ယတံၤသကိး မၤရံထၣ် (Marita) အတၢ်ဖံးတၢ်မၤန့ၣ် ဘၣ်လဲၤက့ၤဝဲဒၣ် ဝ့ၢ်တဖၣ်ထဲတဂၤဧိၤအဃိ, အသးကလၢၢ်ဘၣ်တၢ်အိၣ်သယုၢ်သညိတလီၢ်လီၢ်န့ၣ်လီၤ. ဘၣ်ဆၣ်, မုၢ်တနၢလၢ ဟါတၢ်အီၣ်အကတီၢ်, အဝဲသန့ၤလီၤအသးလၢယလိၤ, ဒီးစံးဝဲဒၣ်, “ဂျဲ(န) (Jen) ဧၢ, ယထုကဖၣ်, ဒီးဃ့ကစၢ်ယွၤ ဒ်သိးကဆှၢန့ၢ်ယၤ အပှၤဂီၢ်မုၢ်ဆူ ယအိၣ်” န့ၣ်လီၤ. ဂျဲ(န) စံးကဒီးဝဲဒၣ် “တယံာ်ဘၣ်န့ၣ်, အဝဲထံၣ်လိာ်အသးဒီး ပှၤစူၢ်က့ၤနာ်က့ၤ ကစၢ်ယ့ၣ်ရှူးတဖၣ် ဒ်ညီနုာ်တၢ်မၤအသးတမံၤအသိးန့ၣ်လီၤ. ဘၣ်တဘျီန့ၣ်, အဝဲထံၣ်လိာ်အသးဒီးပှၤသၢဂၤ, ဖဲမုၢ်တနံၤဧိၤအတီၢ်ပူၤ” အဂ့ၢ်န့ၣ်လီၤ.
ပဝဲပှၤလၢအစူၢ်က့ၤနာ်က့ၤ ကစၢ်ယ့ၣ်ရှူးတဖၣ်, ဖဲပထံၣ်လိာ်သးအကတီၢ်, ပအိၣ်ဒီးနီၢ်သးအတၢ်ဘၣ်ထွဲလိာ်အသးတဖၣ်န့ၣ်လီၤ. ပကဒုးနၢ်ပၢၢ်လိာ်သးအဂီၢ်, ကီခဲဝဲဘၣ်ဆၣ်, တၢ်ဘၣ်ထွဲလိာ်သးတမံၤအံၤ ဒုးကဲၤကပီၤထီၣ် မ့ၣ်အူအဖီဖိလၢပသးကံၢ်ပူၤန့ၣ်လီၤ. ပဝဲကိးဂၤဒဲးအဂီၢ်, တၢ်လၢအဒ်သိးလိာ်အသး,ဒီးအကါဒိၣ်ကတၢၢ်န့ၣ် မ့ၢ်လၢပစူၢ်နာ် လံာ်စီဆှံ အတၢ်စံးဘၣ်တဲဘၣ်ပှၤ ကစၢ်ခရံာ်အဂ့ၢ်, ဒီးခီဖျိလၢကစၢ်ခရံာ်အဃိ, ပရ့လိာ်သးဒီးကစၢ်ယွၤ သ့ဝဲဒၣ်ဒ်လဲၣ်(ရိမ့ၤ ၁၀:၉) အဂ့ၢ်န့ၣ်လီၤ.
တၢ်အကါဒိၣ်ကတၢၢ်န့ၣ် ယွၤအသးစီဆှံ အိၣ်ဆိးလၢ ပှၤစူၢ်က့ၤနာ်က့ၤတဂၤလၢ်လၢ်အပူၤ, ဒီးလၢတၢ်ဂံၢ်ဆူၣ်ဘါဆူၣ်အပူၤန့ၣ် စၢဃာ်ဒုးဘၣ်ထွဲလိာ်သကိးပှၤအဃိ, လံာ်စီဆှံ ထိၣ်သတြီၤပာ်ဖျါပှၤ ဒ်ပှၤကညီအက့ၢ်အဂီၤလၢ အဘၣ်ထွဲလိာ်အသးတဖၣ်န့ၣ်လီၤ. ၁ ကရံၣ် ၁၂:၁၃ စံးဘၣ်ပှၤလၢ, “ပဒိးဘျၢပသးခဲလၢာ်ဆူ နီၢ်တဂၤဃီအပူၤ,” လၢအမ့ၢ်, ကစၢ်ခရံာ် အနီၢ်ခိနီၢ်ကစၢ်န့ၣ်လီၤ.
လၢပတၢ်အိၣ်မူအပူၤ, ကစၢ်ယွၤ မၤတ့ၢ်ဝဲတၢ် ခီဖျိပှၤလၢအအဲၣ်အီၤတဖၣ်, ဘူးမ့ၢ်ဂ့ၤယံၤမ့ၢ်ဂ့ၤ, ပှၤလၢပသ့ၣ်ညါ (မ့) ပှၤလၢပထံၣ်လိာ်သးအသီတဖၣ်မ့ၢ်ဂ့ၤန့ၣ်လီၤ. ဒ်သိးကစၢ်ယွၤ ကစူးကါပှၤလၢ ပကဟ့ၣ်ဂံၢ်ဟ့ၣ်ဘါ ပှၤစူၢ်က့ၤနာ်က့ၤတၢ်အဂုၤအဂၤတဖၣ်အဂီၢ်, ပဟ့ၣ်လီၤအးလီၤပသး, ဒီးလၢပတၢ်အိၣ်သယုၢ်သညိနးနးကျံးကျံး အကတီၢ်တဖၣ်အပူၤဒၣ်လဲာ်, ဒ်သိးကဆှၢန့ၢ်ပှၤလၢ အပှၤဂီၢ်မုၢ်အဂီၢ်, ပဃ့ကစၢ်ယွၤသ့ဝဲဒၣ်န့ၣ်လီၤ.
