လၢဟီၣ်ခိၣ်ချၢ, တၢ်ဒ့တၢ်အူအပိးလီလၢ အဘၣ်တၢ်ပာ်လုၢ်ပာ်ပှ့ၤအီၤ အဒိၣ်ကတၢၢ်တဖၣ်အကျါန့ၣ် ပာ်ဃုာ်စ့ၢ်ကီးဒီး စထရၣ်ဒံၣ်ဘါရံၤယၢး (Stradivarius) သီတူၢ်, စဲလိၣ်, ဒီးကထါသ့ၣ်တဖၣ်န့ၣ်လီၤ. တၢ်ဒ့တၢ်အူ အပိးလီတဖၣ်အံၤ ဘၣ်တၢ်တ့ ဒုးအိၣ်ထီၣ်အီၤ ဖဲ နံၣ်ကယၤ ၁၇ ဒီး ၁၈ အဘၢၣ်စၢၤအဃိ, တၢ်ကဃုထံၣ်န့ၢ်အီၤ အဂီၢ်တညီဘၣ်, ဒီးတၢ်ကဆၢတဲာ်အလုၢ်အပှ့ၤတန့ၢ်တသ့ဘၣ်န့ၣ်လီၤ. တၢ်လုၢ်ဒိၣ်ပှ့ၤဒိၣ်တမံၤမံၤန့ၣ် ကြၢးဒိးန့ၢ် တၢ်အံးထွဲကွၢ်ထွဲအီၤအဂ့ၤကတၢၢ်န့ၣ်လီၤ. လၢတၢ်န့ၣ်အဃိ, ဖဲပှၤဒိန့ၢ်အီၤတၢ်ဂီၤအကတီၢ်, စထရၣ်ဒံၣ်ဘါရံၤယၢး စဲလိၣ်လၢ အကၢပှ့ၤကၢကလံၤ အါန့ၢ်ဒံး ဒီလၣ် အကကွဲၢ် ၂ဝ တဖျၢၣ်န့ၣ် လီၤတဲာ်ဝဲဆူ စီၢ်နီၤခိၣ်အဖီလာ်န့ၣ်ဒီး, ကဲထီၣ်တၢ်ဖုးသံပျီၢ်သံနီၢ်နီၢ်လၢ ပှၤကိးဂၤဒဲးအဂီၢ်န့ၣ်လီၤ.
ဒ် စထရၣ်ဒံၣ်ဘါရံၤယၢး အတၢ်ဒ့တၢ်အူအပိးလီန့ၣ် ကြၢးလၢတၢ်ဟံးဖီၣ်ပၢၤဃာ်အီၤဂ့ၤဂ့ၤဘၣ်ဘၣ်အသိး, ပကဘၣ်ပာ်သူၣ်ပာ်သးလၢ ပတၢ်ရ့လိာ်ဘၣ်ထွဲလိာ်သးတဖၣ်အပူၤန့ၣ်လီၤ. ကစၢ်ယ့ၣ်ရှူး ဒုးနဲၣ်ပာ်ဖျါအတၢ်အဲၣ် လၢပဂီၢ်အဃိ, ပကဘၣ်အဲၣ်ပှၤဂုၤပှၤဂၤန့ၣ်လီၤ. ကစၢ်ယ့ၣ်ရှူး စံးဘၣ် အပျဲၢ်အဘီၣ်တဖၣ်လၢ “ယဟ့ၣ်သုလၢ တၢ်မၤလိာ်အသီတထံၣ်, ဒ်သိးသုကအဲၣ်လိာ်ကွံလိာ်သုသးသကိးသကိး, ဒ်ယအဲၣ်သုအသိး, ဒ်သိးသုကအဲၣ်လိာ်ကွံလိာ်သုသးသကိးသကိး” န့ၣ် မ့ၢ်တၢ်လၢပကြၢးဆိကမိၣ်ပာ်သူၣ်ပာ်သးန့ၣ်လီၤ. ဘၣ်မနုၤအဃိ, ကစၢ်ခရံာ် ကိးဝဲဒၣ်လၢ တၢ်မၤလိာ်အသီတထံၣ်လဲၣ်. တၢ်မၤလိာ်အသီစံးတၢ်န့ၣ် အဂံၢ်စဲၤလီၤဝဲဒၣ် ကျိၤကျဲလၢ ကစၢ်ယ့ၣ်ရှူး အဲၣ်ဘၣ်ပှၤအဃိန့ၣ်လီၤ. တၢ်မၤလိာ်အသီအံၤလၢ ကဘၣ်အဲၣ်တၢ်န့ၣ် တမ့ၢ်လၢတၢ်သူၣ်တအိၣ်သးတအိၣ် (မ့) လၢတၢ်မၤညီတၢ်အပူၤန့ၣ်ဘၣ်. မ့မ့ၢ်ကဘၣ်အဲၣ်ဝဲဒၣ် လၢတၢ်ပာ်လီၤသး, လၢတၢ်ပာ်လုၢ်ပာ်ပှ့ၤ, ဒီးလၢတၢ်ဟ့ၣ်လီၤသးအပူၤန့ၣ်လီၤ. တၢ်အဲၣ်အကျိၤကျဲဒ်သိးအံၤန့ၣ် ကဆှၢပှၤဆူတၢ်ကဲထီၣ်အပျဲၢ်အဘီၣ်, တၢ်စူးကွံာ်ညိကွံာ်သး, ဒီးလၢအပျဲၢ်အဘီၣ်တဖၣ်အဂီၢ်ဒၣ်လဲာ်, ကတူၢ်သံခီၣ်သံအသးသ့ၣ်သ့ၣ်န့ၣ်လီၤ. ဖဲ ကစၢ်ခရံာ် က့ၤထီၣ်ဆူမူခိၣ်ဝံၤန့ၣ်ဒီး, တၢ်ကဟုကယာ်လိာ်သးကဒဲကဒဲဒ်သိးအံၤန့ၣ် ကထိၣ်ဟူးထိၣ်ဂဲၤ အပျဲၢ်အဘီၣ်တဖၣ် ကအိၣ်မူအိၣ်ဂဲၤတ့ၢ်ဝဲလၢ ဟီၣ်ခိၣ်လၢအကီအခဲ, ဒီးတၢ်ထီဒုၣ်ထီဒါလိာ်သးအပူၤဒ်လဲၣ်န့ၣ်လီၤ.
မ်ပကအဲၣ်ပှၤဂုၤပှၤဂၤတဖၣ်လၢ တၢ်သူၣ်အိၣ်သးအိၣ်, ဒီးလၢတၢ်ဟ့ၣ်လီၤသးအပူၤ, ဒ်သိးဒီးပကဆဲးကပီၤပာ်ဖျါထီၣ် ကစၢ်ယ့ၣ်ရှူးအတၢ်အဲၣ် လၢအလုၢ်ဒိၣ်အပှ့ၤဒိၣ်, ဒီးလၢတၢ်ကထိၣ်ဒွးအလုၢ်အပှ့ၤတန့ၢ်တသ့လၢၤဘၣ်အဂီၢ်န့ၣ်တက့ၢ်.