ပှၤစဲၣ်နီၤတဖၣ်အါမးလၢ အဘၣ်ဃးဒီးတၢ်စံၣ်စိၤတဲစိၤအဂ့ၢ်န့ၣ် နာ်ဝဲဒၣ်လၢ,ပှၤအမဲရကၤဖိတၢ်ဒုးသုးအကဘီ အပှၤစံးဆၢကွဲးဆၢ ကွဲၤလ့လိၤ အတၢ်ကစီၣ်တဖၣ်, ဒီးကဘီအဂၤတဖၣ်လၢ အဲးတလဲတ့း ပီၣ်လဲၣ်မိၢ်ပှၢ်အပူၤတဖၣ်န့ၣ် နၢ်ဟူဝဲဒၣ် တၢ်ရၤလီၤ တၢ်သးဝံၣ်, ဒီးတၢ်ကတိၤလီၤတၢ် ခီဖျိလၢကွဲၤလ့လိၤအဆိကတၢၢ်တဖၣ်, ဖဲ ၁၉၀၆ နံၣ်, ခရံာ်အိၣ်ဖျဲၣ်အနၤန့ၣ်လီၤ. အဝဲသ့ၣ်ညီနုၢ် နၢ်ဟူဝဲတၢ်ကလုၢ်အသီၣ်ပံပံ, ဒီးတၢ်စိာ်ဆှၢခီ လီမ့ၣ်အတၢ်ပနီၣ်ခူသူၣ်အလီၢ်န့ၣ် အဝဲသ့ၣ်ဒိကနၣ်ဘၣ်ဝဲ ရဲကၠံၣ်နံၣ် ဖဲးစံၣ်ဒၣ် (Reginald Fessenden) တၢ်ဒ့ဖှူး တၢ်သးဝံၣ် “အိ, နၤစီဆှံ” လၢသီတူၢ်တကလုာ်ဧိၤန့ၣ်လီၤ. ဖဲးစံၣ်ဒၣ် မၤကတၢၢ် အတၢ်ရၤလီၤ တၢ်သးဝံၣ်လၢ အသီၣ်ထွဲကဒါက့ၤ မူခိၣ်ကလူးတဖၣ် သးဝံၣ်စံးထီၣ်ပတြၢၤယွၤ, “မ်တၢ်အမုာ်အိၣ်ထီၣ်လၢဟီၣ်ခိၣ်ချၢတက့ၢ်” (လူၤ ၂:၁၄) န့ၣ်လီၤ. တၢ်ဒ့သံကျံ, ဒီးတၢ်စံးထီၣ်ပတြၢၤယွၤ သီၣ်ထီၣ်ဝဲလၢ ခရံာ်အိၣ်ဖျဲၣ်တဘျီအံၤအဃိ, ပှၤဒိကနၣ်တၢ်ဖိတဖၣ် ကဖုးသံပျီၢ်သံဘၣ်အသးန့ၣ်လီၤ.

ကစၢ်ယ့ၣ်ရှူး အိၣ်ဖျဲၣ်ထီၣ်အဃိ, ပှၤကမၢကမၣ်တၢ်အဆိကတၢၢ်တဖုန့ၣ် မ့ၢ်ဝဲဒၣ် ပှၤကွၢ်သိတဖၣ်လၢ ကွၢ်ဝဲဒၣ်အသိလၢမုၢ်နၤ, ဒ်အညီနုၢ်အမၤဝဲအသိးန့ၣ်လီၤ. ဝံၤန့ၣ်ဒီး, မူခိၣ်ကလူး လၢအအိၣ်ပှဲၤဒီးယွၤအလၤကပီၤတဂၤ ဟဲဖျါထီၣ်ကပြုၢ်ကပြီၤ, ဒီးဒုးကဲထီၣ်တၢ်ပျံၤတၢ်ဖုးလၢ ပှၤကွၢ်သိတဖၣ်အဂီၢ်န့ၣ်လီၤ. မူခိၣ်ကလူး စံးဘၣ်တဲဘၣ် အဝဲသ့ၣ်လၢ အသုတပျံၤတၢ်တဂ့ၤ, ဒီးဘိးဘၣ်သ့ၣ်ညါဝဲဒၣ်, “ယစံးဘၣ်သုလၢ တၢ်သးခုဖးဒိၣ်အကစီၣ်, လၢအကကဲထီၣ်လၢ ပှၤဂီၢ်မုၢ်ခဲလၢာ်အဂီၢ်လီၤ. အဂ့ၢ်ဒ်အံၤ, အအံၤတနံၤအံၤ, ပှၤလၢအအုၣ်က့ၤခီၣ်က့ၤတၢ်တဂၤန့ၣ်, အိၣ်ဖျဲၣ်ဝဲလၢသုဂီၢ် လၢစီၤဒၤဝံးအဝ့ၢ်ပူၤလံ, အဝဲဒၣ် မ့ၢ်ခရံာ်ကစၢ်” (:၁၀-၁၁) န့ၣ်လီၤ. ပှၤကွၢ်သိတဖၣ် ပာ်တ့ၢ်ကွံာ်အသိတဖၣ်, ဒီးဃုသ့ၣ်ညါ မူခိၣ်ကလူး အတၢ်ကတိၤတဖၣ်, ဒီးထံၣ်ဝဲဒၣ် ဖိသၣ်လၢ ကျီၣ်အီၣ်ဆၣ်အလီၢ်ပူၤ, ဒ်တၢ်စံးဘၣ်တဲဘၣ်အဝဲသ့ၣ် (:၁၆,၂၀) အသိးန့ၣ်လီၤ.

ပှၤကွၢ်သိတဖၣ် တူၢ်လိၣ်ဝဲဒၣ် တၢ်သးခုအကစီၣ်ဖးဒိၣ်တမံၤအံၤန့ၣ်လီၤ. မ်ပကသူၣ်ခုသးခုလိာ်သကိး, ဒီးဟ့ၣ်ခီနီၤလီၤ ကစၢ်ယ့ၣ်ရှူး အတၢ်အိၣ်ဖျဲၣ်, ဒီးအသးသမူ အတၢ်လီၤလိၢ်လီၤလးအဂ့ၢ်န့ၣ်တက့ၢ်.