၤထီၣ်က့ၤ, ဒီးနကရ့လိာ်သးဒီးအီၤအဂီၢ်, ကစၢ်ယွၤ မ့ၢ်ပှၤတီပှၤလိၤလၢကမၤစၢၤနၤန့ၣ်လီၤ.
