ဖဲ ၁၈၃၂ နံၣ်န့ၣ်, မ့ၢ်လၢ ကီၢ်ခိၣ် ယူလ့ၣ်စံၤ အဲး(စ). ကရဲး(ထ) (Ulysses S. Grant) တဂၤ, နီၣ်ဝဲဒၣ် အကသ့ၣ်လ့ၣ်ကဟၣ် ဖဲ ဝၣ်ရှၢၣ်တၣ် ဒံၣ်စ့ၣ် (Washington DC) အဝ့ၢ်ပူၤ, လၢတၢ်တပလီၢ်သူၣ်ပလီၢ်သး, ဒီးတၢ်တပာ်ကဲတၢ်အပူၤအဃိ, ဘၣ်တၢ်အိၣ် ပတုာ်အီၤန့ၣ်လီၤ. လံာ်ပရၢပစၢၢ်လၢ အဘၣ်တၢ်ထုးထီၣ်ရၤလီၤအီၤတဘ့ၣ် ပာ်ဖျါဝဲလၢ ပှၤဘၣ်မူဘၣ်ဒါတဂၤ, ပှၤအၤဖြံကၤ-အမဲရကၤဖိ, ဝ့လယၢၣ် ဝဲး(စ) (William West) ဟ့ၣ်ပလီၢ် ကီၢ်ခိၣ် ကရဲး(ထ) လၢ, “ကီၢ်ခိၣ်ဧၢ, နနီၣ်တၢ်အချ့န့ၣ်, တၢ်ဘၣ်ယိာ်အလီၢ်အိၣ်ဝဲဒၣ်လၢ ပှၤခီဂာ်ကျဲတဘိအံၤ အသးသမူအဂီၢ်” န့ၣ်လီၤ. ကရဲး(ထ) မၤကမၣ်တၢ်န့ၣ် အၢၣ်လီၤဝဲဒၣ်ဘၣ်ဆၣ်, လၢခံတနၤစ့ၢ်ကီး, ကရဲး(ထ) နီၣ်သဖှိကဒီးဝဲ အလ့ၣ်ကဟၣ်န့ၣ်လီၤ. ဝဲး(စ) (West) ဒုးအိၣ်ပတုာ် ကရဲး(ထ) အကသ့ၣ်, ဒီးစံးဝဲဒၣ်လၢ, “ကီၢ်ခိၣ်ဧၢ, မ့ၢ်လၢပကဘၣ်ဖီၣ်နၤအဃိ, ဝံသးစူၤဘၣ်ယၤတက့ၢ်. နမ့ၢ်နဲ ထံကီၢ်တဘ့ၣ်အံၤအခိၣ်, ဒီးယမ့ၢ်ဒၣ် ပၢၤကီၢ်ဖိတဂၤ, လၢအတမ့ၢ်တၢ်နီတမံၤဘၣ်ဆၣ်, မူဒါန့ၣ် မ့ၢ်ဒၣ်မူဒါန့ၣ်လီၤ.” ဒီးဝဲး(စ) ဖီၣ်ဝဲဒၣ် ကီၢ်ခိၣ်န့ၣ်လီၤ.”
မ့ၢ်လၢပှၤဒူပှၤဃိၤတဂၤအံၤ မၤလၢပှဲၤဝဲဒၣ် မူဒါလၢအကဘၣ်မၤဝဲအဃိ, ယယူးယီၣ်ပးကဲအီၤန့ၣ်လီၤ. ကရဲး(ထ) စ့ၢ်ကီး, ကဘၣ်သူၣ်ဘၣ်သးအီၤန့ၣ်လီၤ. ကရဲး(ထ) စံးပတြၢၤ ဝဲဒၣ် ဝဲး(စ), ဒီးမၤလီၤတံၢ်ဝဲဒၣ် ဒ်သိးပှၤတဒုးဟးထီၣ်အီၤအတၢ်မၤအဂီၢ်န့ၣ်လီၤ. မ့ၢ်လၢ ကစၢ်ယွၤ သးဟ့ဝဲဒၣ် တၢ်တတီၤတလိၤ, ဒီးတၢ်ကွၢ်မဲာ်အဃိ, ကစၢ်ယွၤ ကသူၣ်မံၤသးမံၤဝဲစ့ၢ်ကီးန့ၣ်လီၤ. (ယၤ ၂:၁) ပာ်ဖျါဝဲလၢ, “ယဒီပုၢ်ဝဲၢ်သ့ၣ်ဧၢ, တၢ်လၤကပီၤအကစၢ်, ပကစၢ်ယ့ၣ်ရှူးခရံာ်, အတၢ်နာ်န့ၣ်, သုတအိၣ်ဒီးတၢ်ကွၢ်မဲာ်တဂ့ၤ” န့ၣ်လီၤ. တၢ်ပာ်ဖျါအံၤ ပာ်ဃုာ်ဒီး ပှၤသုအတဟ့ၣ်ခွဲးယာ်လီၤဆီဆူ ပှၤကဲဒိၣ်, ဒီးပှၤဒိၣ်စိဒိၣ်ကမီၤတဖၣ်, ဒီးလၢပှၤဖီၣ်ဖီယာ်ဖိတဖၣ်အဂီၢ် ပာ်လီၤတဲာ်တ့ၢ်ဝဲဒၣ် ထဲတၢ်အဘျဲၣ်အစဲၢ်တဖၣ် (:၂-၄) န့ၣ်လီၤ. လၢတၢ်ကွၢ်မဲာ်အလီၢ်န့ၣ် ကစၢ်ယွၤ မၢပကအဲၣ်ပှၤလၢပခိၣ်ပဃၢၤ ဒ်ပအဲၣ်လီၤပသးဒၣ်ဝဲအသိး (:၈) န့ၣ်လီၤ. လၢတၢ်ကွၢ်မဲာ်အပူၤ, ပကဘၣ်မၤတၢ်လၢ ပှၤဖီၣ်ဖိယာ်ဖိ လၢပခိၣ်ပဃၢၤတဖၣ်အဂီၢ်အလီၢ်န့ၣ် ပမ့ၢ်မၤဒၣ်ထဲလၢ ပှၤကဲဒိၣ်သ့ၣ်တဖၣ်အဂီၢ်န့ၣ်ဒီး, ကမ့ၢ်ဒၣ် “ပမၤတၢ်ဒဲးဘး, ဒီးဘၣ်တၢ်သိၣ်ဃီၣ်လၢ တၢ်သိၣ်တၢ်သီ, ဒ်ပှၤမၤကမၣ်ဖိအသိး” (:၉) န့ၣ်လီၤ.
ကစၢ်ယွၤန့ၣ် တကွၢ်မဲာ်ပှၤကညီဘၣ်. ပကဟ့ၣ်ယွၤအဂီၢ်, တၢ်တအိၣ်ဒီးပှၤနီတမံၤအကတီၢ်, ဖဲပမ့ၢ်ပှၤလၢ “တအိၣ်ဘၣ်ဒီးတၢ်မုၢ်လၢ်ဒီး တအိၣ်ဘၣ်ဒီးယွၤလၢဟီၣ်ခိၣ်ချၢ” (အ့ဖ့း ၂:၁၂) အကတီၢ်ဒၣ်လဲာ်, ကစၢ်ယွၤအဲၣ်ပှၤန့ၣ်လီၤ. လၢကစၢ်ယွၤ အတၢ်မၤစၢၤအပူၤ, ကယဲၢ်ပှၤကိးဂၤဒဲးန့ၣ် ပအဲၣ်အဝဲသ့ၣ်ဒ်သိးသိးသ့ဝဲဒၣ်န့ၣ်လီၤ.
