ဖဲ အံၣ်လဲကၠၣ် (Elijah) လိၣ်ကွဲဝဲဒၣ်ဒီးအတံၤသကိးဖိတဖၣ်အကတီၢ်, လၢတၢ်တပာ်သူၣ်ပာ်သးအပူၤ, ဖှီယာ်ဘၣ်ဝဲ ဒီလၣ် တဆံတဘ့ၣ်န့ၣ်လီၤ. လၢတၢ်အ့ၣ်လိာ်ဟ့ၣ်ပလီၢ် အဖိခွါအလီၢ်န့ၣ်, အပၢ်တဲဘၣ်အီၤလၢ ကခီလဲလိာ် အစ့လၢအယာ်တဘ့ၣ်န့ၣ်ဆူ စ့သီသံၣ်ဘှဲတဘ့ၣ် လၢအစ့ထၢၣ်ပူၤန့ၣ်လီၤ. လၢတၢ်သးသဘံၣ်ဘုၣ်အပူၤန့ၣ်, သံကွၢ်ဝဲဒၣ်အပၢ်လၢ “ဘၣ်မနုၤအဃိ နမၤဒ်သိးအံၤန့ၣ်လဲၣ်,” ဒီးအပၢ်စံးဆၢက့ၤအီၤ, “တၢ်ဂ့ၢ်တမံၤန့ၣ် နမ့ၢ်ယဖိခွါအဃိ” န့ၣ်လီၤ. တၢ်ဂ့ၢ်အံၤ ဒုးသ့ၣ်နီၣ်ထီၣ်က့ၤပှၤ တၢ်လၢကစၢ်ယ့ၣ်ရှူး မၤတ့ၢ်တၢ်လၢပဂီၢ်စ့ၢ်ကီးန့ၣ်လီၤ. အဂ့ၢ်ဒ်အံၤ, ကစၢ်ယ့ၣ်ရှုး ဟဲလီၤ, ဒီးဟ့ၣ်လီၤအသးသမူ ဒ်သိးကခီလဲလိာ်တၢ်လၢပဂီၢ်, ဒီးခဲကနံၣ်အံၤ, ပအိၣ်မူအိၣ်ဂဲၤဘၣ်လၢ တၢ်အိၣ်မူသီသံၣ်ဘှဲအပူၤန့ၣ်လီၤ.

မ့ၢ်လၢကစၢ်ယွၤ တ့လီၤပၣ်လီၤ ပဝဲတဂၤစုာ်စုာ်အဃိ, လၢကစၢ်ယွၤအဂီၢ်, ကယဲၢ်သးသမူကိးဖျၢၣ်ဒဲးန့ၣ် မ့ၢ်တၢ်လုၢ်ဒိၣ်ပှ့ၤဒိၣ်န့ၣ်လီၤ. ဘၣ်ဆၣ်, ပတၢ်ဒဲးဘးအန့ဆၢၣ်- “တၢ်ဒဲးဘးအနီၢ်ခိ” (ရိမ့ၤ ၆:၆) န့ၣ် တြီဃာ်ပှၤလၢ ပကအိၣ်မူအိၣ်ဂဲၤ တၢ်အိၣ်မူလၢ အကြၢးဒီးယွၤအတၢ်စီတၢ်ဆှံန့ၣ်လီၤ. လၢတၢ်န့ၣ်အဃိ, ကစၢ်ယွၤ အတၢ်အဲၣ်အဒိၣ်အယိာ်လၢပဂီၢ်န့ၣ်, ဟ့ၣ်လီၤဝဲဒၣ် အဖိခွါ လၢတၢ်သူၣ်အိၣ်သးအိၣ်အပူၤ, ဒ်သိးကဟ့ၣ်ဝဲဒၣ် တၢ်အပှ့ၤကလံၤ လၢပတၢ်ဒဲးဘးအဂီၢ်န့ၣ်လီၤ. ပနီၢ်ခိအလီၢ်လံၤန့ၣ် ဘၣ်တၢ်ပျၤထီ ဃုာ်ဒီးအီၤ လၢထူၣ်စုညါအလိၤ, ဒီးလၢတၢ်ခီလဲလိာ်တၢ်အဂီၢ်, ကစၢ်ယွၤ ဟ့ၣ်လီၤပှၤတၢ်အိၣ်မူအသီ- “လၢအတကဲလၢၤတၢ်ဒဲးဘးအကုၢ်အပှၤ” (:၆) န့ၣ်လီၤ. ဖဲပတူၢ်လိာ် တၢ်အိၣ်မူအသီလၢ ကစၢ်ယွၤ ဟ့ၣ်လီၤပှၤအဃိ, ပနီၢ်ခိလီၢ်လံၤန့ၣ် မ့ၢ်အိၣ်ပှဲၤဝဲဒီးတၢ်ဒဲးဘး, ဒီးဟးဂီၤဝဲ, “အုၣ်သံဝဲဒ်တၢ်လီတၢ်ဝ့ၤ အတၢ်သးကွံအသိး” (အ့း ၄:၂၂) ဒၣ်လဲာ်, ခဲကနံၣ်အံၤ, “လၢတၢ်လီၤဂာ်ယွၤအသိး, လၢတၢ်တီတၢ်လိၤဒီးတၢ်စီဆှံနီၢ်နီၢ်အပူၤ” (:၂၄), ပအိၣ်လၢအိၣ်ပှဲၤ လီၤတံၢ်လီၤဆဲးသ့ဝဲဒၣ်န့ၣ်လီၤ.

အံၣ်လဲကၠၣ် အပၢ်န့ၣ်, မ့ၢ်လၢအအဲၣ်ဘၣ်အဖိခွါအဃိ, တၢ်လၢအိၣ်ဒီးအီၤန့ၣ် အဲၣ်ဒိးဟ့ၣ်လီၤဝဲဒၣ် အဖိခွါ, လၢတၢ်သူၣ်အိၣ်သးအိၣ်အပူၤန့ၣ်လီၤ. ဘၣ်ဆၣ်, တၢ်ဟ့ၣ်လၢအဂ့ၤဒိၣ်တမံၤန့ၣ်, မ့ၢ်ဝဲဒၣ် ထဲကစၢ်ယွၤတဂၤဧိၤ မၤလဲၢ်ထီၣ်အတၢ်အဲၣ်, လၢအမ့ၢ် တၢ်ပှ့ၤက့ၤ ပသးသမူတဖၣ်န့ၣ်လီၤ. ဖဲပတူၢ်လိာ် တၢ်အိၣ်မူအသီလၢ ကစၢ်ယွၤ ဟ့ၣ်လီၤပှၤန့ၣ်ဒီး, ပတမ့ၢ်ပှၤတၢ်ဒဲးဘးဖိ, လၢအပူၤကွံာ်ပမ့ၢ်တ့ၢ်တၢ်အသိးလၢၤဘၣ်န့ၣ်လီၤ.