တၢ်အိၣ်ဖှိၣ် အဝဲၤကျိၤတခါလၢ တီၤဘျီကၠိဖိအမိၢ်တဖၣ်အဂီၢ်, ဖဲယဘၣ်ကဲခိၣ်ကဲနၢ်အကတီၢ်, ပဃုထံၣ်န့ၢ်က့ၢ်ဂီၤတမံၤ, လၢအပာ်ဖျါထီၣ် မိၢ်သ့ၣ်တဖၣ် အတၢ်လဲၤခီဖျိဘၣ်ဃးဒီးတၢ်မၤလၢပှဲၤမူဒါတဖၣ်လၢ အကတၢၢ်တအိၣ်- အဒိန့ၣ်, တၢ်ဆီတလဲ ဖိဆံးတဖၣ်အဖျိၣ်ခံ, တၢ်မၤကဆှီ ဖိတဖၣ်အနါဒ့အ့ၣ်, တၢ်လူၤထၢပာ်ဖှိၣ် ဖိအတၢ်လိၣ်ကွဲတဖၣ်အဂ့ၢ်န့ၣ်လီၤ. လၢတၢ်တဆိကမိၣ်အပူၤ, တၢ်ဆၢထံအကိလၢအအိၣ်ကလီ အက့ၢ်ဂီၤန့ၣ် ပထံၣ်ဘၣ်လၢပမဲာ်ညါ, တၢ်ကမၤအသးဒ် တၢ်စူးကါအီၤထဲတဘျီဧိၤ, ဒီးဘၣ်တၢ်စူးကွံာ်ဝဲ န့ၣ်လီၤ. မိၢ်သ့ၣ်တဖၣ် အသးပူၤန့ၣ် ကတူၢ်ဘၣ်ခီၣ်ဘၣ်ဝဲ ဒ်တၢ်ဆၢထံအကိဖိလၢ အအိၣ်ကလီအသိးန့ၣ်လီၤ. မိၢ်သ့ၣ်တဖၣ်အဂီၢ်, တၢ်အိၣ်ဖှိၣ် အဝဲၤကျိၤတၢ်ဖံးတၢ်မၤတမံၤအံၤ ကဲဘျုးကဲဖှိၣ်ဝဲဒၣ် ခီဖျိတၢ်နဲၣ်ဆှၢ အဝဲသ့ၣ်ဆူ ကစၢ်ယ့ၣ်ရှူး, ထံမူကျိအဂံၢ်ထံး, လၢအကမၤလၢထီၣ်ပှဲၤထီၣ် မိၢ်တဖၣ် အတၢ်သးသူထံန့ၣ်လီၤ.
လံာ်ယိၤဟၣ် ၇ ပာ်ဖျါဝဲ ကစၢ်ယ့ၣ်ရှူး လဲၤဝဲဆူ “ဘူၣ်ဒဲ,” မူးပွဲလၢအမၤသ့ၣ်နီၣ်ထီၣ် ကစၢ်ယွၤ လုၢ်အီၣ်လုၢ်အီ ပှၤအံၣ်စရ့လးဖိတဖၣ် အတၢ်ဟးဝ့ၤဝီၤလၢ ပှၢ်မုၢ်ကနၢအဂ့ၢ် (:၁၀) န့ၣ်လီၤ. ဘူၢ်ဒဲ အမူးအံၤ ပာ်ဃုာ်ဒီး တၢ်လူၤလီၤထံအလုၢ်အလၢ်, ပာ်ဖျါထီၣ် တၢ်အဒိအတဲာ်လၢ ထဲဒၣ်ထံအသဝံတဖၣ် ဟ့ၣ်ထီၣ်တၢ်ကဲဘျူးသ့ဝဲ, တၢ်လၢစံးကတိၤပာ်ဖျါဆိ မ့းရှံအၤ ကဟဲစိာ်န့ၢ် နီၢ်သးအထံမူန့ၣ်လီၤ. ကစၢ်ယ့ၣ်ရှူး မၤလၢထီၣ်ပှဲၤထီၣ်လၢပျၢၤမူးပွဲတဖၣ် အတၢ်အိၣ်ခိးကွၢ်လၢ်စိဝဲတဖၣ်, ဒီးစံးဝဲဒၣ် “ပှၤမ့ၢ်သူအသးလၢထံတဂၤဂၤန့ၣ်, မ်အဟဲဆူယအိၣ်ဒီးအီၤတၢ်တက့ၢ်. ဒ်တၢ်ကွဲးအသးစံးဝဲအသိးန့ၣ်, ပှၤလၢအစူၢ်က့ၤနာ်က့ၤယၤအံၤ, ထံကျိမူတဖၣ် ကယွၤလီၤလၢ အဟၢဖၢပူၤ” (:၃၇-၃၈) န့ၣ်လီၤ.
ဒ်တၢ်ဆၢထံအကိလၢ အအိၣ်ကလီတဖၣ်အသိး, အကတီၢ်ကအိၣ်ဝဲလၢ ပသး ကတူၢ်ဘၣ်ခီၣ်ဘၣ်တၢ်န့ၣ်လီၤ. လၢတၢ်ကွၢ်ထွဲကဟုကယာ်တၢ်အဃိ ပလီၤဘှံးလီၤတီၤ, လၢပဖံးတၢ်မၤတၢ်အဃိ ပဂံၢ်ပဘါလၢာ်, ကိးမုၢ်နံၤပတၢ်ဖံးတၢ်မၤတဖၣ်အဃိ ပသူၣ်ကၢ်သးလီၤဘှါဝဲဒၣ်န့ၣ်လီၤ. တၢ်မၤလၢပှဲၤ တၢ်လိၣ်လၢအကတၢၢ်တအိၣ်တဖၣ် မၤဃ့ထီကွံာ်ပသူၣ်ပသးန့ၣ်လီၤ. ဘၣ်ဆၣ်, ဖဲပအိၣ်မူအိၣ်ဂဲၤရ့လိာ်သးဒီးကစၢ်ယွၤန့ၣ်ဒီး, တၢ်မၤလၢ ပကွၢ်ထွဲကဟုကယာ်ပှၤ, ဒီးပတၢ်ဘၣ်ယိာ်ဘၣ်ဘီတဖၣ်လၢ အဂုာ်ကျဲးစၢးမၤလီၤဘှံးလီၤဘှါပှၤတဖၣ် ကအါဒၣ်ဝဲထဲလဲၣ်ဂ့ၤထဲလဲၣ်ဂ့ၤန့ၣ်, ဒ်သိးကမၤသီမၤဆူၣ်ထီၣ်, ဒီးကမၤပှဲၤက့ၤပဂံၢ်ဘါအဂီၢ်, ကစၢ်ယွၤ ကကတဲာ်ကတီၤန့ၢ်ပှၤ ထံမူထီၣ်ပၢၢ်လၢ ပသးကံၢ်ပူၤန့ၣ်လီၤ.
