ဖဲ ဟၣ်ရံၣ်က့ ဟဲၣ်လံ(န) (ကလံၤမုၢ်) မၤဟးဂီၤကွံာ် ပှၤအဟံၣ်ဃီတဖၣ်အကတီၢ်, လၢပှၤခရံာ်ဖိ တၢ်မၤဂ့ၤမၤစၢၤကရၢအဂီၢ်, ပှၤဟ့ၣ်လီၤအသး, ဒီးမုာ်သးမၤကလီတၢ်တဂၤန့ၣ် သံကွၢ်ဝဲဒၣ် ပိာ်မုၣ်တဂၤလၢ (အပူၤကွံာ်တစိၤဖိန့ၣ် ဟီၣ်ကိးပသူဝဲလၢ အကလုၢ်ဖးဒိၣ်တဂၤ) “ဘၣ်မနုၤအဃိ နဟီၣ်ကိးပသူဝဲဒၣ်လဲၣ်” န့ၣ်ဒီး, ပိာ်မုၣ်န့ၣ် စံးဆၢက့ၤအီၤလၢ “ယတၢ်ကိးမံၤဒဲး လီၤမၢ်ကွံာ်ဝဲအဃိ, တမ့ၢ်ယဟီၣ်ကိးပသူယဲန့ၣ်ဘၣ်. မ့ၢ်လၢယထံၣ်န့ၢ် တၢ်အဲၣ်တၢ်ကွံ နဲၣ်ဖျါထီၣ်အသးအဃိ” န့ၣ်လီၤ.
ကစၢ်ယွၤအသး ပာ်ဖျါထီၣ် အတၢ်သးအိၣ်ဝဲလၢ ပကမၤဂ့ၤမၤစၢၤ ပှၤလိၣ်ဘၣ်တၢ်မၤစၢၤတဖၣ်န့ၣ်လီၤ. တချုးလၢပှၤအံၣ်စရ့လးဖိတဖၣ် လဲၤနုာ်ဆူ ကီၢ်တၢ်စံးပာ်ဒံးဘၣ်န့ၣ် စီၤမိၤရှ့ ဟ့ၣ်လီၤ အဝဲသ့ၣ်လၢ ကစၢ်ယွၤ အတၢ်သိၣ်တၢ်သီ, ဒီးစံးဘၣ်ပှၤအံၣ်စရ့လးဖိတဖၣ်လၢ, “နတဘၣ်မၤကိၤနသး, ဒီးနတဘၣ်တၤဒုၣ် နစုလၢ နဒီပုၢ်ဝဲၢ်အဖှီၣ်အယာ်ဘၣ်, ဒီးနဘၣ်အိးထီၣ်နစုဖးလဲၢ်, ဒီးနဘၣ်ဒုးလိၢ်အီၤ ဖဲအကြၢးဒီးတၢ်လၢအန့ၢ်ဘၣ်အလီၢ်အိၣ်ဝဲ” (၅ မိၤ ၁၅:၇-၈) န့ၣ်လီၤ. ယွၤအပှၤဂီၢ်မုၢ်တဖၣ် အတၢ်ပာ်သူၣ်ပာ်သးဆူ ပှၤဖှီၣ်ဖိယာ်ဖိအအိၣ်န့ၣ်, ကဘၣ်လီၣ်ဖျါထီၣ် ကစၢ်ယွၤအသး “တုၤနဟ့ၣ်လီၤအီၤဒီး, နတဘၣ်သးအုးဘၣ်” (၁၅:၁၀) န့ၣ်လီၤ.
လၢတၢ်ဟးဂီၤအၢအၢသီသီ အတၢ်အိၣ်အသးအပူၤမ့ၢ်ဂ့ၤ, (မ့) လၢကိးမုၢ်နံၤ ပတၢ်အိၣ်မူအပူၤမ့ၢ်ဂ့ၤ, ကစၢ်ယွၤ အတၢ်သူၣ်ကညီၤသးကညီၤ အတၢ်ဆိၣ်ဂ့ၤလၢပဒိးန့ၢ်တဖၣ်န့ၣ် ပမ့ၢ်ဟ့ၣ်လီၤဆူ ပှၤလၢအလိၣ်ဘၣ်တၢ်မၤစၢၤတၣ်အအိၣ်န့ၣ်ဒီး, ကမ့ၢ်ပဒုးကဲထီၣ် တၢ်အုၣ်သးတမံၤ, လၢအမ့ၢ်အဖိခွါကစၢ်ယ့ၣ်ရှူး အတၢ်အဲၣ်, လၢအဟဲလီၤ “စံၣ်တဲၤတဲလီၤတၢ်သးခုအကစီၣ် လၢပှၤဖှီၣ်ဖိယာ်ဖိ” (လူၤ ၄:၁၈) န့ၣ်လီၤ. နီၢ်နီၢ်န့ၣ်, ကစၢ်ယွၤ အၢၣ်လီၤအီလီၤဝဲလၢ “ကဆိၣ်ဂ့ၤ,” ပှၤနီၤဟ့ၣ်တၢ်ဆူ ပှၤဂုၤပှၤဂၤ, လၢအတကွၢ်ဒၣ်ထဲအကစၢ်ဒၣ်ဝဲအဂီၢ်, ဒီးတသးအုးဘၣ်ဝဲတဂၤ (၅ မိၤ ၁၅:၁၀) န့ၣ်လီၤ. ကစၢ်ယွၤကဆိၣ်ဂ့ၤ ခ့ခါခဲအံၤ အတၢ်အိၣ်မူ,ဃုာ်ဒီးတၢ်အိၣ်မူလၢတၢ်သံအဝာ်ဘးခီအဂီၢ် (ကွၢ် လူၤ ၁၄:၁၄) န့ၣ်လီၤ. ပတထံၣ်န့ၢ် ကစၢ်ယွၤ လၢနီၢ်ခိနီၢ်ခီတန့ၢ်တသ့ဒၣ်လဲာ်, ဖဲပပာ်ဖျါထီၣ် ကစၢ်အတၢ်အဲၣ်လၢ အဝဲသ့ၣ်အဂီၢ်န့ၣ်ဒီး, ပှၤဂုၤပှၤဂၤ ကထံၣ်တဖျဲးဝဲဒၣ် ကစၢ်ယွၤ
န့ၣ်လီၤ. မုၢ်တနံၤအံၤ, မ်ယွၤအတၢ်အဲၣ်တၢ်ကွံ ကနဲၣ်ဖျါထီၣ်အသး, ဒ်တၢ်သူၣ်ကညီၤ
သးကညီၤအသိး, ခီဖျိလၢပတၢ်အိၣ်မူအပူၤန့ၣ်တက့ၢ်.