ပတၢ်အိၣ်ဖှိၣ်လဲၤမၤစၢၤ ပှၤကွၢ်ထွဲ ပှၤသူၣ်က့သးပှၢ်ဟံၣ်တဖျၢၣ်အကတီၢ်, ပှၤသးပှၢ်အိၣ်ဆိးဝဲဖဲဟံၣ်အံၤတဂၤ, စံးဘၣ်ယၤလၢ အပူၤကွံာ်နံၣ်တဖၣ်န့ၣ် အဖိမုၣ် ဟဲဆှၢအီၤဖဲအံၤ, ဒီးပာ်တ့ၢ်အီၤလၢတၢ်သူၣ်ထီၣ်အကျဲကပၤအဂ့ၢ်န့ၣ်လီၤ. အဝဲဘၣ်အိၣ်လၢ အလီၢ်ဆ့ၣ်နီၤလ့ၣ်ပၣ်အလိၤအဃိ, အဲး (Ed) ဃ့ၢ်လူၤပိာ် အဖိမုၣ်အခံတန့ၢ်ဘၣ်. အဖိမုၣ်က့ၤကဒါဆူ အသိလ့ၣ်အိၣ်တၢ်အလီၢ်, နီၣ်ထီၣ်ဝဲသိလ့ၣ်, ဒီးတကွၢ်ကဒါဝဲဆူအလီၢ်ခံဘၣ်န့ၣ်လီၤ. အဖိမုၣ်စံးတ့ၢ်အီၤလၢ “ပကလဲၤဆူ ဟံၣ်ဒွဲလၢအဂ့ၤတဖျၢၣ်” န့ၣ်လီၤ. မုၢ်တနံၤအံၤန့ၣ်, အဝဲထံၣ်ဘၣ် အဖိမုၣ် အကတၢၢ်တဘျီန့ၣ်လီၤ.
အဲး အတၢ်လဲၤခီဖျိအံၤ တလီၤဂာ်ဒီးဟံၣ်ဖိဃီဖိလၢ အဲၣ်လိာ်ကွံလိာ်အသး, ဒီးအံးထွဲကွၢ်ထွဲ ပှၤသူၣ်က့သးပှၢ်အဃိ, အဲး အသးဘၣ်ဒိဘၣ်ထံးဒိၣ်ဒိၣ်မုာ်မုာ် ခီဖျိလၢအဘၣ်တၢ်မၤအၢမၤသီအီၤ ဒ်သိးအံၤအဃိန့ၣ်လီၤ. ဘၣ်ဃးဒီးမုၢ်နံၤလၢ အဖိမုၣ်ပာ်တ့ၢ်အီၤအဂ့ၢ်န့ၣ် မံမီၢ်ပျီၢ်သီဝဲဒၣ်အဖၢမုၢ်န့ၣ်လီၤ.
အပူၤကွံာ် နံၣ်လၢအကယၤတဖၣ်အကတီၢ်န့ၣ် ပှၤသးစၢ်ဖိတဂၤ ဘၣ်လဲၤခီဖျိဝဲဒၣ် တၢ်သးဘၣ်ဒိဘၣ်ထံးဒိၣ်ဒိၣ်မုာ်မုာ် (၁ မိၤ ၃၇:၁၂-၂၆) ဒ်သိးအံၤန့ၣ်လီၤ. စီၤယိၤသး အဝဲၢ်တဖၣ် တ့ၢ်လီၤအီၤလၢ တၢ်ပူၤ, ဒီးဆါလီၤကွံာ်အီၤဆူ ပှၤကၤတၢ်ဖိတဖၣ်လၢ အလဲၤဆူ ကီၢ်အဲၤကူပတူးန့ၣ်လီၤ. ဘၣ်ဆၣ် “ယွၤအိၣ်ဒီးစီၤယိၤသး” (၁ မိၤ ၃၉:၂) န့ၣ်လီၤ. လၢတခီထံတခီကီၢ်, ဖဲအိၣ်ဆိးဝဲလၢ အကစၢ်အဟံၣ် (:၇-၁၀), ဒီးဘၣ်အိၣ်ဆိးဝဲလၢ ဃိာ်ပူၤအကတီၢ်, တၢ်လၢအဘၣ် ယွၤအသးန့ၣ် စီၤယိၤသး မၤဝဲဒူဒူန့ၣ်လီၤ. စီၤယိၤသး သ့ၣ်ညါဝဲလၢ ကစၢ်ယွၤ “ပာ်ဖျါ အတၢ်အဲၣ်အတီအလိၤလၢအလိၤ” (:၂၁) န့ၣ်လီၤ. အပူၤကွံာ်န့ၣ် စီၤယိၤသး အသးဘၣ်ဒိဘၣ်ထံးနးနးကျံးကျံးဒၣ်လဲာ်, မ့ၢ်လၢ ကစၢ်ယွၤမၤစၢၤအီၤ (:၂၃) အဃိ, ကယဲၢ်တၢ်လၢ စီၤယိၤသး မၤဝဲခဲလၢာ်န့ၣ် ကဲထီၣ်လိၣ်ထီၣ်ဝဲဒၣ်န့ၣ်လီၤ. အကတၢၢ်န့ၣ်, စီၤပၤဖၤရိၤ ဝံၤ, စီၤယိၤသး ကဲထီၣ် စီၤပၤခံဂၤတဂၤလၢကီၢ်ပူၤ, ဒီးဒုးအိၣ်ထီၣ်အဟံၣ်ဖိဃီဖိဒၣ်ဝဲ (၁ မိၤ ၄၁:၄၁-၅၂) န့ၣ်လီၤ. လၢခံန့ၣ်ဒီး, မၤဘၣ်လိာ်ဖိးမံက့ၤအသးဒီးအဝဲၢ်တဖၣ် (၁ မိၤ ၄၅:၁၂-၁၅) န့ၣ်လီၤ.
ပှၤကညီ ကမၤဘၣ်ဒိဆါပှၤဘၣ်ဆၣ်, ကစၢ်ယွၤန့ၣ် တမၤဘၣ်ဒိဆါပှၤဘၣ်. ယွၤကမၤစၢၤမၤဘျါက့ၤပှၤ ခီဖျိကျိၤကျဲလၢ အတဒ်သိးလိာ်အသးဒီးအတၢ်မၤလၢ စီၤယိၤသးအဂီၢ်ဘၣ်ဆၣ်, အၢၣ်လီၤအီလီၤပှၤ အတၢ်အဲၣ်လၢ အတီအလိၤန့ၣ်လီၤ. လၢပတၢ်နာ်သန့ၤ ကစၢ်ယွၤကမၤဘျါက့ၤ ပသူၣ်ပသးတဖၣ်အပူၤန့ၣ် မ်ပကလူၤပိာ်ထွဲ ကစၢ်ယွၤနဲၣ်ဆှၢပှၤအခံန့ၣ်တက့ၢ်.
