ဘၣ်ဖဲမုၢ်ဃ့ၢ်လီၤတနံၤ, ဖဲခီဖံၣ်ကျးတဖျၢၣ်အပူၤန့ၣ် ယပာ်သူၣ်ပာ်သးဝဲဒၣ် ဖိသၣ်ဆံးလဲၤက့ၤဟးသ့သီသီဖိ, ဒီးအမိၢ်အပၢ်န့ၣ် ဆ့ၣ်နီၤဝဲဒၣ်လၢစီၢ်နီၤခိၣ် လၢအအိၣ်ဘူးဒီး ယစီၢ်နီၤခိၣ်န့ၣ်လီၤ. ဖဲမိၢ်ပၢ်ခံဂၤ ကတိၤတၢ်ဒီးအတံၤသကိးတဖၣ်အကတီၢ်, ထိၣ်ကးက့ၣ်တဘ့ၣ် ဟဲယူၤလီၤ, ဒီးစးထီၣ်ဖျးအီၣ် ကိၣ်အကူာ်အက့တဖၣ်လၢ တၢ်ဒါခိၣ်အလိၤန့ၣ်လီၤ. လၢတၢ်ကမၢကမၣ်အပူၤန့ၣ် ဖိသၣ်ပိာ်မုၣ်ဆံးဖိအံၤ ဒ်သိးကဒိးန့ၢ် ပှၤသးပှၢ်တဖၣ် အတၢ်ပာ်သူၣ်ပာ်သးအဂီၢ်, မၤသီၣ်မၤသဲထီၣ် အကလုၢ်ဖိလၢတၢ်သးခုန့ၣ်လီၤ. ဘၣ်ဆၣ်, တၢ်လၢဖိသၣ်ဆံးဖိ ထံၣ်ဝဲန့ၣ် ပှၤသးပှၢ်တဖၣ် တထံၣ်ဝဲဒၣ်ဘၣ်. အဝဲသ့ၣ်ကွၢ်ဝဲဒၣ်ဖိသၣ်ပိာ်မုၣ်ဆံးဖိ, ဒီးနံၤကမှံဝဲ, ဒီးကတိၤသကိးက့ၤတၢ်န့ၣ်လီၤ.
ဘၣ်တဘျီန့ၣ် ကစၢ်ယ့ၣ်ရှူး ဆှၢလီၤဝဲဒၣ် အပျဲၢ်အဘီၣ်တဖၣ် ဒ်သိးကစံၣ်တဲၤတဲလီၤတၢ်အဂီၢ်, ဒီးတၢ်မၤန့ၣ်ကဲထီၣ်လိၣ်ထီၣ်ဝဲဒၣ် ဒိၣ်ဒိၣ်ကလဲာ် (လူၤ ၁၀:၁၇) န့ၣ်လီၤ. လၢတၢ်စံးဆၢမၤဆၢက့ၤတၢ်အဂီၢ်, ကစၢ်ယ့ၣ်ရှူးထုကဖၣ်ဝဲလၢ, “ပၢ်ဧၢ, ယစံးထီၣ်ပတြၢၤနၤလီၤ. အဂ့ၢ်ဒ်အံၤ, တၢ်တဖၣ်အံၤ, နပာ်ခူသူၣ်လၢ ပှၤကူၣ်တၢ်သ့, ဒီးပှၤအသူၣ်ဆးအသးဆးတဖၣ်အမဲာ်ညါ, ဒီးနမၤဖျါထီၣ်အီၤလၢ ဖိသၣ်အမဲာ်ညါ” (:၂၁) န့ၣ်လီၤ. ဘၣ်ဃးဒီးတၢ်ဂ့ၢ်အံၤန့ၣ်, တၢ်ပာ်ဖျါ “ဖိသၣ်” စံးတၢ်န့ၣ် တမ့ၢ်သးအနံၣ်အလါဘၣ်. မ့မ့ၢ်တၢ်ပာ်ဖျါတၢ်အတီၤအပတီၢ်န့ၣ်လီၤ. မ့ၢ်ဝဲ တၢ်ဆီၣ်လီၤသးန့ၣ်လီၤ. ဖဲ “ပှၤကူၣ်တၢ်သ့ဒီးပှၤအသူၣ်ဆးအသးဆးတဖၣ်” လၢအမ့ၢ် တၢ်ဘူၣ်တၢ်ဘါခိၣ်နၢ်တဖၣ် တကနၣ်ဃုာ်ဝဲဒၣ် တၢ်သးခုကစီၣ်ဘၣ်ဆၣ်, မ့မ့ၢ် “ပှၤတၢ်ဒဲးဘးဖိတဖၣ်” တူၢ်လိၣ်ဝဲဒၣ် တၢ်သးခုကစီၣ် ကိးမုၢ်နံၤဒဲး (လူၤ ၇:၂၉-၃၄) န့ၣ်လီၤ. ကစၢ်ယွၤ ကလီၣ်ဖျါထီၣ်အသးဆူ မတၤတဂၤလဲၣ်န့ၣ်, အကစၢ်ဒၣ်ဝဲန့ၣ် ကဆၢတဲာ်ဝဲဘၣ်ဆၣ်, ပှၤလၢအသံကွၢ် မူခိၣ်ဘီမုၢ်အဂ့ၢ်တဖၣ်အဂီၢ်, ကစၢ်ယ့ၣ်ရှူး ဒုးနဲၣ်ပာ်ဖျါအါထီၣ် မူခိၣ်ဘီမုၢ်အဂ့ၢ် (မး၁၃:၃၆) ထီဘိန့ၣ်လီၤ. မ့ၢ်လၢတၢ်ဘူၣ်တၢ်ဘါခိၣ်နၢ်တဖၣ် တအဲၣ်ဒိးသ့ၣ်ညါဝဲအဃိ, ကစၢ်ယ့ၣ်ရှူး မ့ၢ်မတၤတဂၤလဲၣ်န့ၣ် အဝဲသ့ၣ်တထံၣ်ဝဲဒၣ်ဘၣ်န့ၣ်လီၤ.
ဖိသၣ်ပိာ်မုၣ်ဆံးဖိ လၢခီဖံၣ်ကျးဖိအပူၤန့ၣ် ထံၣ်ဝဲဒၣ် တၢ်လီၤလး, တၢ်လၢအမိၢ်အပၢ်တဖၣ် တထံၣ်ဘၣ်ဝဲန့ၣ်လီၤ. တၢ်လၢကစၢ်ယွၤ အဲၣ်ဒိးဒုးနဲၣ်ပာ်ဖျါထီၣ်အသး အဂ့ၢ်န့ၣ် ဒ်သိးဒီးပသုတလဲၤကပာ်ကွံာ်အီၤအဂီၢ်, မ်ပကပူၤဖျဲးဒီးဟီၣ်ခိၣ်အတၢ်သီၣ်တၢ်သဲတဖၣ်, (မ့) ဒ်သိးပကဃုသ့ၣ်ညါနၢ်ပၢၢ်အါထီၣ်တၢ်အဂီၢ်, မ့ၢ်လၢပတအိၣ်ဒီး တၢ်ဆီၣ်လီၤသးအဃိ, မ်ပသုတလဲၤကမၣ်ကျဲတဂ့ၤအဂီၢ်န့ၣ်လီၤ.
