စဲ(မ) (Sam), န့ၣ် အိၣ်ဆိးလၢယဟံၣ်အဃၢၤ, ဒီးဘၣ်ဖဲမုၢ်တနၤန့ၣ် ဟဲက့ၤဆူအဟံၣ်အကတီၢ်, တဟဲက့ၤဒိးဝဲဒၣ် အသိလ့ၣ်ဘၣ်. စဲ(မ) တဲဝဲဒၣ်အမါ “ပှၤဃုာ်ယသိလ့ၣ်လံ,” ဒီးတဲကဒီးဝဲလၢ, “ယကမံလီၤ. ယကကွၢ်ကျဲၤယဲလၢခဲဂီၤန့ၣ်လီၤ. အမါကမၢကမၣ်ဘၣ်အီၤဒိၣ်မးန့ၣ်လီၤ. ဘၣ်မနုၤအဃိ စဲ(မ) တဂၤ ပာ်အသးမုာ်မုာ်သ့ဝဲလဲၣ်န့ၣ် အမါတဂၤ တနၢ်ပၢၢ်ဝဲဒၣ်ဘၣ်န့ၣ်လီၤ. ဘၣ်ဆၣ်, စဲ(မ) တဲနၢ်ပၢၢ်အမါလၢ, “ယကမၤတၢ်အဂၤမနုၤမးတသ့ဘၣ်. တၢ်ဘၣ်ကိၢ်ဘၣ်ဂီၤန့ၣ် တဒုးအိၣ်ထီၣ် တၢ်လီၤဆီနီတမံၤဘၣ်” န့ၣ်လီၤ.
မ့ၢ်လၢပှၤအိၣ်ဆိးလၢယဟံၣ်အဃၢၤတဂၤ မ့ၢ်ပှၤလၢအသ့ဆိကမိၣ်ထံတၢ်ထီဘိအဃိ, တၢ်ဘၣ်ကိၢ်ဘၣ်ဂီၤအလီၢ်တအိၣ်ဘၣ်နီတမံၤန့ၣ် သ့ၣ်ညါနၢ်ပၢၢ်ဝဲဒၣ်န့ၣ်လီၤ. စဲ(မ) နာ်ဝဲဒၣ်လၢ တယံာ်ဘၣ်န့ၣ် ပှၤဘၣ်မူဘၣ်ဒါတဖၣ် ကဃုထံၣ်န့ၢ်က့ၤအသိလ့ၣ်လၢအလီၤမၢ်တခိၣ်အံၤ, ဒီးပှၤဃုထံၣ်န့ၢ်က့ၤဝဲဒၣ်န့ၣ်လီၤ.
ဖဲပှၤတၢ်မၢဖိ စီၤပ့းတရူး ဘၣ်အိၣ်ဝဲလၢဃိၢ်ပူၤအကတီၢ် (မၤတၢ် ၁၂:၄) န့ၣ် မ့ၢ်အသးတူၢ်ဘၣ်ခီၣ်ဘၣ်ဝဲဒ်သိးအံၤစ့ၢ်ကီးဧါ. စီၤပ့းတရူး ကဘၣ်ကွၢ်ဆၢၣ်မဲာ်ဒီး တၢ်မၤအၢမၤနးအီၤသ့ၣ်သ့ၣ်ဘၣ်ဆၣ်, တၢ်မၢဖိတဂၤလၢအညီနုာ်မၤဒ်တၢ်ထိၣ်ဟူးထိၣ်ဂဲၤအသးတဂၤအံၤ, “မံသပ့ၤဝဲလၢ ပှၤသုးဖိခံဂၤအဘၢၣ်စၢၤ” (:၆) န့ၣ်လီၤ. ယွၤအကလုးတဂၤတီၢ် စီၤပ့းတရူးအကပၤ, ဒီးဒုးဂဲၤဆၢထၢၣ်အီၤ (:၇) န့ၣ်လီၤ. တၢ်မၤအသးအံၤ, ပာ်ဖျါဝဲလၢ စီၤပ့းတရူး ပာ်အသးမုာ်မုာ်, ဒီးအိၣ်မုၢ်အိၣ်ခုၣ်အလၢအပှဲၤန့ၣ်လီၤ. အသးသမူ အိၣ်ဝဲလၢယွၤအစုပူၤန့ၣ် စီၤပ့းတရူး သ့ၣ်ညါဝဲအဃိဧါ. အဆၢဖိ ၉ ဒီး ၁၁ ပာ်ဖျါဝဲလၢ တၢ်ကမၤပူၤဖျဲးအီၤမ့ၢ်ဂ့ၤ, တမၤပူၤဖျဲးအီၤမ့ၢ်ဂ့ၤ, တၢ်ဂ့ၢ်ကီတအိၣ်နီတမံၤဘၣ်. ဘၣ်သ့ၣ်သ့ၣ်, စီၤပ့းတရူး ကသ့ၣ်နီၣ်ထီၣ်က့ၤ ကစၢ်ယ့ၣ်ရှူး အတၢ်ဟ့ၣ်လၢအမ့ၢ် တၢ်အုၣ်က့ၤခီၣ်က့ၤ, ဒီးတၢ်လၤကပီၤအတၢ်အုၣ်ကီၤ (မး ၁၉:၂၈),ဃုာ်ဒီး ကစၢ်ခရံာ် အတၢ်ကိးကဆှီဒီဖိလၢ “ပိာ်ယခံတက့ၢ်,” ဒီးအသုတသူၣ်ကိၢ်သးဂီၤဝဲလၢ တၢ်ကမၤအသးဒီးအီၤတမံၤလၢ်လၢ်အဂ့ၢ် (ယိၤ ၂၁:၂၂) န့ၣ်လီၤ.
မုၢ်မဆါတနံၤအံၤ, ပဘၣ်ကွၢ်ဆၢၣ်မဲာ်တမံၤလၢ်လၢ်အပူၤန့ၣ်, ကစၢ်ယွၤ ဟံးဃာ်ဂၢၢ်ကျၢၤ ပတၢ်အိၣ်မူခါဆူညါ- လၢဟီၣ်ခိၣ်ချၢဃုာ်ဒီးလၢမူခိၣ်- လၢအစုဆူၣ်အပူၤန့ၣ်ပနာ်သန့ၤသ့ဝဲဒၣ်န့ၣ်လီၤ. လၢတၢ်န့ၣ်အဃိ, ပကမံဘၣ်မုာ်မုာ်ခုၣ်ခုၣ်ညီကဒၣ်ဖိန့ၣ်လီၤ.
