ဘၣ်ဃးဒီးအမိၢ်အပၢ် အတၢ်စူၢ်တၢ်နာ် ကစၢ်ယ့ၣ်ရှူး န့ၣ် ဘဲ(လ) (Belle) တအဲၣ်ဒိး မၤဘၣ်ထွဲလိာ်အသးဘၣ်န့ၣ်လီၤ. ဖဲ ဘဲ(လ) ထီၣ်ဝဲဒၣ် ခီလ့ၣ်ကၠိအကတီၢ်, စံးလီၤအသး လၢအမ့ၢ် ပှၤတစူာ်တနာ် ကစၢ်ယွၤ, ဒီးတအိၣ်မူအိၣ်ဂဲၤလဲၤတၢ်ဒီးကစၢ်ယွၤဘၣ်န့ၣ်လီၤ. ဘၣ်ဆၣ်, ဖဲအလီၤမုၢ်လီၤဖးဒီးအတၢ်အဲၣ်တီဝံၤန့ၣ်ဒီး, လၢအသးပူၤ, တူၢ်ဘၣ်ခီၣ်ဘၣ်ဝဲ သးအတၢ်ဆီၣ်သနံးန့ၣ် ဒိၣ်ထီၣ်အါထီၣ်, နီၢ်ခိနီၢ်သးအတၢ်အိၣ်ဆူၣ်အိၣ်ချ့လၢ အကပၤကပၤန့ၣ် ဆံးလီၤစှၤလီၤဆူလာ်န့ၣ်လီၤ. ဘဲ(လ) ပာ်လီၤအသးလၢ ကမၤသံလီၤက့ၤအသးန့ၣ်လီၤ.
လၢတၢ်သးဟးဂီၤအဒိၣ်အယိာ်ဒ်သိးအံၤတဖၣ်အပူၤန့ၣ်, ဘဲ(လ) ဆိကမိၣ်ထီၣ်က့ၤ အမိၢ်အပၢ်တဖၣ် သူၣ်ခုသးခုဝဲလၢ ကစၢ်ခရံာ်အပူၤ, ဒီးတၢ်ဂဲၤလိာ်ကျဲးစၢၤတဖၣ် အိၣ်ဒံးဝဲအဖၢမုၢ်ဒၣ်လဲာ်, အကတၢၢ်န့ၣ် စူၢ်က့ၤနာ်က့ၤ ကစၢ်ယ့ၣ်ရှူး ဒ်တၢ်အုၣ်က့ၤခီၣ်က့ၤကစၢ် အသိးန့ၣ်လီၤ. လၢခံ, ဘဲ(လ) နၢ်ဟူဝဲဒၣ် ပှၤတဂၤ စံးကတိၤဝဲဒၣ် လၢ တရူးကီၢ် န့ၣ် ပှၤလၢတနၢ်ဟူဒံးဘၣ် တၢ်သးခုအကစီၣ် နီတဘျီတဖၣ်အဂ့ၢ်န့ၣ်လီၤ. ဘဲ(လ) အဲၣ်ဒိးလဲၤဝဲဒၣ်, ဒီးစံၣ်တံၤတဲလီၤ တၢ်သးခုကစီၣ်ဖဲန့ၣ်ဘၣ်ဆၣ်, မ့ၢ်လၢတၢ်လီၤပျံၤလီၤဖုးတဖၣ်အိၣ် ဝဲဒၣ်အဃိ, ပှၤတနီၤန့ၣ် တဟ့ၣ်ဂံၢ်ဟ့ၣ်ဘါအီၤဘၣ်န့ၣ်လီၤ. ဒ်လဲၣ်ဂ့ၤဒ်လဲၣ်ဂ့ၤ ဘဲလ် လဲၤဝဲဒၣ်, ဃုာ်ဒီးပိာ်ခွါသးစၢ်တဂၤလၢ အထံၣ်လိာ်သး ဖဲထီၣ်ဝဲ ခီလ့ၣ်ကၠိအကတီၢ်, ဒီးလၢခံန့ၣ် ဖျီအသးန့ၣ်လီၤ ဘဲ(လ) အသးသမူဒီတစိၤန့ၣ် စံၣ်တဲၤတဲလီၤဝဲဒၣ် တၢ်သးခုအကစီၣ်ဆူ ပှၤအိၣ်လၢတရူးကီၢ်, ဒီးကီၢ်ကၠီၣ်တဲၣ်တဖၣ်န့ၣ်လီၤ. ပှၤလၢအကထိတဖၣ်န့ၣ် စူၢ်က့ၤနာ်က့ၤ ကစၢ်ယ့ၣ်ရှူး, ဒီးပိာ်မုၣ်, လၢအမ့ၢ် အ့း(စ)ဘဲ ခိ (Isobel Kuhn) တဂၤ, တၢ်ဟ့ၣ်သါလၢ အပာ်တ့ၢ်ဝဲန့ၣ်, အိၣ်မူဒံးဝဲလၢထံကီၢ်သ့ၣ်တဖၣ်အံၤအဖၢမုၢ်န့ၣ်လီၤ.
မ့ၢ်မတၤတဂၤဟ့ၣ်ဝဲဒၣ် ပိာ်မုၣ်သးစၢ်တဂၤလၢ တၢ်အိၣ်မူအသီ, ဒီးတၢ်မုၢ်လၢ်, ဒီးဖဲအဝဲဘၣ်ကွၢ်ဆၢၣ်မဲာ်ဒီးသးသမူအတၢ်တၤ အကီအခဲတဖၣ်အကတီၢ်, မ့ၢ်မတၤတဂၤ လဲၤဃုာ်တၢ်ဒီးအီၤန့ၣ်လဲၣ်. မ့ၢ်ဒၣ် ကစၢ်ယ့ၣ်ရှူးန့ၣ်လီၤ.
ပတၢ်အိၣ်မူအိၣ်ဂဲၤ ကမ့ၢ်တၢ်မနုၤလဲၣ်န့ၣ် မ့ၢ်နဆိကမိၣ်နဲဧါ. ကမ့ၢ်တၢ်သံကွၢ်လီၤက့ၤနတၢ်မ့ၢ်တၢ်သ့ၣ်သ့ၣ်န့ၣ်လီၤ. ဃၣ်လိၤက့ၤနသးဆူ ကစၢ်ခရံာ် “ယွၤအဖိခွါ တဂၤဃီ” (ယိၤ ၃:၁၈), လၢအဒိးသံအသးလၢနဂီၢ် (ရိ ၅:၈) န့ၣ်တက့ၢ်. အဝဲအဲၣ်နၤအလၢအပှဲၤ ဒ်သိး ကဟ့ၣ်နၤတၢ်မူအထူအယိာ် (ယိၤ ၃:၁၆) န့ၣ်လီၤ. ဒ် ဘဲ(လ) အသိး, ပမ့ၢ်စူၢ်က့ၤနာ်က့ၤအီၤန့ၣ်ဒီး, ဖဲပဘၣ်ကွၢ်ဆၢၣ်မဲာ် သးသမူအတၢ်တၤတဖၣ်အကတီၢ်, အဝဲကအိၣ်ဒီးပှၤ, ဒီးတၢ်နီၤဟ့ၣ် ယွၤအတၢ်အဲၣ် လၢပှၤဂုၤပှၤဂၤအဂီၢ်န့ၣ် အဝဲကမၤစၢၤပှၤန့ၣ်လီၤ.
