ပှၤတ့ခဲၣ်တၢ်ဂီၤတဘ့ၣ်န့ၣ် ဘၣ်တၢ်ဘျးလီၤအီၤလၢ ဟံၣ်တဖျၢၣ်အဂီၤပၤအလိၤ အါနံၣ်အါလါ, ဒီးပှၤတပာ်သူၣ်ပာ်သးအီၤ, ဒီးဘၣ်တၢ်သးပ့ၤနီၣ်အီၤ တုၤမုၢ်တနံၤ လၢအလီၤတဲာ်ဝဲဒၣ်န့ၣ်လီၤ. ဒ်သိးတၢ်ကမၤဂ့ၤထီၣ်က့ၤအီၤအဂီၢ်, ပှၤလဲၤစိာ်တၢ်ဂီၤတဘ့ၣ်အံၤဆူ ပှၤဘှီဂ့ၤမၤဂ့ၤက့ၤ တၢ်တ့ခဲၣ်တၢ်ဂီၤတဂၤအအိၣ်န့ၣ်ဒီး, တၢ်ထံၣ်န့ၢ်ဝဲဒၣ်လၢ တၢ်ဂီၤအံၤမ့ၢ် ပှၤတ့ခဲၣ်တၢ်ဂီၤ ရဲ(မ)ဘရဲး(ထ) (Rembrandt) အစုလီၢ် အဂ့ၤကတၢၢ်လၢ အဟါမၢ်ယံာ်တ့ၢ်ဝဲတခါ, ဒီးအမံၤန့ၣ် မ့ၢ်ဝဲ, “ပှၤမဲကံၢ်ဖိ အတၢ်ယူးယီၣ်ပာ်ကဲ” န့ၣ်လီၤ. တၢ်ဆိကမိၣ်တ့ၢ်လၢ တၢ်တ့ဒိးဒိက့ၤ တၢ်ဂီၤအိၣ်လီၤတဲာ်တ့ၢ်တဖၣ်အကျါတဘ့ၣ်ဘၣ်ဆၣ်, တၢ်ဂီၤတဘ့ၣ်အံၤမ့ၢ်ဝဲ တၢ်တ့ခဲၣ်တၢ်ဂီၤအခီၣ်ထံးတဘ့ၣ်န့ၣ်လီၤ. တကီၢ်ခါန့ၣ်, တၢ်ဂီၤတဘ့ၣ်အံၤ အလုၢ်အပှ့ၤန့ၣ် ဃ့ၢ်ထီၣ်ဝဲတုၤဆူ ဒီလၣ်အကကွဲၢ် လၢအကယၤတဖၣ်န့ၣ်လီၤ.

လံာ်စီဆှံ တ့ခဲၣ်ပာ်ဖျါဝဲ တၢ်ဂီၤအဂၤတဘ့ၣ်လၢ တၢ်တယာ်ဒွး မၤဆံးမၤစှၤလီၤအပှ့ၤကလံၤ, ဒီးဘၣ်တၢ်သးပ့ၤနီၣ် အလုၢ်အပှ့ၤတဘ့ၣ်န့ၣ်လီၤ. ယွၤအပှၤဂီၢ်မုၢ်တဖၣ် ကဘၣ်တၢ်စိာ်ကွံာ်အီၤဆူ ထံဂုၤကီၢ်ဂၤ, ဒီးကတူၢ်ဘၣ်တၢ်နးတၢ်ဖှီၣ်, ဒီးအလုၢ်အပှ့ၤ ကဆံးလီၤစှၤလီၤဝဲအကတီၢ်ဒၣ်လဲာ်, ကစၢ်ယွၤ ကအိၣ်ဒီးအပှၤဂီၢ်မုၢ်အဂ့ၢ်န့ၣ် ခီဖျိလၢသးစီဆှံ အတၢ်ထိၣ်ဂဲၤအပူၤ, ဝံယရှါယၤ ဒုးသ့ၣ်ညါ ယွၤအပှၤဂီၢ်မုၢ်, ဒီးမၤလီၤတံၢ်ဝဲဒၣ်လၢ “ပျံၤတၢ်တဂ့ၤ, အဂ့ၢ်ဒ်အံၤ, ယပှ့ၤက့ၤလံနၤလီၤ. ယကိးလံနၤလၢနမံၤလီၤ. နမ့ၢ် ယတၢ်” (ယရှါ ၄၃:၁) န့ၣ်လီၤ. တုၤပှၤဂီၢ်မုၢ် “ကခီဂာ်ထံ, ဒီးကခီတူာ်မ့ၣ်အူ” (:၂) ဘၣ်ဆၣ်, ကစၢ်ယွၤ အတၢ်တီတၢ်လိၤလၢအပှၤဂီၢ်မုၢ်အလိၤန့ၣ် တဆီတလဲဝဲဒၣ်ဘၣ်. ဒ်တၢ်ကတိၤတဖၣ် နဲၣ်လိၤဝဲဆူ ယွၤအဘီအမုၢ်, ကအိၣ်ဟဲခီဖျိ ကစၢ်ခရံာ်အပူၤအသိး, ကစၢ်ယွၤ အၢၣ်လီၤဝဲဒၣ်လၢမုၢ်တနံၤန့ၣ် ကပာ်က့ၤ “ကယဲၢ်ပှၤလၢတၢ်ကိးယမံၤလၢအလိၤ” (:၇) တဖၣ်ဆူ အလီၢ်ဘၣ်အကျဲဘၣ်, ဒီးကက့ၤစိာ်အပှၤဂီၢ်မုၢ်တဖၣ်ဆူဟံၣ်, ဆူအအိၣ်န့ၣ်လီၤ.

မ့ၢ်လၢအပှၤဂီၢ်မုၢ်တဖၣ် “မ့ၢ်တၢ်လုၢ်ဒိၣ်ပှ့ၤဒိၣ် ဒီးဘၣ်တၢ်လၤကပီၤလၢအမဲာ်ညါ” (:၄) အဃိ, မုၢ်တနံၤန့ၣ် ကစၢ်ယွၤ ကထၢဖှိၣ်က့ၤ ပှၤကိးဂၤဒဲးလၢအမ့ၢ်ဝဲအတၢ်တဖၣ်န့ၣ်လီၤ. ပှၤကညီတဂၤစုာ်စုာ်န့ၣ် မ့ၢ်ယွၤအတၢ်ဘၣ်တ့ အခီၣ်ထံးတဖၣ်န့ၣ်လီၤ. မ့ၢ်လၢအတၢ်အဲၣ်တၢ်သးအိၣ်, ဒီးတၢ်သူၣ်ကညီၤသးကညီၤလၢ အကတၢၢ်တအိၣ်ဘၣ်အဃိ, ပှၤလၢအတ့လီၤပှၤတဂၤအံၤ ပာ်လုာ်ပာ်ပှ့ၤဝဲဒၣ်ပှၤန့ၣ်လီၤ. ပှၤဟီၣ်ခိၣ်ဖိတဖၣ် ထံၣ်ပှၤန့ၣ် အလုၢ်အပှ့ၤမ့ၢ်တအိၣ်ဘၣ်ဆၣ်, ကစၢ်ယွၤ ပာ်လုၢ်ပာ်ပှ့ၤပှၤန့ၣ်လီၤ.