ဖဲပဒိၣ်ထီၣ်သီအကတီၢ်, ယတမုၣ်တခွါတဖၣ် လၢအအိၣ်စီၤစုၤဒီးပှၤထဲဒၣ် ခံ မံးလာ်န့ၣ် တဒိးန့ၢ်တၢ်ပျဲလၢ ကရ့လိာ်အသးဒီးပဟံၣ်ဖိဃီဖိန့ၣ်ဘၣ်. ဖဲဒူၣ်ဖိထၢဖိအတၢ်ထံၣ်မဲာ် ထံၣ်နါန့ၣ် အဝဲသ့ၣ်တဟဲဝဲဒၣ်နီတဘျီဘၣ်. ဖဲပထံၣ်လိာ်ပသးလၢတၢ်ဆါတၢ်ပှ့ၤအကျးအကတီၢ်, တစံးကတိၤတၢ်ဒီးပှၤဘၣ်. အမိၢ်အပၢ် စံးဝဲဒၣ် အကတီၢ်ဖဲန့ၣ်, မ့ၢ်လၢပတထီၣ်ဘါယွၤ လၢသရိာ်, ဒီးပလုၢ်လၢ် အတဂ့ၤတဝါတဖၣ် ဒ်သိးတဒိၣ်စိလုၣ်ဘၢအဖိတဖၣ်အဂီၢ်န့ၣ်လီၤ. အါနံၣ်အါလါလဲၤပူၤကွံာ်ဝံၤ, ဖဲလၢယဝဲၢ်အဒိၣ်ကတၢၢ်တဂၤ အတၢ်သံ အတၢ်ရဲၣ်တၢ်ကျဲၤန့ၣ် ယတခွါတဂၤဟဲဝဲဒၣ်အဃိ, ကဲထီၣ်တၢ်ကမၢကမၣ်လၢယဂီၢ်န့ၣ်လီၤ. အဝဲဟဲဆူ ပဒီပုၢ်ဝဲၢ်တဂၤဘၣ်တဂၤအအိၣ်, ဒီးလၢတၢ်ဆီၣ်လီၤသးအပူၤန့ၣ်အဝဲသ့ၣ် အတၢ်ပာ်သူၣ်ပာ်သးလၢပလိၤအဂီၢ်န့ၣ် ဃ့ကညးပှၤန့ၣ်လီၤ. ပဒိးန့ၢ်က့ၤ ပတၢ်ရ့လိာ်ဘၣ်ထွဲလိာ်သးဒီးအီၤအသီတဘျီန့ၣ်လီၤ.
ဒ်သိး စီၤယၤကိာ် ကဃုထံၣ်န့ၢ်က့ၤ တၢ်ရ့လိာ်သးအဂ့ၤအဝါဒီးအဝဲၢ်ခွါ စီၤဧ့ရှီ အဂီၢ်, ကဘၣ်ဆီၣ်လီၤအသးန့ၣ်လီၤ. စီၤယၤကိာ် မ့ၢ်ဖိခံဂၤတဂၤ, လၢအမၤကမၣ် အဝဲၢ် စီၤဧ့ရှီ, ဒီးဟုၣ်န့ၢ်ဝဲဒၣ် ဖိဝဲၢ်ကိအခွဲးအယာ် (၂၅:၁၉-၃၄), ဒီးဒ်သိးကဒိးန့ၢ် ဖိဝဲၢ်ကိအတၢ်ဆိၣ်ဂ့ၤ (၂၆:၃၄, ၂၇:၄ဝ) အဂီၢ်, လီန့ၢ်ဝ့ၤန့ၢ်ဝဲဒၣ် အပၢ်သးပှၢ်န့ၣ်လီၤ. စီၤဧ့ရှီ အသူၣ်ဒိၣ်သးဖျိး, ဒီးမၤပျံၤမၤဖုး စီၤယၤကိာ် လၢကမၤသံဝဲဒၣ်အဃိ, အဝဲဃ့ၢ်ပူၤဖျဲးအသးဆူ ထံကီၢ်အဂၤန့ၣ်လီၤ.
တဘျုးနံၣ်လဲၤပူၤကွံာ်ဝံၤ, စီၤယၤကိာ် အဲၣ်ဒိးက့ၤဝဲဆူ အဟံၣ်ဘၣ်ဆၣ်, ပျံၤဝဲဒၣ်လၢ အဒီပုၢ်ဝဲၢ်ခံဂၤ အဘၢၣ်စၢၤ တၢ်ရ့လိာ်ဘၣ်ထွဲလိာ်သးလၢ အဟးဂီၤဒိၣ်ဒိၣ်ယိာ်ယိာ်န့ၣ် ကဘၣ်လိာ်ဘၣ်စးက့ၤဝဲဒၣ် လၢတၢ်တအိၣ်ဒီးတၢ်ဂၢ်သွံၣ်ဂၢ်စီၤ (၃၂:၆-၈) အဂီၢ်န့ၣ်လီၤ. အကတၢၢ်န့ၣ်, ဖဲစီၤယၤကိာ် ထံၣ်လိာ်အသးဒီးစီၤဧ့ရှီၤန့ၣ်ဒီး, လၢတၢ်ဆီၣ်လီၤသးအပူၤ, “တီၤလီၤကဒွံကျိာ်နွံစု တုၤအဘူးထီၣ်ဒီးအဝဲၢ် ” (၃၃:၃) န့ၣ်လီၤ. စီၤယၤကိာ် ပျံၤ စီၤဧ့ရှီၤ ကမၤသံအီၤဘၣ်ဆၣ်, လၢတၢ်ကမၤသံအီၤအလီၢ်န့ၣ် အဝဲၢ်ခွါ ဃ့ၢ်သဂၢၢ်အီၤ, ဒီးဖိးအီၤ, ဒီးထိၣ်လီၤတီၢ်အသးလၢအကိာ်လိၤ, ဒီးနၢမူအီၤဒီး အမဲာ်ထံလီၤတကူၢ်သ့ၣ် (:၄) န့ၣ်လီၤ.
ဖဲပမၤဆါပှၤဂုၤပှၤဂၤမ့ၢ်ဂ့ၤ, ပှၤဂုၤပှၤဂၤတဖၣ်မၤဆါပှၤမ့ၢ်ဂ့ၤန့ၣ်, အလီၢ်အိၣ်လၢ ပကဘၣ်ဆီၣ်လီၤသး, အိးထီၣ်ပသူၣ်ပသး, ဒ်သိးတၢ်ကမၤဂ့ၤထီၣ်က့ၤ တၢ်ဟးဂူာ်ဟးဂီၤအဂီၢ်, အါစုအါဘျီန့ၣ် တၢ်ဖံးတၢ်မၤတဖၣ်အိၣ်ဝဲဒၣ်အါမးန့ၣ်လီၤ. ဘၣ်ဆၣ်, ကစၢ်ယွၤ မၤဝဲဒၣ်သ့, ဒီးကမၤစၢၤဝဲဒၣ်ပှၤန့ၣ်လီၤ.