ဖဲမ့ၣ်အူအီၣ်သ့ၣ်ပှၢ်နးနးကျံးကျံးအကတီၢ်, သ့ၣ်ပှၢ်အခိၣ်တဂၤ မၤပူၤဖျဲး တၢ်သူဖိတဒု, ဒီးလဲၤစိာ်ဝဲ တၢ်သူဖိဆူ တၢ်လီၢ်လၢအပူၤဒီးတၢ်ဘၣ်ယိၣ်ဘၣ်ဘီအလီၢ်အကျဲ, ဒီးပာ်လီၤတၢ်သူဖိ ဖဲတၢ်လီၢ်အဘံၣ်အဘၢ လၢအအိၣ်ယံၤဒီးသ့ၣ်ပှၢ်မ့ၣ်အူအီၣ်တၢ်ဒိၣ်ဒိၣ်မုၢ်မုၢ်အလီၢ်န့ၣ်လီၤ. တၢ်သူဖိ ဆၢထၢၣ်ဝဲဒၣ်လၢ အခီၣ်လာ်ဆံးဆံးဖိ, ဒီးဖိးဃာ်ဝဲဒၣ် ပှၤတဂၤအံၤ အခီၣ်ဒုၣ်သၣ်န့ၣ်လီၤ. သ့ၣ်ပှၢ်ခိၣ်တဂၤအံၤ တကၢထီၣ်အီၤ ကဖီလီဖိ, ဒီးပာ်တ့ၢ်အီၤန့ၣ်လီၤ. လၢတၢ်သးလီၤဘှါအပူၤန့ၣ် တၢ်သူဖိအံၤ ကိးပသူထီၣ်ဝဲဒၣ် ဒီးဝာ်ထီၣ်ဝဲ ဒ်သိးကအိၣ်ဘၣ်ဝဲလၢ ပှၤမၤပူၤဖျဲးအီၤတဂၤအတၢ်ဖိးဟုဃာ်အီၤအပူၤန့ၣ်လီၤ. ဖဲတၤသူဆံးဖိ ပှာ်ထီၣ်ဝဲဆူ သ့ၣ်ပှၢ်ခိၣ်လၢ အပှဲၤဒီးတၢ်သး ကညီၤတဂၤ အစုဒုၣ်အလိၤန့ၣ်ဒီး, ဖူးလဲးဖူးသွံဝဲ တၢ်သူဖိအံၤအခိၣ်န့ၣ်လီၤ.

ဒ်တၢ်သူဆံးဖိ လူၤပိာ်ထွဲ ပှၤမၤပူၤဖျဲးအီၤလၢတၢ်သံတဂၤအခံ, ဒီးဟံးဃာ်ဂၢၢ်ကျၢၤဝဲဒၣ်အသိး, တၢ်အိၣ်အသးလၢ အလီၤပျံၤလီၤဘၣ်ယိၣ်အပူၤန့ၣ် ပကအိၣ်ဒီး တၢ်နာ်အဂၢၢ်အကျၢၤ, ဒီးပမ့ၢ်ဂုာ်ကျဲးစၢးလူၤပိာ်ထွဲ ကစၢ်ယ့ၣ်ရှူး- ပတၢ်အုၣ်က့ၤခီၣ်က့ၤကစၢ် အဒိၣ်ကတၢၢ်တဂၤအခံန့ၣ်ဒီး, တၢ်ကမၤအသးဒ်လဲၣ်.

ကယဲၢ်ပှၤလၢယွၤတ့လီၤအီၤတဖၣ်ခဲလၢာ်န့ၣ် လိၣ်ဘၣ် တၢ်အုၣ်က့ၤခီၣ်က့ၤန့ၣ်လီၤ. စီၤဒၤဝံး လၢအကွဲးထါစံးထီၣ်ပတြၢၤတဂၤ တူၢ်လိာ်အၢၣ်လီၤဝဲလၢ အလိၣ်ဘၣ် ပှၤလၢကအုၣ်က့ၤခီၣ်က့ၤအီၤတဂၤ, လၢအမ့ၢ် ကစၢ်ယွၤ, ဒ်သိးကနၢ်ဟူ, ဒီးစံးဆၢအတၢ်ထုကဖၣ် (စံး ၅၅:၁-၂) အဂီၢ်န့ၣ်လီၤ. စီၤဒၤဝံး ဘၣ်ကွၢ်ဆၢၣ်မဲာ် တၢ်ကီတၢ်ခဲ, တၢ်မၤပျံၤမၤဖုး, တၢ်နးတၢ်ဖှီၣ်, ဒီးတၢ်လီၤပျံၤလီၤဖုးတဖၣ် (:၃-၅) န့ၣ် အၢၣ်လီၤဝဲဒၣ်န့ၣ်လီၤ. လၢတၢ်နာ်သန့ၤယွၤနီၢ်နီၢ်အပူၤန့ၣ် စီၤဒၤဝံး လူၤဃုထံၣ် ကစၢ်ယွၤ, ဒီးစံးဝဲဒၣ် “ယဲဒၣ်အံၤ ယကကိးထီၣ်ယွၤလီၤ, ဒီးယွၤကအုၣ်က့ၤခီၣ်က့ၤယၤ” (:၁၆) န့ၣ်လီၤ. “မုၢ်ဟါ, ဒီးမုၢ်ဂီၤ, ဒီးမုၢ်ထူၣ်န့ၣ် ယကဆိကမိၣ်တၢ်, ဒီးဘါထုကဖၣ်တၢ်, ဒီးကနၢ်ဟူယကလုၢ်” (:၁၇) န့ၣ်လီၤ. စီၤဒၤဝံး တဆိကတီၢ် အတၢ်ထုကဖၣ်ဘၣ်. အဝဲနာ်ဝဲဒၣ်လၢ ကစၢ်ယွၤ ဒိကနၣ် အတၢ်ထုကဖၣ်, ဒီးကအုၣ်က့ၤခီၣ်က့ၤအီၤ “လၢတၢ်ဘၣ်ဒိဘၣ်ထံးတအိၣ်ဘၣ်” (:၁၈) အပူၤန့ၣ်လီၤ.

ဖဲပဘၣ်ကွၢ်ဆၢၣ်မဲာ် တၢ်ကီတၢ်ခဲ (မ့) ပဘၣ်နးဘၣ်ဖှီၣ်တမံၤဂ့ၤတမံၤဂ့ၤန့ၣ်, ဒ်စီၤဒၤဝံးအသိး, ပကိးထီၣ် ကစၢ်ယွၤသ့ဝဲဒၣ်န့ၣ်လီၤ. ဖဲပလူၤဃု ကစၢ်ယွၤန့ၣ်ဒီး, ပတၢ်အုၣ်က့ၤခီၣ်က့ၤကစၢ် လၢအလီၤအဲၣ်လီၤကွံတဂၤ, ကလူၤဃုထံၣ်န့ၢ်ပှၤ, ကဒိကနၣ်ပှၤ, ဒီးကအုၣ်က့ၤခီၣ်က့ၤပှၤန့ၣ်လီၤ.