ဖဲ (၁၉၈၅) နံၣ်န့ၣ် အဲးဒဝ့(န) ဖရံမဲ(န) (Rabbi Edwin Friedman) လၢအလုၢ်အီၣ်အသးသမူ ဒ်ဒူၣ်ဖိထၢဖိ အပှၤကူစါယါဘျါတၢ်, ဒီးပှၤယူဒၤဖိတၢ်ဘူၣ်တၢ်ဘါခိၣ်နၢ်တဂၤ, လၢအလံာ် “ပှၤတစိၤဘၣ်ပှၤတစိၤ” (Generation to Generation) အပူၤန့ၣ် ဒုးသ့ၣ်ညါဝဲ ပှၤဖးလံာ်တဖၣ်လၢ လံာ်ကျိၤကူာ် “သးလၢအပူၤဖျဲးဒီးတၢ်သူၣ်ကိၢ်သးဂီၤ” န့ၣ်လီၤ. လၢခံန့ၣ်, တၢ်ဂ့ၢ်အံၤ ဖရံမဲ(န) ပာ်ဖျါထီၣ်က့ၤဝဲလၢ အတၢ်ကွဲးဃိထံ “ထူၣ်ပျၢ်နၢၢ်လၢအဂံၢ်စၢ်တမံၤ” တဘ့ၣ်အပူၤန့ၣ် စံးဝဲဒၣ်လၢ “စိၤခဲအံၤ, အမဲရကၤန့ၣ် ကဲထီၣ်ထံကီၢ်လၢ တၢ်သူၣ်ကိၢ်သးဂီၤအါထီၣ်ထီဘိအဃိ, ပတၢ်ကရၢကရိတဖၣ် တူၢ်ဘၣ်ခီၣ်ဘၣ်တၢ်လၢသးတကပၤန့ၣ် ဆံးလီၤစှၤလီၤ, ဒီးကဲထီၣ် တၢ်အစုၣ်အပျၢ်လၢ တၢ်ကဲခိၣ်ကဲနၢ် အကံၢ်စီအဂ့ၤအဝါတဖၣ်အဂီၢ်န့ၣ်လီၤ. ဖရံမဲ(န) ပညိၣ်ပာ်ဖျါဝဲ တၢ်သူၣ်ကိၢ်သးဂီၤ အယံာ်အထီအံၤ ရၤလီၤအသးဆူ ဒူၣ်ဖိထၢဖိတဒူၣ်, တၢ်ဖံးတၢ်မၤအလီၢ်တတီၤ, ပှၤတကရူၢ်တဖုအပူၤန့ၣ်လီၤ. ဒ်န့ၣ်အသိး, ခိၣ်နၢ်, ကမ့ၢ်ဝဲဒ်ပှၤအိၣ်ဒီးသးအတၢ်မုာ်တၢ်ပၢၤ လၢကလံၤမုၢ်တွၤ အသးကံၢ်ပူၤတဂၤအသိး, ကတဲာ်ကတီၤန့ၢ် သးလၢအပူၤဖျဲးဒီးတၢ်သူၣ်ကိၢ်သးဂီၤတမံၤ, ဒ်သိးကရၤလီၤအသးဆူ ပှၤတဝၢဂ့ၢ်ဂီၤအတၢ်ရဲၣ်ကျဲၤကျိၤကျဲအပူၤန့ၣ်လီၤ.

ထါစံးထီၣ်ပတြၢၤ ၄ မ့ၢ် စီၤဒၤဝံး အထါတယုၢ်, ကွဲးဝဲဒၣ် ဖဲအသးသမူ ကလံၤမုၢ်တွၤ အသးကံၢ်ပူၤအကတီၢ်န့ၣ်လီၤ. လၢတၢ်သူၣ်ကိၢ်သးဂီၤအပူၤန့ၣ် စီၤဒၤဝံး ကိးထီၣ် ယွၤ, ဒီးစံးဝဲဒၣ် “တုၤယဘၣ်တၢ်နးတၢ်ဖှီၣ်ဒီး, နမၤပူၤမၤဖျဲးလံယၤလံ, သူၣ်ကညီၤသးကညီၤယၤ, ဒီးဒိကနၢ်ယဘါထုကဖၣ်တၢ်တက့ၢ်” (:၁) န့ၣ်လီၤ. ဖဲ စီၤဒၤဝံး ဘၣ်ကိၢ်ဘၣ်ဂီၤဝဲဒၣ်လၢအသးသမူအဂီၢ်န့ၣ်ဒီး, ပှၤပိာ်အခံတဖၣ်စ့ၢ်ကီးပျံၤတၢ်န့ၣ် ပာ်သူၣ်ပာ်သးဝဲအဃိ, စံးဝဲဒၣ်လၢ “ပှၤစံးဝဲအါဂၤ, မ့ၢ်မတၤကဒုးနဲၣ်ပှၤလၢ တၢ်အဂ့ၤတဂၤလဲၣ်” (:၆) န့ၣ်လီၤ.

စီၤဒၤဝံး အတၢ်ဆၢတဲာ်လၢ ကနာ်သန့ၤ ယွၤ န့ၣ် ဒုးအိၣ်ထီၣ် သးလၢအပူၤဖျဲးဒီးတၢ်သူၣ်ကိၢ်သးဂီၤ, ဖဲတၢ်အိၣ်အသးလၢ အအိၣ်ပှဲၤဒီးတၢ်သူၣ်ကိၢ်သးဂီၤအပူၤအဃိ, စံးဝဲဒၣ်လၢ “ယကမံလီၤဒီးမံသပ့ၤမုာ်မုာ်ခုၣ်ခုၣ်လီၤ. အဂ့ၢ်ဒ်အံၤ, ယွၤဧၢ ပှၤလၢအဒုးပူၤဖျဲးယၤလၢ တၢ်အၢတၢ်သီမ့ၢ် ထဲနၤတဂၤဧိၤ” (:၈) အဃိ, စီၤဒၤဝံး ပာ်အသးမုာ်မုာ်သ့ဝဲဒၣ်န့ၣ်လီၤ.

ပဝဲနၤယၤစ့ၢ်ကီး, ပအိၣ်ဘှံးအိၣ်သါ သ့ဝဲဒၣ်လၢ သးလၢအပူၤဖျဲးဒီးတၢ်သူၣ်ကိၢ်သးဂီၤအပူၤ, တၢ်လၢကစၢ်ယွၤ ကတဲာ်ကတီၤန့ၢ်ပှၤအပူၤန့ၣ်လီၤ. ဖဲဒၣ်ပလဲၤတၢ်လီၢ် တပူၤလၢ်လၢ်န့ၣ် ပစိာ်ရၤလီၤ ကစၢ်ယွၤအတၢ်ဃူတၢ်မုာ် သ့ဝဲဒၣ်န့ၣ်လီၤ.