ဖဲနံၤအိၣ်ဖျဲၣ်ဆၢက့ၤအမူးကတီၢ်, မံၤယၣ် (Mia) လၢအသးအိၣ်ယဲၢ်နံၣ်တဂၤ လိာ်ကွဲဝဲ, သးဝံၣ်ဝဲဒၣ် “သးခုလၢ နံၤအိၣ်ဖျဲၣ်,” အီၣ်ဝဲဒၣ်ကိၣ်ဆီဒံၣ်, ဒီးခိးကွၢ် အတံၤသကိးတဖၣ် အိးထီၣ်ဝဲ တၢ်ဟ့ၣ်တဖၣ်န့ၣ် လၢအဂီၢ်မုာ်ဒိၣ်မးန့ၣ်လီၤ. ဖဲပှၤကိးဂၤဒဲး ဟးထီၣ်လိာ်ကွဲလၢ ဟံၣ်ချၢအကတီၢ်, မံၤယၣ်ဖိ စံးဝဲဒၣ်လၢ “မိမိၢ်ဧၢ, ယကက့ၤဆူဟံၣ်” န့ၣ်လီၤ. အဝဲသ့ၣ် စံးဘျုးစံးဖှိၣ် ဟံၣ်ကစၢ်တဖၣ်ဝံၤ, ဒိးထီၣ်သိလ့ၣ်, ဒီးနီၣ်ဟးထီၣ်ဝဲဆူ ကျဲခိၣ်အကတီၢ်, အမိၢ် စံးဘၣ်အီၤလၢ ကဟ့ၣ်ခီနီၤလီၤ မုၢ်တနံၤအံၤ, အတၢ်လဲၤခီဖျိလၢ အမၤမုာ်အသး အဒိၣ်ကတၢၢ်လၢအဂ့ၢ်န့ၣ်လီၤ. လၢတၢ်နံၤကမှံအပူၤန့ၣ် မံၤယၣ် စံးဆၢဝဲအမိၢ်, “တၢ်က့ၤဆူဟံၣ်,” ဒီးတစိၢ်ဖိန့ၣ် မံဘၣ်အသးန့ၣ်လီၤ.

ဖဲပနီၢ်ကစၢ် လီၤဘှံးလီၤတီၤဝဲန့ၣ် ပမ့ၢ်တသ့ၣ်ညါဘၣ်ဒၣ်လဲာ်, ပဝဲကိးဂၤဒဲးန့ၣ်, ပလိၣ်ဘၣ်လၢ နီၢ်ခိ, နီၢ်သး, ဒီးပသးအတၢ်တူၢ်ဘၣ်ခီၣ်ဘၣ်တဖၣ်န့ၣ် အတၢ်အိၣ်ဘှံးအိၣ်သါအဂီၢ်န့ၣ်လီၤ. ဖဲပတူၢ်လိာ် တၢ်အုၣ်က့ၤခီၣ်က့ၤ အတၢ်သးခုကစီၣ်, ခီဖျိလၢကစၢ်ခရံာ်အကတီၢ်, ကစၢ်ယွၤစ့ၢ်ကီး ကတဲာ်ကတီၤန့ၢ်ပှၤ တၢ်အိၣ်ဘှံး အိၣ်ဟဲလၢယွၤ,ဃုာ်ဒီး နီၢ်သးအတၢ်အိၣ်ဘှံးလၢ ကိးမုၢ်နံၤဒဲးအဂီၢ်, ဒ်သးစီဆှံအတၢ်မၤစၢၤပှၤ, ဒ်သိးပကအိၣ်မူအိၣ်ဂဲၤ တၢ်အိၣ်မူလၢကစၢ်ခရံာ်အဂီၢ်, ခီဖျိလၢတၢ်စူၢ်တၢ်နာ်န့ၣ်လီၤ. ပှၤလၢအနာ်သန့ၤကစၢ်ယွၤန့ၣ် သန့ၤအသးသ့ဝဲဒၣ်လၢ ကစၢ်ယွၤအိၣ်ဒီးပှၤလီၤထူလီၤယိာ်, ယွၤအစိကမီၤလၢအကတၢၢ်တအိၣ်, ဒီးယွၤအတၢ်အၢၣ်လီၤလၢ အတဆီတလဲအသးတဖၣ်အပူၤန့ၣ်လီၤ. မ့ၢ်လၢယွၤ အုၣ်က့ၤခီၣ်က့ၤပှၤ, ခီဖျိလၢကစၢ်ခရံာ် တူၢ်သံအသးလၢထူၣ်စုညါအဃိ, ပအိၣ်ဘှံးအိၣ်သါလၢ ယွၤအတၢ်ဃူတၢ်မုာ် အတၢ်လၢတၢ်ပှဲၤအပူၤ (ဧ့ၤ ၄:၁-၄) သ့ဝဲဒၣ်န့ၣ်လီၤ. ခ့ခါခဲအံၤ, ဒီးဖဲလၢပကစၢ်ယ့ၣ်ရှူး အတၢ်ဟဲက့ၤကဒါက့ၤအကတီၢ်န့ၣ် ပကလဲၤခီဖျိကလၢၢ်ဘၣ် ကစၢ်ယွၤ အတၢ်အိၣ်ဘှံး, ဒ်တၢ်အုၣ်ကီၤတမံၤ လၢထီၣ်ပှဲၤထီၣ်ဝဲဒၣ်လီၤစိၤလီၤထီ (:၅-၈) န့ၣ်လီၤ.

“အဂ့ၢ်ဒ်အံၤ, ပှၤလၢအနုာ်ဘၣ်တ့ၢ်ဝဲလၢ အတၢ်အိၣ်ဘှံးအပူၤတဂၤန့ၣ်, အဝဲဒၣ်အိၣ်ဘှံးစ့ၢ်ကီးလၢအတၢ်မၤ, ဒ်ယွၤလၢအတၢ်မၤဒၣ်ဝဲအသိး” (:၁၀) န့ၣ်လီၤ. လၢတၢ်န့ၣ်အဃိ, ခီဖျိပနာ်သန့ၤယွၤန့ၣ် ပအိၣ်ဘံၣ်အိၣ်ဘၢလၢကစၢ်ခရံာ်အပူၤ, လၢတၢ်ဟ့ၣ်လီၤသး, ဒီးလၢတၢ်အဲၣ်ဒိကနၣ်တၢ်အပူၤန့ၣ်ဒီး, ပမုာ်လၤသးခုသ့ဝဲဒၣ် တၢ်အိၣ်မူလၢ အအိၣ်ပှဲၤဒီးတၢ်မုၢ်လၢ်န့ၣ်လီၤ. ထဲဒၣ်ယွၤတဂၤဧိၤ, ကတဲာ်ကတီၤန့ၢ်ပှၤ တၢ်အိၣ်ဘှံးလၢ အဒုးအိၣ်ထီၣ်က့ၤ နီၢ်ခိနီၢ်သးအဂံၢ်ဘါသ့ဝဲဒၣ် မုၢ်နံၤလၢအပူၤကွံာ်, မုၢ်တနံၤအံၤ, ဒီးခါဆူညါလီၤထူလီၤယိာ်အဂီၢ်န့ၣ်လီၤ.